Lhawuk lhämet tä äytajche tä ichene wichi tä ilethane Egipto
1Lhawuk tahuyej Jeremías, tsi t'uhläk Jeremías ifwenho lhämet häp Judío lhayis tä ilethane honhat tä Egipto, häp lhamel tä ihiche hupuy tä lhey Migdol, Tafnes lhäy'e Menfis, lhäy'e honhates tä tumej tapinhiye. Wet lhämet yok:
2–Olham tä Awukn'o tä laj otumfwaya tä ohäpe Israel laka Dios, oyok, “Amel lew'en m'ak tä owoyeje Jerusalén tä ochene lewit'äyhyaj tä wuj, lhäy'e hupuy iyhäj tä ihi Judá. Wet pajtha ifwalasna tä wasiche, wet nemhit iche wichi chik yen lew'etesa, 3tsi lhamel iwoye m'ak tä wuj tä ni'isa, häp tä iwäkwyhayen n'oyej tä n'okwiyej dios lhayis iyhäj, wet iwun incienso tä iwujyenej n'ocheyälistso tä häpe dios lhayis tä lhamel nitäfwelayej. Tej tä amel, tha letäfwenhiyejt'a, nits'ilakhiyat achätilis chik nitäfwelej. 4Wet oy'enhiyejt'a tä ochen amehen häp okawos tä oka profetas tä ifwelpej amhohen olhämtes tä oyok, ¡Leyej tä lewoyaye akeyistso tä matche tä oy'ulhan!
5“Mat amel lewohiyet'a olhämet wet matche tä katach'ahuya n'oye. Lelehichet'a akeyis wet letujlhayache t'at tä lewun incienso tä lewujyenej dios lhayis iyhäj. 6Häp tä tamenej tä owäk tä äytajchey tet iwoye itäj tä lhailhänhi wet iwunejente hupuy tä ihi Judá lhäy'e Jerusalén. Wet pajtha nämena tä wasiche, nemhit wichi ihiche.
7“Häp tä mälhyejtso, olham tä Awukn'o tä laj otumfwaya tä ohäpe Israel laka Dios, oyok, ¿Chipte tä amel leton amehen owäk tä häpe häp awit'äyhyaj tä wuj? ¿Wet chipte tä let'uhläk y'inhen hin'ol lhäy'e atsinhay, lhäy'e n'atfwas lhäy'e häp iyhäj tä nech'e ichehen, häpkhilek lenofwej tä ahäpe Judío lhayis tä w'et imälhefwasi? 8¿Chipte tä lewäkwyhayen n'oyej akeyis tä len'okwiyej dios lhayis iyhäj wet lewun incienso tä lewujyenej n'ocheyälis tä ihi honhatna tä Egipto tä lhennaj haw'eta? Tsi tä lewoynejatso han'okhayaj, wet nech'e amel t'at tä letamen amejen tä lenofwiyeja. Wichi tä ihiche honhatil iyhäj ailäkwihilawethä, wet elh chik häpe chik t'uhläk elh lewit'äyhyaj ihi, yohlak, Is chik atet iwoye wichi tä ihoye Egipto tä fwetaj ilethane. 9¿Hä lep'ethatlä m'ak tä ni'isa tä amel lewoyepmhaji, achätilis, aka reyes lhäy'e lech'efwas, lhäy'e amel hach'efwas, tä ihi honhat tä Judá lhäy'e häp hupuy tä Jerusalén? 10Wet kamaj chik amel let'ayhtejchehchä akeyistso, wet tek lenoway n'oye wet lewohiyet'a olhämtes lhäy'e ochufwenyajay tä ow'enhohte achätilis wet äp ow'ente amhohen.
