Jeremías yen lelhakliya Judá lheley tä iwoye lakeyis tä hich'atej tä ni'isachehen
1¡Is t'at chik olhetek
häpe n'opek tä inät tapoyej,
wet ottelhoy häpe hits'ifwik
tä inät tälho tä nitsäyhchä,
häpkhilek otafwlhi ifwalapej honajchepej,
häp tä oyen lhakliya wichi tä ileyejen honhat!
2¡Is t'at chik iche okasthawet tä ihi ts'anis,
häpkhilek oyikch'oye wichi wet olhaitontehlä!
Tsi häp tä nilhokej lhamel tä ileyej Lhawuk,
matche tä iwoye m'ak tä ni'isa.
3Lak'as tet iwoye lutses hal'äy
wet iwoye lhämtes tä kamatachehen
tä tet iwoye n'och'ähal.
Honhatna tapoyej wichi tä w'et yämwethä,
wet ihichet'a m'ak tä matche.
Yiklhatshi t'at wichi lech'isukyajay,
wet häp tä Lhawuk yok:
“Lhamel tek nitäfwel n'oyej tä Lewukn'o.
4“¡Uyayhlä akalay'is wet yej t'ekhayaye aiyhäj!
Tsi häp tä lhamel tä lhalepuhfwas ikan lhamejen
wet lhamel tä lhalakalay'is lhaisitäynhen.
5Wet elh tefwajpeji ikanej elh,
wet newache elh chik yäme m'ak tä matche.
Tsi lhamel ihoyenlä tä yäme m'ak tä kamatache,
hich'atej lakeyis
wet lhainahhatejwethä m'ak tä ni'isa.
6Ilehiyejt'a lakeyis
wet äp ilehiyejt'a tä ikan lhamejen,
wet tek t'uhläk nitäfwel n'oyej tä Lewukn'o.”
7Häp tä tamenej tä Lhawuk tä laj letumfwaya yok:
“Tä oka wichi iwopej lech'isukyaja,
¿atsi m'ak tä owoyneja lhamel?
Oyok, oyelhthiyela lhamel,
olhaitech'aynhiyeja hin'o
tä ithatho chinaj häp itäj
häpkhilek lech'ohle nämche.
8Lhamel yämepej m'ak tä kamatache,
häp lhämtes tet iwoye n'och'ähal tä häpe n'ot'ilek.
Tej tä ifwenho elh letamsek,
mat t'akanyaj t'at.
9Is chik otasnhen lhamel
tä iwoye m'ak tä mälhyeja.
Is chik ikatej laha tä ow'enho'pe
lech'isukyaj tä iwoye.
Olham tä Lewukn'o olhämet täjtso.”
M'ak tä tamenej tä Lhawuk itihiyeja lewit'äyhyaj honhat tä Judá
10Oy'äynhila tachenhas,
otenla otenek tä olhafwyhayaj tä oyenla lhakliya
n'oläy t'ekhawtes tä pajche isis.
Nahayofw tä hip'o,
wet niwohit hin'o chik ilunche,
wet n'oläy lepakas nem tumpe,
wet afwenchey lhäy'e itshätäy tä kan'oläya yikhen.
11Wet Lhawuk yok:
“Owasthihila häp Jerusalén,
wet tuntey ihichelat letape,
wet häpkhila honhat tä m'awolis lew'et t'at.
Wet oyenla ts'anisa wichi lew'etes tä ihi Judá,
wet lajit lheleya.”
12¿Atsi elh tä ihanej m'ak tä tamenej häp m'ak wit'äyhyajna? ¿Atsi elh tä Lhawuk itäfwnhatej m'ayhayna häpkhilek ifwenhomche iyhäj? ¿Chipte tä honhatna wasi wet tamchäy wet tats'ani'pe, wet nemhit iche hin'o chik ilunpe?
