Jer 43

₁Tä Jeremías ileyej tä ifwenho wichi häp Lhawuk Dios lhämet tä t'uhläk wichi ihanej, ₂Azarías tä Osaías lhäs, lhäy'e Johanán tä Karea lhäs, lhäy'e häp hin'ol iyhäj tä lhaichäjwethä, lhamel tahuyhlä Jeremías wet yok:

–¡Mathichet'a m'ak tä lefwel n'ohohen! Lhawuk Dios lhämethit'a, tek n'äyej n'ohohen chik ohoye Egipto tä olhamel ot'uhläk oyen w'eta. ₃Baruc tä Nerías lhäs häp tä tamenej tä letatay n'ohlähen, t'uhläk Babilonio lhayis itsok n'owethähen wet ilän n'ohen, wok ihänla n'oyehen Babilonia, häp honhat tä ka'ow'eta.

₄Häp tä mälhyej p'antetso, wet Johanán lhäy'e nilhokej sip'älis kaniyatey, lhäy'e nilhokej häp wichi, lhamel iwohiyet'a Lhawuk lhämet tä ne'tek nekach'oye honhat tä Judá. ₅Wet Johanán lhäy'e sip'älis kaniyateytso lhamel ihutwek nilhokej iyhäjfwas Judá lheley tä imälhehi tä häpe wichi p'ante ifwtsatpehen iyhäj honhatil tä tapile p'ante honhat tä Judá wet yachajo tä yen lew'eta. ₆Äpte ihutwek hin'ol lhäy'e atsinhay, lhäy'e n'atfwas, lhäy'e rey leles tsinhay, tä häpe wichi p'ante sip'älis kaniyat Nebuzaradán yen niyatayej Gedalías. Wet Jeremías lhäy'e Baruc lhamel iyej häp wichitso. ₇Wet nilhokej lhamel ihoye Egipto, iwohiyet'a Lhawuk lhämet tä n'äyejo chik ihoye honhattso. Wet lhamel nichätho hupuy tä lhey Tafnes.

₈Wet tä lhamel ihi Tafnes, Lhawuk tahuyej Jeremías wet yok:

₉–Chuma tuntey tä wustas wet jänlä, tihi honhat tä õhp'oyejpe ladrillos tä ihi häp Egipto kaniyat lewukwepe. Wet is chik nilhokej wichi tä Judá lheley hiw'enej tä lep'oyejpe iyhät. ₁₀Wet fwenho lhamel, ok, “Häp Lhawuk tä laj letumfwaya tä häpe Israel laka Dios yok, Olham ot'änhiyela okawo Babilonia laka rey Nabucodonosor, wet oyenhilhila lewukwe häpkhilek oti'pe tuntey tä õ'tihi honhatna, wet häpkhilek leniyatyajw'et itpe tunteyna. ₁₁Wet lham nämla wet iwasthihila honhat tä Egipto. Wet wichi tä y'inhiyejena äytes lhayis, äytesla t'at chik ilänhen. Wet iyhäj tä õyenla kwenkaya, õ'hänhiyela t'at honhat tä kalew'eta. Wet iyhäj tä õ'länhiyejena n'oka'tshayajchal, n'oka'tshayajchalla t'at chik ilänhen. ₁₂Wet Nabucodonosor iwunhihomchela Egipto lheley len'okhayajw'etes, wet hip'ohihena iyhäj lecheyälis, wet iyhäj wet ihänhiyela laka honhat. Ilejla honhat tä Egipto, tehlat iwoye tson'ataswo tä ilej lew'uy tä ilänhen lha tä ihi. Wet chik ilehiyeja m'ak tä iwoye, wet iwohlat letamseka tä yik, tsi ikalhi letayhfwas. ₁₃Wet iwasthihichela n'ocheyälis lepeykas tä tuntey tä ihi hupuy tä lhey Fwala Wukwe tä ihi honhat tä Egipto. Wet iwunhihomchela häp Egipto lheley len'okhayajw'etes tä lhamel ihoye tä n'okwiyej lecheyälis. Iwunhihomchela lhamel pajla'tha nofw.”