Lhawuk lhämet tä itiyej Amón lhayis
1Häp täja häp Lhawuk lhämet tä yämeje häp Amón lhayis, wet yok:
“¿Chip ihi Israel lhayis leles?
¿Chi tä iche lhamel
tä lhayen lewuka letetsel laka honhat?
¿Chipte tä Amón lhayis laka dios Milcom
lhayen lewuka honhat tä lewuhuy
Israel lhayis iyhäj tä tälhe letes Gad?
¿Chipte tä wichi tä n'okwiyej Milcom
yen lew'eta honhattso?
2“Häp tä tamenej tä olham
tä ohäpe Dios tä Israel Lewuk oyok,
Chik nichäte lewhäy, wet nilhokej wichi
iläthiyela lepak häp n'oka'tshayaj
chik otihiyeja häp Hup Lhokwetaj
tä Amón lhayis kahupuy tä lhamya.
Wet wasihila, wet nilhokej hupuy
tä atott'ahomche tä y'ohihomchela.
Wet häp tä nech'e Israel lhayis
isakanhiyeja laka honhatte,
isohiyeja iyhäj tä isoyejte lhamel.
Olham tä ohäpe Dios tä Israel Lewuk olhämet täjtso.
3“¡Afwchehchä, amel tä lhehi Hesbón,
tsi häp tä wasi t'at aka honhat!
¡Amel tä a'atsinhay tä haw'et Hup Lhokwetaj,
woyay afwyhayaja!
¡Enay haw'uyisa häp wesaj tä tesalis lew'uyis
tä atetnek amejen tä alhakli ihiche,
wet nhäpäjlhi'pe hat'okwelis!
¡Atech'aynej atsinhay
tä käs länhay tä ilunhen
wet asajwethä!
Tsi häp tä õ'chäj aka dios Milcom,
letayhfwas ihäne honhat tä kalew'eta,
lhäy'e laka sacerdotes,
wet lhäy'e wichi tä len'ohyaj iyeji.
4¿Chipte tä alechäjejwethä
akhajyhayaj tä i'amejen?
Nofw t'at akhajyhayaj.
Ahäpe wichi tä akachuhantses,
let'ekhaye m'ak tä wuj tä lew'en wet lhok,
¿Atsihilak tektshan n'oye chik tatay n'ohlä?
5“Olham tä ohäpe Dios tä laj letumfwaya oyok,
Ochenla amehen m'ak tä aistunla,
tälhiyela nilhokej honhat lhipey.
Aelh tefwajpejni inuhikwela
lhip chik häpe tä inu alhoho,
wet ihichet'ala elh chik ihanej iwoyneja
chik yachajo chik aihutwek.
6Mat chik tajyäme täja,
owohla elha m'ak tä owoyeje Amón lhayis,
nech'e häp m'ak tä isila tä owoyeje.
Olham tä ohäpe Dios tä Israel Lewuk olhämet täjtso.”
Lhawuk lhämet tä itiyej Edom
7Häp täja Lhawuk tä laj letumfwaya lhämet tä yämeje häp Edom, wet yok:
“¿Hä nemhit n'ohanyaj ihi Temán?
¿Hä wichi tä ihan honhatejen
nemhit ihanej chik ichufwenwethä iyhäj?
¿Hä hip'ethatlä m'ak tä pajche lhaichufwenejen?
8¡Amel tä haw'etes Dedán, nukwephä,
kelchetshi, ukwe lhip chik lelethane!
Tsi häp tä otäyhthila wichi tä tälhe letes Esaú,
nichäte t'at lewhäy tä otasnhila.
9Chik amel lelanhi akäs tä ihi alafwey,
kamaj lemälhthi iyhäj.
Wet chik honatsi wet etantses yike
tä t'etanhomche alafwey,
mat tachumat m'ak tä iwatlä wet tek ihämit.
10Mat olham niwohit m'ak chik omälhthihila
tä osoyej Esaú laka wichi.
Wet on'älthila'pe lhamel tä weskathen,
ihanhiyejt'ala lhaiwoynejahen chik lhaiskathen.
Nilhokej leles lhäy'e lepuhfwas
lhäy'e lew'etfwas tä lhamel nofwiyeja t'at.
Wet ihichet'ala elh chik imälhehihila chik yohlak,
11Ch'anlhaye aka chipenhas chik oti lhamej,
lhäy'e aka tesalis, häpkhilek ot'uyehen lhamel.”