11“Häp tä tamenej tä olham tä Awukn'o tä laj otumfwaya tä ohäpe Israel laka Dios, ottayhla ahilähen, ochenla amehen awit'äyhyaj, yämlek nofwej amel tä ahäpehen Judá lhayis. 12Amel lhohtekwe, Olhamel onitäkwit'a tä omälhehi, olhamel ohohiyela honhat tä Egipto wet oyenlat ow'eta. Mat olham tä Awukn'o ottayhla ahilähen häpkhilek lenofwej tä lheyayhi honhattso. Amel tä han'ohyajay ihiche lhäy'e iyhäj tä laj han'ohyaja let'inhihena chik lhehi n'oka'tshayaj, wolak nehläs tä ailänhen. Matche, n'oka'tshayajchal wok nehläs tä ailänhihena. Wet elhlat chik häpe tä i'pe honhat chik t'uhläk elh lewit'äyhyaj ihi, yohlak, Is chik atet iwoye wichi tä ihoye Egipto tä fwetaj ilethane. Wet matche tä tanhoch'ayhla awit'äyhyaj wet wichi ayenlat leläkwika. 13Olham otasnhila häp wichi tä ihi Egipto, mälhyej täjte otasin wichi tä ihi Jerusalén wet ochene n'oka'tshayaj lhäy'e nehläs wet lhäy'e äytes. 14Wet amel tä ahäpehen Judá lhayis iyhäjfwas tä nintäkwa tä imälhehi tä yen lew'eta Egipto, ihichet'ala elh amel chik ihanhiyeja iwoyneja chik lhaifwayhtej lewit'äyhyaj, wet ihichet'ala elh chik häpe chik n'ila. Wet tejlak let'uhläk lhäple aka honhat tä Judá häpkhilek lhen haw'eta, mat tek lhäpnhiyela. Tajlhamhiyelat iyhäjfwas amel chik yäpnhiyela aka honhattso.”
Wichi yen w'et m'ayeka Lhawuk lhämet
15Wujpey Judío lhayis tä lhaihutchewek tä iläte Jeremías tä ifwenho lhamel häp Lhawuk lhämettso. Iche hin'ol tä ihanej tä lech'efwas iwun incienso tä iwujyenej dios lhayis iyhäj. Äpte iche atsinhay, wet lhäy'e häp wichi tä yen lew'eta Egipto lhip tä tumej tapinhiye. Wet nilhokej häp hin'ol tä nichulho Jeremías wet yok:
16–Olhamel otch'ahuhiyet'a Lhawuk lhämetna tä lefwel n'ohohen. 17Mat olhamel owohiyela t'at m'ak tä ohuminche, mälhyej tä pajche olhamel olhämet. Olhamel olehiyejt'ala tä owun incienso tä owujyenej olhamel oka dios tsinha tä lhey Pule Kaniyat Tsinha, wet otujlhahichela tä oyen t'awayhata hat'es, mälhyej tä olhamel lhäy'e ochätilis, oka reyes lhäy'e leniyatfwas, iwoyepmhaji tä ihi Jerusalén lhäy'e iyhäj hupuy tä ihi Judá. Häp tä tamenej tä olhamel otamsekis ihihte, wuj olhäk tä ow'en, wet newache m'ak tä ni'isa chik in'oyejen. 18Mat tälhe t'at ifwala tä olhamel oleyej tä owun incienso tä owujyenej Pule Kaniyat Tsinha, lhäy'e tä oleyej tä oyen t'awayhata hat'es, nemhit olhamel ow'en m'ak tä owatlä, wet nech'e n'oka'tshayaj lhäy'e nehläs tä ilän n'ohen.
19Wet atsinhay y'isej elh häp lhämet tä iwoye wet yok:
–Tä olhamel oyenlhipej pan tä oti'pe Pule Kaniyat Tsinha lepeyak, lhäy'e tä owujyenej incienso tä owun, lhäy'e tä oyen t'awayhata hat'es, wet och'efwas akäjejlhi m'ak tä olhamel owoye.
