Israel lhayis pajche ileyej p'ante Lewuk Dios
1Lhawuk yok:
“Chik iche hin'o tä iwom lech'efwa,
wet atsinha ileyej häp hin'otso wet iyej elh hin'o,
wet elh tä ichun lech'efwa
nemhit yachajo chik yäple atsinha.
Tsi chik yachajo tä iyej,
wet tamenej tä honhat nech'e kok'aye.
Tha häp amel, Israel lhayis,
matche tä lewoyay akeya,
aletech'aynej kain'oyaj länek
tä wujpey hin'ol tä iyejwethä.
¡Wet athana lefwetaj letapilay n'oye!
2“Lhek yahinphä, tetshanay
tachenhas ts'anis tä atoschephä.
Ihichet'a tachenaj chik häpe chik kawoya akeya'pe.
Letatayphäwhäye n'äyij tä leniwhich'oye ahumnhay,
atet iwoye chowalhnaj tä iniwhich'oyek itsoklhi
elh chik häpe chik inukwe laka honhat.
Matche tä ni'isa akeyis tä lewoyayetso,
wet letamenej tä honhat nech'e kok'aye.
3Wet häp tä tamenej tä nem iche pelhay
häp lewhäy tä fwiy'etil lhäy'e tä inawop.
Mat akain'oyaj itpe atey
wet lewohit'a han'äfwlhiya.
4Pajichet'a tä lhämay n'oye tä lhok,
Ijcha, tälhe tä nech'e omamses
tä oalakalay'i t'at.
5¿Hä lajit lepesa awäk?
¿Hä nittäya amej tä leyetpej n'oyehen?
“Mat tej tä lhämayetso,
kamaj wuj m'ak tä ni'isa tä lewoyaye.”
Lhawuk ne'tek laka wichi iwo lehusey iyhäja
6Häp ifwalaste rey häp Josías, Lhawuk tahuy n'oyej wet yok:
–¿Hä lew'en m'ak tä ni'isa tä Israel lhayis iwoye? Lhamel ile n'oyej wet iwo lakeya tä iche'pe tachenhas lhäy'e tä ichechufwi hal'äy lehupelis. 7Olham oyen tichunhayaja tä ch'athiyejat lhamel chik paj wet yen letichunhayaja chik tapil n'oye p'iya. Mat tapinhit'a n'oye. Wet lech'inhälis tä akachuhantses tä Judá lheley lhamel hiw'enej. 8Wet hiw'enej tä owom Israel lhayistso tä nitch'ahuyawethä, oleyej lhamel tsi häp tä iwo lakeya wet nemhit ihuminn'o. Wet lech'inhälis tä akachuhantses tä Judá lheley lhamel nowayhit'a n'oye, wet lhamel äpte yikhen tä iwo lakeya. 9Iwoye m'ak tä iwoye, wet tä n'okwiyej tuntey lhäy'e hal'äy, wet tamenej tä kok'aye honhat. 10Lhamel äpte tapinhit'a n'oye, imälhehit'awek lehusek chik lhayachaj n'oye, mat fwetaj ikan n'oyej. Olham tä Lewukn'o olhämet täjtso.
11Wet Lhawuk äp yäm n'oye tä yok:
–Judá lheley lakachuhanyaj inu'pe Israel lhayis lakachuhanyaj. 12Wet am is chik leyahne lhip tä tafwojyhiye wet lefwenhomche lhamel olhämetna.
“Lhawuk lhämet yok, Israel lhayis tä a'akachuhantses, is chik letapilay n'oye. Olehichela owäk tä oti amejen wet nemla onchuwet amehen, tsi ohäpe Elh tä hap'altsentsaj. Olham tä Awukn'o olhämet täjtso. 13Wet oyok, afwelayej n'oho tsi ates ihi n'ohlä tä ohäpe Awuk Dios, lhäy'e tä lewo akeyayej dios lhayis tä w'enha lhamejen tä lheyaypejchufwi hal'äy lehupelis, wet tek letach'ahuyaye olhämtes.
