Jeremías ilesayen lhämet, ichene wichi tä ihi Babilonia
1Täjte profeta Jeremías ihi Jerusalén, wet ilesayen lhämet, ichene hin'ol tä thänhäy tä kamaj imälhehiche tä ihi Babilonia, lhäy'e häp sacerdotes, lhäy'e profetas, lhäy'e nilhok häp wichi iyhäj tä rey Nabucodonosor ichäjehte Babilonia tä tälho lew'et Jerusalén. 2Häp rey Jeconías pajche Nabucodonosor isoyejte leniyatyaj tä ihi Jerusalén wet ihäne Babilonia, hip'ajtej Jeconías lako tä niyat tsinha, lhäy'e lech'otfwas tä ihi leniyatyajw'et, lhäy'e leniyatfwas tä ihi Judá lhäy'e Jerusalén, lhäy'e hin'ol tä ihanej tä yenlhi m'ayhay, lhäy'e chinajwos. 3Wet häp cartana Jeremías ichenchufwi Elasa tä Safán lhäs lhäy'e Gemarías tä Hilcías lhäs. Häpehen hin'ol tä Judá laka rey Sedequías nech'e ichene häp rey Nabucodonosor tä ihi Babilonia. Wet lhämtes tä ihi carta yok:
4“Häp täja häp Lhawuk tä laj letumfwaya lhämet, häp m'ak tä Israel laka Dios ifwele nilhokej wichihte lham yikhatch'oye Jerusalén wet ichene honhat tä kalew'eta tä häpe Babilonia. 5Yok, Enchelhi awukwey wet eyayhi t'at. Enchelhi alafwey, utcheyhen, tihchä hal'äy häpkhilek amel letuj lhay. 6Whayeyhen wet wo alesa. Chik thänhäy, is chik lhamel äp tewhayeyhen wet äp iwo lelesa, häpkhilek awujpey kanhi wet nit'ayahchä amel. 7Is chik letachumwethä häpkhilek honhat tä lheyayhina is amejen. Alhyenay n'oye honhattso tä oyokweste amehen. Chik is m'ak tä iyej, te amel t'at tä aisiyeja.
8“Lhawuk tä laj letumfwaya tä Israel laka Dios yok, Yej wahin amejen tä profetas ikan amejen, lhäy'e wichi tä i'amejen tä fwetaj ihanej m'ak tä ihichela. Yej wo lahaya chik lhamel ifwel amho lefwilhey. 9Lhamel fwetaj yen lhämeta olhämtes, mat mathichehent'a lhämtes. Olhamhit'ak ochenhay.”
10“Wet Lhawuk äp yok, Chik tefwaytshi setenta nekchämis tä Babilonia lheley lhayen awuhuya, nech'e olham ohohla amehen wet op'altsenla amehen, oyämla matche olhämet wet onachajila amehen aka honhatna. 11Tsi häp tä ohanej t'at m'ak tä owohiyeja amehen, häpe t'at atamsek, häpkhit'a m'ak tä ni'isa, häpkhilek aniwhayaj ihi. Olham tä Awukn'o olhämet täjtso. 12Wet nech'e lehohla n'oye wet let'änla och'oye tä lewo alhyaja, wet otch'ahuhila amehen. 13Wet chik imälhewek ahusey tä let'u n'okwe, wet letäfwenhiyeja tä oi'amejen. 14Matche, oihlat amejen wet owohlat elha m'ak tä i'amejen. Otonhichephäla amel tä letälhe honhatil lhäy'e wichi tä oyokweste amehen. Wet onachajila amehen häp honhatna tä oyikhatte hach'oyehen. Olham tä Awukn'o olhämet täjtso.
