Jer 40

₁Lhawuk tahuyej Jeremías tä tajyäme tä sip'älis kaniyat tä lhey Nebuzaradán ilanhi tä ihi Ramá. Tsi Jeremías tan'isejte häp wichi tä tälhe Jerusalén lhay'e häp Judá lheley tä õyen kwenkaya wet õyäytejen chinhas, wet õ'soyej laka honhat häpkhilek õ'häne honhat tä Babilonia tä kalew'eta.

₂Wet häp sip'älis kaniyattso tachuma Jeremías wet isoyej tä iyej wichi iyhäj tä õyen kwenkaya. Wet tahuyej tä yok:

–Awuk Dios pajche p'ante yäme tä hiw'enhihola lewit'äyhyaj häp honhatna. ₃Wet häp tä imatitche ifwalana häp lhämet p'ante iwoye, häp tä amel letatayejlä hach'isukyajay tä lewoyaye wet tek letach'ahuyaye häp lham lhämtes tä ifwel amhohen. Häp tä tamenej tä hiw'en amhohen awit'äyhyajna. ₄Wet athana olanche chinhas tä õyäytejen am akweyey. Wet chik lehuminche chik lenek n'okwe tä oyäple Babilonia, is t'at, tsi olham ot'uhla ame. Mat chik kahuminache chik lenek n'okwe, is t'at, alewuk t'at, mälhehchä kana. Wet tetshan t'at honhatna tä imälhewek wet tshupyene lhip chik häpe tä lehuminche chik lhen haw'eta. ₅Wet chik akalelhäj tä lemälhehchä, kaneka n'okwe, is chik lhäple häp Gedalías, Ahicam lhäs tä lechäti Safán. Tsi häp tä Babilonia laka rey yennaj niyatayej Judá lheley laka honhates. Wet is chik lhewhäye häp lham häpkhilek lhewej t'at wichi. Mat mälhyej m'ak tä ofwel amho, am t'at tä letshupyene lhip tä lehuminche chik lhen haw'eta.

Wet nech'e sip'älis kaniyat iwo t'awayhata Jeremías, lhäy'e n'olhäk tä hiw'enho, wet nech'e iwo tsilhekayej. ₆Wet Jeremías yik, ihoye Gedalías tä ihi Mispa, itwhäye, iyej t'at wichi iyhäj tä imälhehi p'ante honhattso.

₇Wet iche Judá lheley kasip'älis lhäy'e laka niyatey tä kamaj ichehen'attso tä ilunhen t'at. Wet lhamel ihanch'oye tä Babilonia laka rey itshupyene Gedalías wet yen niyatayej honhat tä Judá, wet y'uhyene hin'ol, atsinhay, lhäy'e häp n'atfwas, tä häpe wichi tä matche tä p'elitses tä ihi honhat, häp wichi tä õknhänaye Babilonia. ₈Wet sip'älis kaniyateytso lhamel ihoye Gedalías tä ihi Mispa. Wet lhamel lheyis Ismael tä Netanías lhäs, lhäy'e häp Johanán wet Jonatán tä Karea leles, lhäy'e häp Seraías tä Tanhumet lhäs, lhäy'e Efay tä honhat lhip tä lhey Nichätchä lhele, lhäy'e häp Jezanías tä hin'o tä lew'et Maacat. Lhamel t'at tä ihoye Mispa, lhäy'e laka sip'älis. ₉Wet Gedalías iwoyeje lhämet tä ikhajyenej lhamel wet yok:

–Yej nowaye Babilonio lhayis, en at awuhuya lhamel. Is chik lhen at haw'eta honhatna wet ch'otaye Babilonia laka rey, häpkhilek aisen t'at. ₁₀Tsi tä olham tä oihi Mispa, wet chik nämhen Babilonio lhayis tä iho n'amehen, wet olham tä opäynhila amehen häpkhilek nitäfwel amejen. Wet is chik lhen achumeta tä lhen akapucheya hat'es, lhäy'e yachuyaj lhay, wet lhäy'e aceite. Wet enay haw'etesa hupuy tä lhewhiche athana.

₁₁Wet äpte nilhokej Judío lhayis tä ihi häp Moab, lhäy'e tä ihi Amón wet Edom, lhäy'e tä ihiche iyhäj honhatil, lhamel ihanej tä Babilonia laka rey iwahnej t'at chik iyhäjfwas Judío lhayis nekach'oye laka honhat wet yen laka niyata häp Gedalías. ₁₂Tä lhamel ihanej täjtso, wet nilhokej lhamel yikch'oye honhatilnaj õyokosehen, wet yäple honhat tä Judá wet ihoye Gedalías tä ihi Mispa. Tä nichäte, wet nech'e lhamel yen lechumeta tä yen lakapucheya hat'es wet lhäy'e häp yachuyaj lhay tä wuj.

₁₃Johanán, Karea lhäs, lhäy'e nilhokej häp sip'älis tä ichehen'attso, lhamel laka niyatey ihoye Gedalías tä ihi Mispa. ₁₄Wet lhamel tahuyej tä yok:

–¿Hä lehanhiyejt'a tä Ba'alis, Amón lhayis laka rey, ichen ame häp Ismael, Netanías lhäs, häpkhilek ailän?

Mat Gedalías ikachu, tek imatitche. ₁₅Wet Johanán weskatej tä yämhoplhi Gedalías wet yok:

–Ch'anlha n'oye chik oyike Ismael wet olän, wet ihichet'ala elh chik ihanej. Tsi isit'ak ailän wet nilhokhiyeja Judío lhayis tä imälhehi tä lhaihut ame nech'e ifwtsatla'pehentso wet nofwiyeja t'at tä y'inhen.

₁₆Mat Gedalías nichulho Johanán wet yok:

–Teji, yej län Ismael, tsi mathichet'a häp m'ak tä lhämeje.