Jer 34

₁Lhawuk tahuyej Jeremías häp ifwalas tä Babilonia laka rey Nabucodonosor, lhäy'e nilhokej laka sip'älis, lhäy'e nilhokej wichi tä tälhomche honhatil iyhäj tä lhayen lewuka, wet lhamel tatayhlä häp Jerusalén lhäy'e nilhokej hupuy iyhäj tä atott'ahomche. Wet häp tä Lhawuk yok:

₂–Olham tä Awukn'o tä ohäpe Israel lhayis laka Dios oyok, “Hoye Sedequías tä Judá laka rey wet fwenho olhämet tä oyok, Athana olham oyachajiyela Babilonia laka rey häp hupuyna, wet iwunhihomchela pajla'tha nofw. ₃Wet am lehanhiyejt'ala alewoyneja chik lefwetaj lhek chik alefwayhat. Matche tä õ'aitsokhilhila, õ'hänlat ame. Wet chik tajyäme tä lhehi tä tatache, wet õ'hänla ame häp Babilonia.

₄“Iche elh m'ak tä ofwel amho, Sedequías, tä ohäpe Awuk. Tej tä õ'hänla ame Babilonia, mat tek õ'ailänla. ₅Atamsek ihihila t'at chik let'il, wet wichi ay'äynhila. Wet õ'wunhihola m'ak tä lenij akäjche chik õ'aitihihila hap'itsekw'et. Tehlat iwoye tä õ'wunhopej tä õtjänlä achätilis elhpej tä niyat tä ichun ahilä tä ileyej honhat. Olham tä Awukn'o olhämet täjtso tä ofwel amho.”

₆Profeta Jeremías ihi p'ante Jerusalén tä ifwenho nilhokej Lhawuk lhämtesna häp Sedequías, Judá laka rey. ₇Häpe t'at lewhäy tä Babilonia laka rey laka sip'älis inuye häp Jerusalén lhäy'e Lakis wet hupuy tä lhey N'ojäkw. Tsi ts'ilak t'at honhatesna tä kamaj imälhehi tä lelafwey takhajayhen.

_8-9Rey Sedequías lhäy'e nilhokej wichi tä ihi Jerusalén, lhamel yenlhi lhämet tä yok, “Elh chik häpe tä lakwenek ihi tä häpe Hebreo tä hin'o lhäy'e tä atsinha, is chik ileyej tä yen lakweneka, häpkhilek nemhit iche elh chik häpe tä yen lakweneka lepuhfwa tä häpe Judío.”

₁₀Wet nilhokej häp wichi lhäy'e iyhäj tä len'ohyaj ihiche, lhamel iwoye n'olhämetna, lhamel ileyejen lakwenkay. ₁₁Mat tä paj wet lhamel nemhit ihumin tä iwahinchetshi lakwenkay, wet nech'e äp yachajo tä yen lakwenkaya.

₁₂Wet häp tä Lhawuk tahuyej Jeremías wet yok:

₁₃–Olham tä Awukn'o tä ohäpe Israel lhayis laka Dios, otonphähte amel achätilis tä otälhtho Egipto, häp honhat tä lhamel ihi tä õyen kwenkaya. Wet oyenhoplhihte olhämet lhamel tä oyen oka wichiya. Wet äp ofwenhohte lhamel tä oyok, ₁₄“Chik nichätepej siete nekchämis, is chik amel elh chik häpe tä ichäjla Hebreo chik häpe tä iyhäj iwom, wet tach'ote seis nekchämis, is chik ilehiyeja tä yen kweneka.” Mat lhamel iwohiyet'a olhämet, tach'ahuhit'a n'oye.

₁₅“Ifwala elh naji wuj tä ikäjyenlhin'o tä amel leleyej m'ak tä ni'isa tä lhen akwenkaya apuhfwas. Wet lhenlhi naji ämet tä alep'ajtitejwek tä ihi tä olham ottache tä lhewaychufwi Owukwe tä Ot'amajchet. ₁₆Mat tä paj wet amel leleche m'ak tä is tä lewoye, nemhit lhen amajcheta olhey. Amel lhachajo tä lhen akwenkaya aiyhäjnaj lewahinchetshi. Lenachajehen haw'etes wet yachajo tä häpehen t'at achumyenhay tä akwenkay.

₁₇“Häp tä tamenej tä olham tä ohäpe amel Awuk oyok, Tä amel kawoyaye olhämet tä kawahinachetshi aiyhäj tä akwenkay, wet häp tä olham owahnhila amehen nifwotas chik inu amehen, lhäy'e äytes, wet lhäy'e nehläs, häpkhilek nilhokej wichi tä i'pe honhat nowaye awit'äyhyaj tä i'amejen. Olham tä Awukn'o olhämet täjtso. _18-19Häp Judá laka niyatey lhäy'e niyatey tä ihi Jerusalén, lhäy'e lech'otfwas tä leniyatfwas, lhäy'e häp sacerdotes, lhäy'e nilhokej häp wichi, lhamel iwoyenaj lhämet. Wet tä hit'unhatej n'okwe, wet tachuma tolo lhäs, hich'esajche lechowej, itihi täkwfwas lhipey wet inukwe lechowej tolo lhipeytso. Mat tä paj wet lhamel inäk'äs lhämettso, iwohiyet'a. Wet häp tä olham otech'aynhiyeja lhamel häp tolo lhäsnaj ilän. ₂₀Oyachajiyela lhamel häp letayhfwas tä iwatläk ilänhen lhamel, wet lep'itseyhay afwenchey tä n'okotses lhäy'e itshätäy tä fwitses häp tä lhäkhila.

₂₁“Wet Sedequías, Judá laka rey, lhäy'e häp leniyatfwas, oyachajiyela letayhfwas tä t'uhläk ilänhen. Wok oyok, oyachajiyela häp Babilonia laka sip'älis tä nech'e tä ileyej tä inu amehen. ₂₂Ot'änhiyela lhamel häpkhilek yachajo tä tatayhlahlä häp hupuyna, wet inuhiyela, isohla wet iwunhihomchela pajla'tha nofw. Wet iyhäj hupuy tä ihi Judá oyenla häpeya ts'anis, wet ihichet'ala tefwaji hin'o chik imälhehihila. Olham tä Awukn'o olhämet täjtso.”