Rey Sedequías t'alhe Jeremías chik y'alhyene Lhawuk häp wichi tä ihi Jerusalén
1Nabucodonosor, Babilonia laka rey, tachuma häp Sedequías, Josías lhäs, wet yen häpeya Judá laka rey, icheyjänhat lew'etho häp Jeconías, Joaquim lhäs. 2Wet Sedequías lhäy'e lech'otfwas tä leniyatfwas, wet lhäy'e wichi, lhamel iwohiyet'a Lhawuk lhämet tä lakawo profeta Jeremías ifwenho lhamel.
3Tä paj wet rey Sedequías ichen Jucal, Selemías lhäs, lhäy'e häp sacerdote Sofonías, Maasías lhäs, wet yok:
–Is chik amel let'ukwe profeta Jeremías. Wet chik lew'en, alhe chik y'alhyen n'amehen häp Lhawuk Dios.
4Tsi häp tä kamaj õ'thathihot'a n'op'onthi Jeremías, wet isakanej t'at tä ilunche wichi.
5Wet nech'e nekhen p'ante häp Egipto kaniyat kasip'älis tä tälhe laka honhat, häpkhilek tatayhlä Babilonio lhayis tä inuye Jerusalén. Wet tä Babilonio lhayis ihanlä lhamel, wet ileyej tä inuye Jerusalén wet yikhen. 6Wet Lhawuk tahuyej profeta Jeremías wet yok:
7–Fwenho olhämet häp wichi tä Judá laka rey ichenmat ame tä t'uhläk ihanej häp m'ak tä ihichela. Is chik lhamel ifwenho rey tä sip'älis tä nifwotaj tä tälhe Egipto tä pajche nekhen tä fwetaj tach'ote, lhamel ileche tä nekhen, yäpilchehen, yäple t'at häp Egipto. 8Wet Babilonio lhayis yachajo tä nämhihena wet inuhiyela Jerusalén, wet ikalhihila wet iwunhihola, pajla'tha nofw. 9Olham tä Awukn'o oyok, “Yej t'akan amejen. Isit'a chik amel lhok, Yikhen Babilonio lhayis. Tsi häp tä lhamel tapinla amehen. 10Tejlak nofwej häp Babilonio lhayis kasip'älis chik amel lelänhen tä tatay ahilähen, tha iyhäjlak imälhehi tä n'ilahen tä lelätshay ihi, häp tä neyhichephäla tä ihi honhat tä lhamel lhaihuthiwek, wet iwunhihola Jerusalén pajla'tha nofw.”
Õhp'ohi Jeremías
11Babilonio lhayis kasip'älis yikch'oye ayej Jerusalén, tsi häp tä lhamel ihanlä Egipto kaniyat kasip'älis tä neke lhamel häpkhilek tatayhlä. 12Wet Jeremías fwetaj yikch'oye Jerusalén wet fwetaj ihoye häp Benjamín lhayis kahonhat, häpkhilek ihi t'at honhat lhiphaj tä õhw'enhatej p'ante tä õhw'enhomche honhat lhipeyhas häp lew'etfwas. 13Wet tä nichäte lepe tä tatayhlä Benjamín lhayis kahonhat, wet hiw'en hin'o tä lhey Irías, Selemías lhäs tä lechäti Hananías. Irías häpe Judá lhele tä niyatej sip'älis tä t'uye lepetso. Wet nech'e itsoklhi Jeremías wet yok:
–¡Lhek tä lehoye häp Babilonio lhayis!
14Jeremías nichulho wet yok:
–Mathichet'a ämet. Ohohiyet'a Babilonio lhayis.
Mat Irías tach'ahuhiyet'a, itsoklhi Jeremías wet ihäne rey leniyatfwas. 15Wet lhamelna wuj tä nichuwete Jeremías wet ne'tek õ'päjlhi. Wet õhp'ohi, õ'tichufwi häp Jonatán tä n'olesaynekwo lewukwe, tsi häp tä õyen n'op'onthiya. 16Wet wujpey ifwalas tä Jeremías ihi t'at häp huptso lech'o elh tä ihi honhat.
17Wet tä ifwala elh p'ante, wet rey Sedequías ne'tek õ'häne Jeremías. Wet tä Jeremías nichäte lew'et, wet rey weskatej tä tay'ätshane wet yok:
–¿Hä iche Lhawuk lhämet chik häpe tä ifwel amho?
Wet Jeremías nichulho wet yok:
–Matche, iche. Aniyatyaj nofwila, tsi Babilonia laka rey ikalhla amhi.
18Wet nech'e Jeremías lham tä tay'ätshane rey Sedequías wet yok:
–Oty'ätshan ame, ¿hä iche olham okey tä ni'isa tä ottayej ahilä, wok ottayhlä aniyatfwas wok wichi, wet häp tä tamenej tä amel lethat n'oho n'op'onthi? 19¿Wet chi tä iche amel aka profetas tä ifwel amhohen tä yok, “Nämhit'ala Babilonia laka rey, tek tatayhla ahilähen wet tek tatayhlahlä honhatna”? 20Wet athana ch'ahu n'oye tä olhaip'altsen ame tä ahäpe oka rey. Is chik lewoye m'ak tä ot'alhej ame, yej lhachaj n'oye Jonatán tä n'olesaynekwo lewukwe häpkhilek n'am t'ilchufwi.
21Wet rey Sedequías iwoye Jeremías lhämet, wet ne'tek õt'uye t'at tä ihi sip'älisw'et ka'alho. Wet t'uhläk õhw'enho nilhokej ifwalas häp pan tä panwos ifwelwethä tä kamaj iche pan tä ihi hupuy. Wet häp tä tetso, Jeremías ihi t'at häp sip'älisw'et ka'alho.