13Lhawuk yok:
–M'ak tä tamenej häp m'ak wit'äyhyaj tä iche, häp tä oka wichi ileyej olhämteste ow'enhomche lhamel. Lhamel nemhit tach'ahu n'oye wet yenhit'a chumyaja olhämtes. 14Tä t'unhen lehusey wet iwoyepej m'ak tä ni'isa, iten t'at lhokwey lechufwenyaj tä yen lewuhuya häp dios lhayis tä kamatachehen. 15Wet häp tä olham tä ohäpe Dios tä laj letumfwaya tä Israel lhayis Lewuk, oyok, Ow'enhihola lhamel m'ak tä tapay häpkhilek tuj, wet op'ajthiyeja inät tä iyäyej tä n'ot'ilek ihi. 16Wet ofwtsatkatla'pe honhatil wet lhahiyeja wichi tä w'enha lhamejen tä lhamel nitäfwelayej lhäy'e tä lhokwey nitäfwelayej. Wet one'tehlak letayhfwas ihän lhamel, ichäjila takweyey häp lefwajnhates, pajla'tha yäm nofwej.
Jerusalén lheley lhafwyhayajay
17Lhawuk tä laj letumfwaya yok:
“¡Tetshan, änehen atsinhay
tä ihanej tä y'äyen iyhäj tä y'inhen!”
18Wichi nichulho wet yok:
“Matche, is chik lhamel nämhen thahya,
is chik y'äyen n'ohen.
Wet ottet'ilis tapohiyeja ottelhoy
wet ottet'ähes w'ahuhihena tä otafwchehchä.”
19Pitsaje n'olhafwyhayaj tä ihi Jerusalén tä yok:
“¡Matche tä lhawit'äyhyaj ihi!
¡Wuj lhan'äfwlhi!
Iwohiyet'ak kay'ekach'oye lhaka honhat,
tsi häp tä õ'wasthiche lhawukwey.”
20Atsinhay, is chik letach'ahuye häp Lhawuk lhämet.
Wet chufwenejen häp ales tsinhay
lhäy'e lakaya'fwas häpkhilek lhay'äyenhen
wet iten n'otenek tä n'olhafwyhayaj.
21Tsi n'olänyaj nech'e tiyäjomche lhaw'etes
wet tiyäjomche lhaka niyatey lewukwey.
Wet õ'länhen n'atfwas tä iche hupuy kawayhil,
lhäy'e mamses tä ihi lhipey tä ischephä.
22Wet n'op'itseyhay lhatpe honhat,
tet iwoye y'amhuy tä i'pe honhat,
wet tet iwoye yachuyaj lhay iyhäj tä imälhe'pe lew'et
tä newache elh chik tachuma.
Häp täjtso Lhawuk lhämet tä ne'tek owoye.
N'ohanyaj tä matche
23Wet Lhawuk äp yok:
“Häp hin'o tä ihan m'akej,
isit'a chik lhaiwujyenej lehanyaj.
Wet äp hin'o tä takhajay,
isit'a chik lhaiwujyenej lakhajyhayaj.
Wet äp hin'o tä hiw'en m'ayek,
isit'a chik lhaiwujyenej lakäywet.
24Chik elh t'uhläk lhaiwujyen,
is chik lhaiwujyen tä nitäfwel n'oyej
tä ohäpe Lewuk Dios tä ohumnhayaj nittäya
wet owoye m'ak tä is alhoho tä ihi honhat.
Tähesna häp tä okäjejlhi.
Olham tä Awukn'o olhämet täjtso.”
Wichi tä n'otetnek tä n'olhijtsek iyej t'isanis mat ihihichet'a lechowhal
25Wet Lhawuk äp yok:
–Nämla ifwala tä otihiyeja otasnhayaj nilhokej wichi tä lhamel ikatej n'otetnek tä n'olhijtsek mat nena Lewukan'o. 26Lhamel häpehen wichi tä lew'et Egipto, Judá, Edom, Amón, lhäy'e Moab, lhäy'e nilhokej wichi tä tälhe ts'anis wet yähäs häp t'asi w'ole. Nilhokej wichina, lhäy'e häp Israel lhayis, tej tä n'otetnek tä n'olhijtsek iyej t'isanis, mat khit'a m'ak tä matche tsi ihihichet'a lechowhal.
