Jer 36

₁Tä ihi cuatro nekchämis tä Judá lheley laka rey Joaquim, Josías lhäs, ihi leniyatyaj, Lhawuk tahuyej häp Jeremías wet yok:

₂–Chuma n'olesaynekhi tä õ'käfwelche, wet lesayen nilhokej olhämtes tä pajche ofwel amho tä ottayhlä Israel lhayis lhäy'e Judá lheley, wet lhäy'e nilhokej häp wichi tä ihiche honhatil iyhäj. Wet is chik tälhe ifwalaste oyämlhi amho tä Josías ihi leniyatyaj wet pajla'tha nichäte ifwalasna tä lelesayen. ₃Chejiphäla wet nilhokej häp Judá lheley tä ilechehen lakeyis tä matche tä ni'isachehen tä iti lhamejen, chik lhamel ihanej tä ochenhiyela lhamel lewit'äyhyajay. Tsi chik lhamel ilechehen lakeyis tä ni'isachehen tä iwoye, lhäy'e lech'isukyajay, wet otäyhthiyeja tä oyen tesayej lhamel.

₄Wet Jeremías t'äne häp Baruc, Nerías lhäs, wet ifwenho nilhokej lhämtes tä Lhawuk iwoyeje p'ante. Wet häp tä Baruc ilesayen, itihi n'olesaynekhi tä õ'käfwelche. ₅Tä wak'alh, wet Jeremías yämeje Baruc wet yok:

–Lhek tetshan häp m'ak tä in'oyej. Nemhit okalhi chik ohoye Lhawuk Lew'et, tsi häp tä õ'näyej n'oho. ₆Is chik am tä lehoye Lhawuk Lewukwe, tshupyene ifwala tä wichi lhaichuyhathen. Wet is chik lhahyenho lhamel häp Lhawuk lhämtes tä lelesayen tä olham oyen lhämeta, häpkhilek lhamel iläte, lhäy'e wichi iyhäj tä nämhen tä tälhe lew'etes tä ihi Judá. ₇Chejiphäla wet lhamel lhaip'altsene Lhawuk wet ilechehen lakeyis tä ni'isachehen tä iti lhamejen. Tsi häp tä matche tä wuj Lhawuk lewäk lhäy'e häp laka'tshayaj tä äytajchey tä t'uhläk itiyej lhamel.

₈Wet Baruc iwoye nilhokej m'ak tä profeta Jeremías ne'tek iwoye. ₉Häp nekchäm tä cinco tä rey Joaquim niyatej Judá, wet häp iwel'a tä nueve, õne'tek wichi lhaichuyhathen tä ihi tä Lhawuk tatache. Wet nilhokej häp Jerusalén lheley tä lhaichuyhathen, lhäy'e nilhokej wichi tä tälhe lew'etes tä ihi Judá tä ihoye Jerusalén. ₁₀Wet Baruc yahyenho lhamel häp Lhawuk lhämet tä ihi lehi tä lham ilesayen tä profeta Jeremías yen lhämeta. Tä Baruc iyahyen, ihi t'at Lhawuk Lewukwech'o tä Gemarías lew'et, häp n'olesaynekwo Safán lhäs. Häp lech'otso ihi t'at Lhawuk Lewukwe ka'alho tä tumphä, wet ihi lepe tä nech'ayek.

₁₁Wet Micaías, Gemarías lhäs tä Safán lecheyäs, tä iläte Lhawuk lhämet tä Baruc yahyen tä ihi lehi, ₁₂wet yik tä ihoye rey lewukwe lech'o elh tä n'olesaynekwo lew'et. Tsi häp tä nilhokej rey leniyatfwas tä lhaihutwek tä ichufwi: Elisama tä n'olesaynekwo, lhäy'e Delaías, Semaías lhäs, lhäy'e häp Elnatán, Acbor lhäs, lhäy'e Gemarías, Safán lhäs, lhäy'e Sedequías, Hananías lhäs, wet lhäy'e häp iyhäj niyatey. ₁₃Wet Micaías ifwenho lhamel nilhokej häp n'olhämtes tä iläte tä ihi lehi tä Baruc yahyenho wichi. ₁₄Wet niyateytso, tä iläte lhamel ichen häp Jehudí tä Netanías lhäs tä Selemías cheyäs tä lajcha Cusi. Wet lhamel yok:

–Is chik Baruc ihän kana n'olesaynekhi tä yahyenho wichi.

Wet Baruc iwoye, tachuma n'olesaynekhi wet ichäj tä ihoye lhamel. ₁₅Tä nichäte, wet lhamel yok:

–Tayphä. Is chik lhahyen n'ohohen n'olhämtes tä ihi lehi.

Wet Baruc iwoye, yahyenho lhamel n'olhämtes tä ihi lehi. ₁₆Wet tä lhamel iläte, nowache. Wet nech'e lhatkayahnhanej wet yok:

–Is chik nilhokej n'olhämtesna n'afwenho häp rey.