12Wet Lhawuk yok:
–Tej tä iche wichi tä nit'uhawetayej chik iyähi n'olhäthi tä owäk tapoyej, tha lhamel iyähi t'at. Wet amel tä aEdom lheley iwohiyet'alak kakatayej n'otasnhayaj, leyähihla n'olhäthitso. 13Wet olham tä ohäpe Dios tä Israel Lewuk, owoye olhämet tä oyämla matche. Wet oyok, nech'e ts'anisla hupuy tä lhey Bosra tsi häp tä õ'wasthihila. Wet elh chik häpe tä i'pe honhat chik t'uhläk elh lewit'äyhyaj ihi, yohlak, “Is chik atet iwoye hupuy tä Bosra tä tatäy t'at.” Wet matche tä tanhoch'ayhla Bosra lewit'äyhyaj, wet wichi yenla leläkwika. Wet iyhäj hupuy tä atott'ahomche äpte wasihichela pajla'tha tiyäj'attsiy.
14Oläte Lhawuk silätyaj.
Lhawuk silätyajwo yik tä ihoye wichi
tä i'pe honhat wet ifwenho tä yok:
“¡Ahutaywek, mähen, wo aka'tshayajayej Edom!
¡Awaklhatayhlä n'oka'tshayaj!”
15-16Wet Lhawuk Dios ifwenho Edom lheley wet yok:
“Amel lekan amejen tä alechäjwethä
häpkhilek wichi wuj tä noway amehen.
Lhen at haw'etesa tachenhas tä atoschephä
lhipey tä hikw'eschehen.
Mat olham oay'ayhthichelahchä,
oayenla häpeya wichi tä lajit lahaya
wet ahäpkhihena t'at wichi tä n'oläkwik.
Tej tä letenay häp istiwintas
tä yäm atoschephä lhupis,
mat olham oyikhila amehen, oaithathichelahchä.
Olham tä ohäpe Dios tä Israel Lewuk olhämet täjtso.
17“Owasthihila Edom häpkhilek wichi itiyej leläkwyhanyaj. Nilhokej lhamel tä inu lhipche inuhthila lhamhohen chik hiw'en lewit'äyhyaj tä wuj tä iyej, wet lhamel yafwuthichehena lepästey. 18Wet tehlat iwoye Sodoma lhäy'e Gomorra täjte otäyhthen, lhäy'e hupuy iyhäj tä iwhäye. Nemla iche wichi chik yenla lew'eta, wet nemla inukwe honhattso chik ilunhihena. Olham tä ohäpe Dios tä Israel Lewuk olhämet täjtso.
19“Olham opajit'ahlä, onämla, otehlat iwoye t'owalhaj tä inuphä tä tälho hon'al tä wusche'pe tä iche tewok Jordán lhipey tä tiyäje honhat tä hup tä w'atshan ihi. Wet oyokwesichephäla Edom lheley, wet oyenla laka niyata hin'o tä olham t'at tä ottshupiye. Tsi ihichet'a hin'o chik w'awulh n'ohi, wet ihichet'a elh chik ihanej iwoyneja chik iti n'oyej lakalelhthayaj, wet ihichet'a tson'ataswo chik ihanej iwoyneja chik tatay n'ohlä. 20Lhek ch'ahuyaye m'ak tä olham tä Israel Lewukn'o owohiyejela Edom, lhäy'e häp m'ak tä owaklhat tä owohiyejela wichi tä ihi Temán. Tej tä leles tä õ'chäjiyela honhat elh tä kalew'eta, lhäy'e häp honhat tä lhamel lew'et tä õ'wasthihila. 21Lepak äytajihla häp Edom chik õ'sakanej, wet nilhokej honhat tä tachetteyhiyejchela chik iläte. Wet Edom lheley t'änlach'oye elh chik tach'ote, wet tej tä atofwey Lewomekchät, tha iläthiyela t'at t'änyajaytso. 22Wet Edom lheley tä lew'et Bosra, lhamel letayhfwas yikhiyela t'at lhamel, tehlat iwoye istiwintas tä hich'enchephä lhafwis wet lhaithatejchä lhamel. Wet ifwalatso nilhokhiyeja hin'ol tä n'oka'tshayajchal tä ihi Edom tä lhamel tachetteyhiyejchehena lenowayhyajay, tehlat iwoye atsinha tä iwo lhäsa.”
Lhawuk lhämet tä itiyej Damasco
23Häp täja häp Lhawuk lhämet tä yämeje Damasco wet yok:
“Häp wichi tä lew'etes Hamat lhäy'e Arpad
wuj tä inuhat lhamhohen tä iläte
m'ak tä ni'isa tä õyäme.
Wet nemhit iwo letamsekisa,
wuj tä lelhakli ihiche,
tsi häp tä matche tä nowayhen.