Lhawuk yäme tä lewit'äyhyaj ihihila wichi tä nileyayej tä n'okwiyej dios lhayis iyhäj
20Wet Jeremías nichulho nilhokej wichi, hin'ol lhäy'e atsinhay, wet yok:
21–¿Hä amel lefwetaj Lhawuk nhanayej ihi häp m'ak tä lewoyayehte? ¿Wok elat lefwetaj hip'ethatlä akeyis tä nilhokej häp amel tä lewoye, amel wet achätilis, lhäy'e aka reyes, lhäy'e aka niyatey iyhäj, wet lhäy'e nilhokej häp wichi, tä amel lewun incienso tä lewujyenej iyhäj dios lhayis tä lheyayhihte Jerusalén lhäy'e iyhäj hupuy tä ihi Judá? 22Häp Lhawuk ikalhihit'a chik iteläytej amel achumyajay tä matche tä ni'isachehen tä lewoyaye tä wuj tä lham nhuminache. Häp tä tamenej tä aka honhat tä matche tä haw'et, pajtha ifwalasna tä wasi wet nemhit iche wichi chik yen lew'eta. Wet elh chik häpe chik t'uhläk lewit'äyhyaj iyej honhat elh, yok, “Is chik tet iwoye honhat tä Judá tä matche tä lewit'äyhyaj ihi.” 23Tsi häp tä amel lewun incienso tä lewujyenej dios lhayis iyhäj, wet matche tä letatayejlä hach'isukyajay häp Lhawuk, wet lewohiyet'a lhämtes lhäy'e lechufwenyajay tä ne'tek lewoye. Häp tä tamenej tä awit'äyhyaj i'amejen.
24Wet Jeremías y'isej elh lhämet tä tahuyej nilhokej wichi lhäy'e nilhokej häp atsinhay wet yok:
–Nilhokej häp amel tä ahäpehen Judá lheley tä lhehi honhat tä Egipto, ch'ahuyaye häp Lhawuk lhämet tä ne'tek ofwel amhohen. 25Häp Lhawuk tä laj letumfwaya tä Israel laka Dios, lhämet yok, “Amel tä ahin'ol, lhäy'e hach'efwas, amel len'älit tä lhäm at matche ämtes tä lewoyaye tä lhok, Olhamel matche tä on'okwihiyeja häp Pule Kaniyat Tsinha. Olhamel owunla incienso wet oyenla t'awayhata hat'es.
“¡Is t'at, n'okwiyej t'at, wujyen t'at! 26Mat ch'ahuye m'ak tä olham tä Awukn'o tä ofwel amhohen nilhokej häp amel tä ahäpehen Judá lheley tä lhen haw'eta honhat tä Egipto. Ot'unhatche olhämet, häp tä isej olhey tä lewujyaj ihi, oyok, Nemhit ihichela häp Judá lhele chik häpe tä ihi imälhewek honhat tä Egipto chik iwohla olheya tä ohäpe Lewuk Dios tä n'ilataj. 27Wet olham tä ot'uhiyela lhamel, mat häpkhit'a m'ak tä is chik tamenej tä ot'uye. Mat häp tä ochenhiyela lhamel häp lewit'äyhyaj, wet nilhokej Judá lheley tä ihi Egipto tä nofwiyeja t'at. Nifwotas tä inuhiyela häp tä ilänhihena lhamel, wet iyhäj lhamel y'inhiyejena t'at häp nehläs. 28Nitäkwit'ala lhamel chik tefwayej n'oka'tshayaj wet yikhilach'oye Egipto wet yäpnhiyela laka honhat Judá. Wet nilhokhiyeja häp Judá lheley tä ilethanehte Egipto wet yen lew'eta, wet nech'e häp tä lhamel ihanhiyeja chik lhaimatitche lhamel lhämtes, wok häpkhila olhämtes tä ofwenho lhamel chik lhaimatitchehen.
29“Olham tä Awukn'o opäynhila amehen otetnek häpkhilek lehanayej tä oyäm matche olhämet tä owoyej amehen tä oyok, Oaitasnhihena tä lheyayhi honhatna wet ochenla amehen awit'äyhyaj. 30Häp täja otetnek: Häp Egipto kaniyat tä lhey Hofra oyachajiyela letayhfwas tä t'ukwe chik ilän, mälhhiyejat iwoye häp Sedequías, Judá laka rey, täjte oyachaje letayhfwa Nabucodonosor tä Babilonia laka rey tä lham t'ukwe chik ilän.”