₁₇Wet nech'e lhamel tay'ätshane Baruc wet yok:

–Lhek fwel n'ohohen m'ak tä te n'aji tä lelesayen n'olhämtesna.

₁₈Wet Baruc nichulho lhamel wet yok:

–Profeta Jeremías tä yämejlhi häp Lhawuk lhämtesna wet häp tä olesayen, otihi n'olesaynekhina.

₁₉Wet häp tä nech'e lhamel yämeje Baruc wet yok:

–Is chik amel lhekhen, am lhäy'e Jeremías. Ukwe honhat lhip chik wichi nhanayej ihi chik amel lhewhi.

₂₀Wet niyateytso lhamel hin'äychufwi n'olesaynekhitso häp Elisama tä n'olesaynekwo lewukwe. Wet häp tä nech'e lhamel yikhen tä ihoye häp rey, wet ifwenho nilhokej n'olhämtes tä ihi lehi tä lhamel iläte tä õyahyen. ₂₁Wet tä rey iläte n'olhämtestso, wet nech'e ichene Jehudí tä ne'tek t'ukwe n'olesaynekhi tä ichufwi häp Elisama tä n'olesaynekwo lewukwe. Wet tä näm, nech'e yahyenho häp rey lhäy'e lech'otfwas tä leniyatfwas tä iwhäye. ₂₂Wet tä häpe p'ante iwel'a tä nueve wet wuj tä nitechäjche, wet rey tatayho t'at häp fwiyhol tä lak'e tä ihi lehi tä ichufwi lewukwech'o tä yenpej lew'eta tä fwiy'etil. ₂₃Wet tä nofwpej n'olhämtes tä Jehudí yahyen tä ihi lehi, wet rey tachuma lefwajnhat wet yisetpej, ithatho itäj. Häp tä iwoynejatso pajtha nofw. ₂₄Wet rey lhäy'e nilhokej häp lech'otfwas tä leniyatfwas, lhamel yenhit'a tichunhayaja n'olhämtestso, tek nowache. ₂₅Wet Elnatán lhäy'e Delaías, lhäy'e häp Gemarías, lhamel lhaip'altsene rey tä isit'a chik hip'o häp n'olesaynekhitso, mat tach'ahuhiyet'a lhamel. ₂₆Wet rey nech'e t'äne häp Jerameel, niyat tä rey lhäs, lhäy'e Seraías tä Azriel lhäs, wet lhäy'e häp Selemías tä Abdeel lhäs, häpkhilek lhamel t'ukwe Baruc tä ilesayen n'olhämtestso tä ihi lehi, lhäy'e häp profeta Jeremías. Mat lhamel nilhokhiyet'a, tsi Lhawuk tä iskathen.

₂₇Tä tajyäme tä rey hip'o häp n'olesaynekhi tä Baruc itihi Lhawuk lhämtes tä Jeremías yen lhämeta, wet häp tä Lhawuk yachajo tä tahuyej Jeremías wet yok:

₂₈–Chuma n'olesaynekhi elh wet lesayen nilhokej olhämtesnaj ihi lehi tä Judá laka rey Joaquim hip'o. ₂₉Wet is chik lefwenho Joaquim wet lhok, “Häp täja häp Lhawuk lhämet tä ne'tek ofwel amho tä yok, Am lep'o naji n'olhämet lehi wet lechuwete Jeremías tä lhok, ¿Chipte tä letihi lehi häp ämet tä yäme tä Babilonia laka niyat nämla wet iwasthihila honhatna wet yämla nofwej häp wichi tä ihi, lhäy'e itshätäy?

₃₀“Häp tä tamenej tä olham tä ohäpe Awuk Dios oyok, Joaquim, Judá laka rey, ihichet'ala äs chik häpe chik ihi n'oniyatyajw'ette David ihi. Wet hap'itsek ihihila nahayofw imälhewek ifwala, wet ihihila fwiy'et chik honatsi. ₃₁Oaitasnhila'pe m'ak tä ni'isa tä lewoye, lhäy'e ales, lhäy'e häp hach'otfwas tä aniyatfwas, otasnhila'pe lhamel häp lakeyis tä ni'isachehen tä iwoye. Wet ochenla amehen awit'äyhyajay tä pajche owo siläta amejen. Wet Jerusalén lheley äpte ochenhiyela lewit'äyhyaj, lhäy'e wichi tä ihi Judá, häp tä lhamel nitch'ahuyaye olhämtes.”

₃₂Wet Jeremías tachuma elh n'olesaynekhi wet hiw'enho Baruc. Wet ilesayen nilhokej häp m'ak tä Jeremías yen lhämeta, wok oyok, nilhokej n'olhämtes tä ihi naji häp elh tä rey Joaquim hip'o. Wet äpte Jeremías y'isej at iyhäj lhämtes tä tet iwoye häp m'ak tä õ'lesayen naji tä ihi lehi.