15“Amel lhok, Lhawuk tä hiw'en n'ohohen profetas tä itihi Babilonia. 16Mat lhek tetshan Lhawuk lhämet tä itiyej häp rey tä kamaj ihi hupuyna tä ihi n'oniyatyajw'ette David ihi. Wet äp tetshan lhämet tä itiyej nilhokej amel aiyhäj tä imälhehchä tä nip'aka amejen tä õ'chente amehen honhat tä lheyayhitso tä kahaw'eta. 17Lhawuk tä laj letumfwaya yok, Chik taj lewhäy, ochenhiyela lhamel n'oka'tshayaj, lhäy'e nehläs, wet äytes. Otech'aynhiyeja higo lhay tä najuthiche, nemhit is chik õtuj. 18Tek olehthichela lhamel n'oka'tshayaj, nehläs, lhäy'e äytes. Lhamel häpkhila m'ak tä lhäy'e lhip tä tanhoch'ay, wet nilhokhiyeja häp wichi tä i'pe honhat ikokyenhiyela lhamel. Wet elh chik häpe chik t'uhläk lewit'äyhyaj iyej elh, lham yohlak, Is chik atet iwoye wichi tä imälhehi Jerusalén tä lhamel matche tä lewit'äyhyaj ihiche. Tanhoch'ayhiphäla honhat wet nilhokej wichi tä ihiche honhatil tä oyokwese lhamel häp tä itihiyeja leläkwyhanyaj. 19Tsi häp tä lhamel nitch'ahuyaye olhämtes tä okawos profetas iwopej silätayej. Wet te amel letach'ahuhiyet'a olhämtes. Olham tä Awukn'o tä owoyetso.
20“Tä mälhyejtso, nilhokej amelte oaichench'oye Jerusalén wet lheyayhi honhat tä Babilonia tä kahaw'eta, tetshanay olhämettso.
21“Wet Lhawuk tä laj letumfwaya tä häpe Israel laka Dios yok, Acab, Colaías lhäs, lhäy'e Sedequías, Maasías lhäs, lhamel fwetaj yen lhämeta olhämtes, mat mathichehent'a lhämtes. Tä mälhyej'attso, olham oyachajiyela rey Nabucodonosor tä ihi Babilonia, wet lham ilänhihena lhamel tä ihi tä amel letatache. 22Wet chik Judá lheley tä ihi Babilonia t'uhläk lewit'äyhyaj ihi elh, lhamel yohlak, Is chik Lhawuk itech'ayen amej Sedequías lhäy'e Acab tä Babilonia laka niyat hip'ohen. 23Tsi häp tä lhamel iwoye m'ak tä matche tä ni'isa tä iyej oka wichi Israel. Tiyäjo lakain'oyaj tä itiyej atsinhay tä iyhäj lech'efwas, wet äp w'et iwot olheyayej m'ak tä iwoye, mat olhämethit'a. Olham tä Awukn'o ohanej t'at täjtso.”
Lhawuk lhämet tä ichene Semaías
24Lhawuk tahuyej Jeremías tä ne'tek ifwele Semaías tä Nehelam lhele wet yok:
25–Lhawuk tä laj letumfwaya tä Israel laka Dios yok, “Am lechene aka carta nilhok wichi tä ihi Jerusalén, lhäy'e sacerdote Sofonías tä Maasías lhäs, lhäy'e häp iyhäj sacerdotes. Wet ämet tä ihi carta tä lefwele Sofonías yok, 26Lhawuk iti amhi tä sacerdote tä lecheyäjo Joyada lew'et, häpkhilek am t'at tä letetshan Lhawuk Lewukwe. Wet chik näm elh chik häpe tä tektshanlhi tä fwetaj profeta, iwohiyet'ak katsokalhi wet lenayhtejlhi chinhas. 27Tä mälhyejtso, ¿chipte tä katsokalhi Jeremías tä honhat tä Anatot lhele tä fwetaj häpe Lhawuk lhämetwo? 28Tsi lham tä ichene olhamel tä oihi Babilonia häp lhämet tä yok, Pitajla lewhäy chik lheyayhi honhat tä kahaw'etaya. Wet ne'tek olhamel oyenchelhi owukwey wet oihi t'at. Wet äp ne'tek oyenchelhi olafwey wet otutcheyhen, otihchä hal'äy häpkhilek otuj lhay.”
29Tä sacerdote Sofonías tachumlä Semaías laka cartatso, wet yahyen häpkhilek Jeremías iläte. 30Wet nech'e Lhawuk tahuyej Jeremías wet yok:
31–Fwele nilhokej lhamelte õ'häne honhat tä kalew'eta, tä olham tä Lewukn'o oyok, “Semaías tä Nehelam lhele w'et yen lhämeta olhey tä olhamhit'ak ochen. Ifwenho wichi m'ak tä kamatache, wet lhamel t'ekhache t'at. 32Tä mälhyejtso, olham tä Awukn'o oyok, Otihiyeja otasnhayaj Semaías lhäy'e leles. Wohit'ala elh lhamel chik imälhehi. Tek hiw'enla'pe m'ak tä is tä owohiyejela oka wichi, tsi lhämtes tä iwoye tamenej wichi tä tatay n'ohlä. Olham tä Awukn'o tä owoyetso.”
