Jeremías tatayhlä profeta Hananías
1Tä kamaj häp nekchämtso tä häpe nekchäm tä cuatro tä Sedequías häpe rey tä ihi Judá, wet iwel'a tä cinco, häp profeta Hananías tä lajcha Azur tä lew'et Gabaón, tahuyej Jeremías tä ihi Lhawuk Lewukwe, ihi tä sacerdotes lhäy'e nilhok wichi tatache, wet yok:
2–Lhawuk tä laj letumfwaya, häp Israel laka Dios, yok, “Osohiyeja lakhajyhayaj tä iyej Babilonia laka rey. Tehlat iwoyek õ'wasthi n'olhukw'et tä õ'ti'pe weyis lew'o. 3Chik kamaj nichätaye täkwfwas nekchämis, onachajila alhoho nilhokej m'ayhay tä isis tä rey Nabucodonosor itälhthohte Owukwe wet ihäne Babilonia. 4Äpte onachajila alhoho Jeconías, Joaquim lhäs tä Judá laka rey, lhäy'e nilhokej häp Judá lheley tä õ'hänehte Babilonia. ¡Tsi matche tä owasthihila n'olhukw'et tä Babilonia laka niyat iti'pe lhamel lew'ol! Olham tä ohäpe Dios tä matche tä owoyetso.”
5Wet profeta Jeremías nichulho profeta Hananías tä lhamel ihi tä sacerdotes lhäy'e nilhok wichi tatache tä ihi Lhawuk Lewukwe. 6Wet yok:
–¡Isila chik Lhawuk iwoye täjtso! ¡Isila chik Lhawuk imatitche ämtes tä lewoye wet inachaj Lew'ete m'ayhay tä isis! ¡Isila chik itonchephä laka wichi tä ihi Babilonia wet inachaj alhoho! 7Lhek ch'ahu n'oye, am lhäy'e nilhokej wichi. 8Häp profetas tä ichehen lewhäy tä pajche tä kamaj n'amel kay'ewachehen, lhamel itoyench'oye tä ihichela n'oka'tshayaj lhäy'e äytes lhäy'e m'ak wit'äyhyaj tä õ'länejen wichi tä i'pe honhat lhäy'e n'oniyatyajay tä wus. 9Tha häp tä chik iche profeta tä itoyenlä n'otamsek, tajlhama chik Lhawuk imatitche lhämtes wet n'änhila t'at tä lham tä ichen.
10Wet nech'e Hananías isoyej Jeremías lelhukw'et tä i'pe lew'o wet iwasthi. 11Wet ifwenho wichi tä yok:
–Lhawuk lhämet yok, “Häp tä mälhhiyejattso, chik kamaj nichätaye täkwfwas nekchämis, osohiyeja n'olhukw'et tä Nabucodonosor, rey tä ihi Babilonia, iti'pe wichi lew'ol, wet owasthihila.”
Tä Jeremías iläte Hananías lhämettso, wet yik, inukwe len'äyij. 12Tä paj Lhawuk tahuyej Jeremías wet yok:
13–Mäh hoye Hananías, fwenho, olak, “Lhawuk yok, Am lewasthi naji n'olhukw'et tä hal'ä, mat olham owaklhat n'olhukw'et tä chinaj. 14Tsi häp tä olham tä ohäpe Israel Lewuk Dios tä laj letumfwaya, olhämet yok, Häp chinajtso otihla'pe nilhokej wichi lew'ol häpkhilek lhayen rey Nabucodonosor lakwenkaya, Babilonia laka niyat. Wet hap'akej itshätäy tä fwitses tä oyenla lewoya.”
15Wet Jeremías yäme häp Hananías wet yok:
–¡Hananías, ch'ahu n'oye! Tek Lhawuk alechenek. Tä lefwenho wichi m'ak tä kamatache, wet lhamel t'ekhache t'at. 16Wet häp tä Lhawuk yok, “Nekchämna osohla amej honhatna, let'inla, tsi häp tä achufwenyaj tä lewoye tamenej wichi tä tatay n'ohlä.”
17Wet matche, profeta Hananías y'il p'ante tä ihi iwel'a tä siete häp nekchämtso.
