Lhawuk yäme tä laka wichi nemla n'okwenkay
1-2Lhawuk tä Israel laka Dios tahuyej Jeremías wet yok:
–Lesayen häp libro, tihi nilhokej m'ak tä ofwel amho. 3Tsi nämla ifwala tä op'altsenhiyela oka wichi Israel lhäy'e Judá. Owohla elha m'ak tä otiyej lhamel. Olham t'at tä olhämet tä onachajihola honhatte ow'enho lechätilis tsi lewuk t'at.
4Häp täja Lhawuk lhämet tä ichene Israel lhäy'e Judá lheley. 5Lhawuk yok:
“Pitsaje n'ot'änyaj tä äytajiy.
Wichi wuj tä nowayhen,
nemhit letamsekis ihi.
6Lhek tetshan,
¿hä hin'o ihanej tä takapuhtshan?
Kha, ihanhiyejt'a.
¿Wet chipte tä ow'en hin'ol
tä lhaits'ulhkatejche m'ak tä ilät,
mälhyej iwoye atsinha tä takapuhtshan?
¿Chipte tä t'ähes ika'tu?
7Ifwalatso chik näm wuj tä äytajichela,
tek häte iwoye lewhäy tä tefwaytshi.
Oka wichi wuj tä lelhakli ihihila,
mat olhamlak ofwayhtejen.
8Olham tä laj otumfwaya tä Lewukn'o oyok,
Owasthihila lelhukw'et tä i'pe lew'ol
wet oyisthihena t'akay,
wet wichi tä w'enha lhamejen nemla yen kwenkaya.
9Tajlhamhiyela olham Dios tä Lewukn'o,
lhäy'e häp rey David leles tä lepes lheley elh
tä oyenla lhamel laka niyata.
Lhawuk ifwayhthila laka wichi
10“Yej noway, amel tä ahäpehen
okawo Jacob laka wichi.
Yej noway, Israel, tsi häp tä am lhäy'e ales
ofwayhthila amejen honhat tä atofwe
tä kahaw'eta tä lhehina.
Wet yachajihola chik atamsekis ihi,
wet nemhit ihichela wichi chik häpe
chik aistunlawethä.
11Olham tä Awukn'o oyok,
Yej noway, amel tä ahäpehen
okawo Jacob laka wichi,
tsi olham oit amejen.
Otäyhthihena nilhokej wichi
tä ihiche honhatil tä amel lefwtsatpehen,
mat amel tek oaitäyhthihena.
Otihla amejen ofwonkanyaj
tä t'uhawetej m'ak tä lewoye.
12Lhawuk yok:
“Alätsek nemhit iwo lechaya.
Ihichet'a elh chik aichesat.
13Nemhit iche elh chik ayen lhakliya,
wet lecha ihichet'a.
14Nilhokej wichinaj w'et lhen hach'otfwasa
nemhit ayen tichunhayaja wet nemhit aitetshan.
Olham t'at tä oti amejen awit'äyhyaj,
otet iwoye elh tä häpe atayhfwa,
häp tä oyäm äytajche otasnhayaj tä oti amejen,
tsi wuj m'ak tä lewoye tä ni'isachehen.
15¿Chipte tä apitsajeje alätshay tä laj lechaya?
Tä wuj m'ak tä lewoye tä ni'isachehen,
häp tä tamenej tä oti amejen awit'äyhyajna.
16Mat nilhokej wichi tä t'uhläk aitäyhthen, nofwila,
wet nilhokej atayhfwas,
elh tefwajpeji õyenla kweneka
wet õ'hänhiyela honhat tä kalew'eta.
Häp lhamel tä iso amejen m'ak tä akäywet,
õ'sohiyeja lhamel häp m'ak tä iyej.
17Tej tä atayhfwas aiwom
wet äp newache elh chik ayen tichunhayaja,
tha häp tä olham olejla alätshay
wet otihla amejen achesyaj.
Olham tä Awukn'o olhämet täjtso.”
18Lhawuk yok:
“Owohla elha m'ak tä otiyej Israel,
wet otihiyeja op'altsenyaj
häp honhat tä lew'et.
Õ'nech'aynhihila Jerusalén,
õ'tihla'pe lhipeyhte wasiche,
wet rey lewukwe õyachajiholak
õ'nech'aynhi tä ihi lew'ette.
19Wichi itenla letenkay tä iwo graciasa,
wet t'ischeyhiyejawethä lakäjyaj.
Nemla iche m'ak tä ilänhen,
tajlhama tä oyämla wujpe lhamel.
Wichi iyhäj nemla yen w'et m'ayeka lhamel,
tsi olhamlak otiyej len'ohyaj.
20Lhamel mälhhiyejat iwoye lewhäy tä pajche,
olhamlak oiyej wet ihihilat tä ihi,
wet otihiyeja otasnhayaj nilhokej häp letayhfwas.
21-22Otälhthihola elh lhamel
chik oyenla laka niyata.
Ot'änhiyela häpkhilek iho n'oye,
tsi ihichet'a elh chik iho n'oye
chik olham n'am t'äne.
Wet lhamel häpkhila oka wichi,
wet olham ohäpkhila laka Dios.
Olham tä Lewukn'o olhämet täjtso.”
Lhawuk lewäk
23Lhawuk lewäk tet iwoye pelhay tä yafwuteji
tä nichätpe wichi tä ni'isahen.
24Ilehichet'ala lewäk tä äytajche,
pajla'tha wak'alh m'ak tä yenlhi.
Nämla lewhäy tä amel
lhenla atichunhayaja m'ayhayna,
wet nech'e letäfwnhichela.