24Nemhit lakhajyhayaj ihi Damasco lheley,
t'uhläk yikhen, lenowayhyaj tä ikalhi.
Äytajche m'ak tä iyej lhamel, wuj lelhakli,
tet iwoye atsinha tä iwo lhäsa.
25Ifwalas tä pajche Damasco letoyaj ihi
wet wichi tä lew'et wuj tä lakäjyaj ihi.
Mat nech'e häpe m'ak tä n'owomek, nemhit wichi ihi.
26Chik nichäte ifwalatso,
õ'länhihena laka mamses
tä ichehen hupuy kawayhil,
wet nilhokej hin'ol
tä n'oka'tshayajchal tä nofwiyeja.
Olham tä ohäpe Dios tä laj letumfwaya olhämet täjtso.
27Owunhiyeja Damasco lelafwek tä tuntey,
wet itäj ihämthila,
lhäy'e häp rey Ben-hadad laka hupuy
tä hin'ol tä takhajayhen
tä õy'uhyene honhat ihiche.”
Lhawuk lhämet tä itiyej Kedar lhayis lhäy'e wichi tä lew'et Hasor
28Häp täja häp Lhawuk lhämet tä yämeje wichi tä lhey Kedar lhayis, wet lhäy'e häp Hasor laka niyatey, tä pajche rey Nabucodonosor, Babilonia laka niyat, ikalhiche. Wet Lhawuk yok:
“¡Mähen, nuye Kedar!
¡Tifwej wichi tä ihi honhat tä ifwala inuhiphä!
29Soyej lewukwey tä tsänt'ähes,
lhäy'e leläy tson'atas lhäy'e camellos.
Chuma nilhokej m'ak tä hiw'en,
wet änpe lhamel, ok, ¡Tanhoch'aype honhat!
30“Amel tä haw'etes Hasor,
¡nukwephä, kelchetshi,
ukwe lhip chik lelethane!
Tsi olham tä ohäpe Dios tä Israel Lewuk
ofwel amhohen tä rey Nabucodonosor
tä Babilonia laka niyat
wak'alh letichunhayaj tä inuhla amehen.
31Olham t'at tä ochen amehen
laka nifwotas wet oyok, ¡Mähen,
nuyaye wichi tä iwo letamsekisa,
lajit lenowayhyaja, wet niwohiyat pe p'otesa!
Matche tä newache m'ak chik iwaklhat
chik isiyeja chik letayhfwas inuye.
32¡Soyejen lew'utey camellos
lhäy'e nilhokej leläy!
Olham ofwtsatkatla'pe nilhokej honhatil
wichitso tä yähäs t'asi w'oley.
Nilhokej lhipey tä otälhthiyela
lewit'äyhyaj chik nichätla'pe.
Olham tä ohäpe Dios tä Israel Lewuk olhämet täjtso.
33Hasor lajit lepesa tä häpehila t'at
häp honhat tä ts'anis,
wet m'awolis itihihila lhokwey.
Wet nemla iche wichi chik yenla lew'eta,
wet nemla inukwe honhattso chik ilunhihena.”
Lhawuk lhamet tä itiyej Elam
34Häp nekchäm tä rey Sedequías iwo tesa tä lhayen niyatayej Judá, häp tä Lhawuk tahuyej profeta Jeremías tä yämeje Elam, wet yok:
35“Olham tä ohäpe Dios tä laj letumfwaya, oyok,
Olänhihena Elam kanifwotas tä takhajayhen
tä ichäjwethä lelutses hal'äy.
36Ochenhiyela leyalh lhayis
tä tälhe nilhokej honhat lhipey,
häpkhilek yafwutphä Elam lheley
wet ifwtsatla'pe honhat.
Wet ihichet'ala honhat chik häpe
chik lhamel nilethanaye.
37Ow'enhihola lenowayhyaj häp Elam lheley,
otihihila tä letayhfwas
tä t'uhläk ilän tatache.
Ochenhiyela lewit'äyhyaj,
wet tek olhaitsokhiyejlhila
owäk tä äytajche tä otiyej lhamel.
Ochenhiyela letayhfwas
pajla'tha nilhokej lhamel tä nofwej.
Olham tä ohäpe Dios tä Israel Lewuk olhämet täjtso.
38Otihihila oniyatyajw'et häp Elam,
olänhihena laka reyes
lhäy'e laka niyatey tä ihi.
Olham tä ohäpe Dios tä Israel Lewuk olhämet täjtso.
39“Mat häp ifwalas tä tatay alhoho,
owohla elha m'ak tä owoyeje Elam,
nech'e häp m'ak tä isila tä owoyeje.
Olham tä ohäpe Dios tä Israel Lewuk olhämet täjtso.”