14“Oyok, Lhuyay, tapilay n'oye tä oaleles tä akachuhantses. Tapilay n'oye tsi olham tä ohäpe Awuk. Otchumhiyela elhpej tä otälhtho hupuy tefwaji, wet op'ajthiyeja nitäkwfwaspej tä otälhtho iyhäjpej tä lhalepuhfwas, wet onachajiyela lhamel häp Jerusalén. 15Wet ow'enla amhohen niyatey tä ikänitlhin'o, häpkhilek lhamel t'u amehen wet äp ihanej tä iwoye m'ak tä is alhoho. 16Wet chik amel let'ayhitshila tä lhehi aka honhat wet wujla'pe ales, wet nemla iche elh chik lechowej inuhlä häp Arca tä Ot'amajchet tä olhämtes ihi. Nemla õntichunch'oye wet nemla õyenlhi elh. Olham tä Awukn'o olhämet täjtso. 17Chik nichäthiyela lewhäytso, Jerusalén lheyla Lhawuk leniyatyajw'et, wet nilhokhiyeja wichi tä ihiche honhatil tä lhaihutlawek tä n'okwi n'oyej tä Lewukn'o. Nemla t'unhen lehusey wet nemla yachajo tä iwoye m'ak tä ni'isa.
18“Chik nichäte ifwalastso, Judá lheley lhaip'ajthiyeja häp Israel lhayis, wet nilhokej lhamel tälhiyela honhat tä tumej tafwojyhiye wet tapinhiyela häp honhat tä olham ow'enho lechätilis lhäy'e amel tä aleles.
Lhawuk inityenej Israel lhayis chik iwo lehusey iyhäja
19“Israel lhayis, pajche ot'uhläk oayen olesa,
owattehläk ow'enhat amejen honhat tä isilataj
tä inu'pe honhatil iyhäj.
Oyen tichunhayaja chik paj nech'e lhenla Ajchayan'o,
wet lelehit'ala n'oyej tä lep'akhila n'oyej.
20Mat amälhyej atsinha tä yen t'ulhneka hin'o,
pajtha lewomn'o tä ohäpe Awuk.
21“N'opakas tumpe tachenhas tä ts'anis,
häpe Israel lhayis tä lhamel tafwchehchä,
t'alhej n'oye chik op'altsene lhamel.
M'ak tä tamenej häp tä yikch'oye n'äyij tä is alhoho,
tsi hip'ethat n'ohlä tä ohäpe Lewuk Dios.
22Lhuyay, tapilay n'oye,
tsi oaleles tä akachuhantses.
Olham oaichesthenla tä let'ilejen m'ak tä ni'isa.”
Nech'e Israel lhayis nichulho Lewuk Dios wet yok:
“Eh, olhamel ohohla ame,
tsi am tä ahäpe Owuk Dios.
23Tä olhamel oho'pe tachenhas tä on'okwiyej ocheyälis,
matche tä okan lhamejen.
Tä olhamel ot'änwethä tä oiche'pe tachenhas,
tek wo m'ak tä okalhi.
Tajlhama am, Iwuk Dios, tä lew'en n'ohomche
ofwayhyajay tä ohäpehen Israel lhayis.
24Tälhettsiy wet pajtha nämena
tä dios tä kamatache
tä hich'atej tä ni'isa tä lhey Ba'al,
iso n'oyejen olhamel olhokwey lechumtes,
lhäy'e leles, lhäy'e leläy.
25Tä mälhyej'attso, is chik olhamel
owo n'äfwlhiya wet olhay'ayhatchehchä.
Tsi olhamel lhäy'e ojchalis owo ch'isukyaja,
tälhe ifwalas tä pajche pajtha ifwalasna.
Olhamel ottay ahilä tä ahäpe Owuk Dios.”
