Lhawuk ifwenho laka wichi tä yachajiyela laka honhat
1Tä kamaj Jeremías ihi n'op'onthi tä sip'älisw'et ka'alho, wet Lhawuk äp yachajo tä tahuyej wet yok:
2–Olham tä Awukn'o olhenek honhat, wet otihi lew'et wet ihit tä ihi. Ofwel amho tä oyok, 3“Chik let'än n'oye wet onchulhla amho, wet ofwenla amho m'ayhay tä wus tä nin'äla tä pajche katäfwelayej. 4-5Olham tä Awukn'o tä ohäpe Israel laka Dios oyok, Õ'wasthihichela wichi lewukwey tä ihi Jerusalén, lhäy'e häp Judá laka reyes lewukwey. Tsi tä Babilonio lhayis yenlhi n'ot'äsawtes häpkhilek isakanho hupuy, wet wichi tä ihi fwetaj tatayejlä lefwajnhates lhamel. Wohit'ala m'ak chik tälhe laka'tshayajna, tajlhama tä lep'itseyhay tapohiyeja lewukwey. Tsi olham otihiyeja lhamel owäk tä äytajchey, wet olänhihena lhamel. Nemhit op'altsen, häp tä iwoyepej m'ak tä matche tä ni'isa.
6“Mat chik paj ochesthihena wet oyämla wuj letamsekis. 7Wet owohla elha m'ak tä otiyej Judá lhayis lhäy'e häp Israel lhayis wet oyachajiyela lakhajyhayaj tä pajche iyejen lhamel. 8Wet osohiyeja nilhokej lech'isukyajay lhäy'e m'ak tä ni'isa tä tatayej n'ohlä, wet otäyhthiyejena t'at letes. 9Wet Jerusalén häpkhilek okäjejlhi, wet nilhokej wichi tä i'pe honhat tachetthiyejchela lenowayhyaj wet iwujyenlan'o chik ilätch'oye m'ak tä is tä owoyeje Jerusalén lheley, lhäy'e okäpfwayajay tä isen tä otiyej lhamel.”
10Wet Lhawuk äp yok:
–Wichi yäme tä ts'anis honhatna, nem wichi i'pe, lhäy'e itshätäy. Wet Jerusalén lhäy'e wichi lew'etes tä ihi Judá äpte nem wichi ihiche, lhäy'e itshätäy. Mat olham ofwel amho tä ihichela ifwalas tä wichi yachajiholak ihi, 11wet iwohla lakäjyaja wet itenla letenkay. Wet ihichela iyhäj tä tawhayeyhen wet akäslatwethä, wet iyhäj ichäjiyela Owukwe m'ak tä yen otw'ayhata, tsi häp tä akäjejlhi t'at m'ak tä owoyeje. Lhamel iwohla lechoslisa tä yok, “N'awunit Lhawuk tä laj letumfwaya, tsi wuj tä hap'altsentsaj wet lehumnhayaj nittäya.” Wet matche, olham owohla elha m'ak tä otiyej wichi tä ihi honhatna. Olham tä Lewukn'o olhämet täjtso.
12Lhawuk tä laj letumfwaya äp yok:
–Häp honhatna ts'anis t'at, nem wichi i'pe, lhäy'e itshätäy. Mat yachajiholak w'atshan wet tson'ataswos ihänhiyela leläy häp hup häpkhilek iwo t'elakw'eta. 13Wet yachajiholak itetshanlä leläy tä ihi lew'etes tä ihi tachenhas lhäy'e honhat tä w'awulhchä, lhäy'e tä ihi ts'anis tä tumej tapinhiye, lhäy'e häp Benjamín lhayis kahonhat, lhäy'e tä ihi lew'etes tä atott'aho Jerusalén, lhäy'e tä ihi Judá lhipey iyhäj. Olham tä Lewukn'o olhämet täjtso.
Lhawuk yämla matche lhämet tä is tä iwoyeje laka wichi
14Wet Lhawuk äp yok:
–Nämla ifwalas tä oyämlat matche olhämet tä is tä owoyeje häp Israel lhayis lhäy'e Judá lheley. 15Chik nichäte lewhäytso, otälhthiyela David leles tä lepes lheley häp niyat tä lechowej ihi. Tehlat iwoye hal'ä tä w'atshan lhacha, wet iwohiyela lakalelhthayaj tä is alhoho tä ihi honhat. 16Chik nichäte ifwalastso, wet Judá lheley tefwayhiyeja m'ak tä ni'isa wet Jerusalén letamsek ihihila. Wet õ'wohla lheya Jerusalén tä õyok, Lhawuk tä n'a'isyen. 17Tsi häp tä olham tä Awukn'o oyok, Lajit lepesa tä David lhäspej t'at chik niyatej Israel. 18Wet lajit lepesa tä sacerdotes tä tälhejlä Leví chik tach'ote ochumet. Nilhokej ifwalas tä lhamel hiw'enla n'oho otw'ayhtes tä itshätäy lhäy'e n'olhäk tä yachuyaj lhay.
19Lhawuk tahuyej Jeremías tä yok:
20–Olham tä Awukn'o oyok, Olham otiyejte olhämet ifwala lhäy'e honatsi häpkhilek ihiche t'at lewhäypej tä nichäte. Olhämettso häpe t'at m'ak tä nittäya. 21Wet häp tä tettso, olhämet tä otiyej okawo David, lhäy'e olhämet tä otiyej och'otfwas sacerdotes tä tälhejlä Leví, häpe t'at m'ak tä nittäya. Lajit lepesa tä David lhäspej t'at chik niyatej Israel. 22Wet okawo David leles lhäy'e sacerdotes tä tälhejlä Leví, oyämla wujpey, mälhhiyejat katetsel tä ihi pule lhäy'e holo tä iwhäye tewok.
23Wet Lhawuk äp yäme Jeremías tä yok:
24–¿Hä leläte wichi lhämet tä yok, “Israel lhayis lhäy'e Judá lhayis lhamel laka dios iwom wichi tä lham tatshupiye p'ante”? Wet lew'en tä wichi yen w'et m'ayeka oka wichi. 25Mat olham tä Lewukn'o oyok, Olham pajche otiyej olhämet ifwala lhäy'e honatsi häpkhilek ihiche t'at lewhäypej tä nichäte. Wet oyenlhi t'at pule lhäy'e honhat, lhäy'e m'ayhay tä iwoye tä lhamyajej. 26Wet häp tä tehlattso, kalelhäj t'at tä n'am womla Israel lhayis, häp oka wichi tä tälhejlä letetsel Abraham, Isaac, lhäy'e Jacob. Otihiyejt'ala kanhi okawo David leles tä lepes lheley, häpkhilek ichepej elh lhamel tä ottshupiye tä oyen Israel lhayis kaniyata. Tsi op'altsenla Israel wet owohla elha m'ak tä otiyej lhamel.
