Juan 1

₁Tä nech'enyaya, pajche p'ante iche Dios Lhämet, wet Dios Lhämettso iyej Dios wet häpe t'at Dios. ₂Häp tä nech'enyaya lham iyej t'at Dios. ₃Wet häp tä isej lham, Dios yenlhi nilhokej m'ayhay tä iche, wet niwohit elh m'ayhay tä iche chik nitälhayejo häp lham. ₄Lham häpe t'at tä n'ow'atshancheyaj tälhe, wet häp n'ow'atshancheyajtso häpe wichi laka isi. ₅Wet isina ihutunpe honataj, wet honataj ihanhiyejt'a chik y'omat.

₆Iche p'ante hin'o tä lhey Juan tä Dios ichen ₇wet yen laka silätwoya, ne'tek yen lhämetayej isitso häp wichi yämthilek nilhokej t'ekhaye häp tä isej m'ak tä lham Juan yäme. ₈Lham häpkhit'a isi, mat näm p'ante yämthilek yen lhämeta isi. ₉Häp isi tä matche eyte nämhi p'ante honhatena yämthilek ihutunpe nilhokej wichi.

₁₀Häp lham tä häpe Dios Lhämet ihte honhatena, wet tej tä isej lham tä Dios yenlhi p'ante honhat, mat wichi tä i'pe honhat tek nitäfwelej. ₁₁Lham näme m'ak tä Lewuk, mat laka wichi tek tachumlä. ₁₂Mat iche iyhäj tä tachumlä wet t'ekhaye, wet lham hiw'enhomche lewahnhayaj yämthilek nech'e häpehen t'at Dios leles. ₁₃Wet Dios leles t'at, tsi tälhihot'a n'ot'isan wok hin'ol lenech'ethayajay, mat tälho t'at häp Dios.

₁₄Häp lham tä häpe Dios Lhämet lhayen hin'oya wet in'amejen, wet m'ak tä matche lhäy'e lehumnhayaj tapoyejej lham. Wet olhamel ow'en t'at lewujyaj tä Lajcha hiw'enho, tsi tajlhamat lham tä häpe Lhäs.

₁₅Juan yäm äytaji lhämet tä yen lhämeta wet yok:

–Häp täjtsi hin'o tä oyäme naji tä oyok, “Oelh tä nekche on'äyij, len'ohyaj inu'pe olham on'ohyaj, tsi lham pajche iche p'ante tä olham n'am newche.”

₁₆Wet wuj tä n'aisej lehumnhayaj tä tapoyej tä takäpfwayeje nilhokej n'amel. ₁₇Häp tä isej Moisés iche p'ante Dios lhämtes tä häpe Ley. Mat häp n'ohumnhayaj lhäy'e m'ak tä matche it n'amejen häp tä n'aisej Jesucristo. ₁₈Nehit katsik hiw'enpe Dios. Matkat häp Lhäs tä weihalha, wet äp häpe t'at Dios, wet iyej t'at Lajcha, häp tä itäfwnhat n'amejen.

₁₉Häp Judío lhayis tä ihi Jerusalén ichen p'ante sacerdotes lhäy'e lech'otfwas tä häpe iyhäj tä tälhe letes p'ante Leví, ne'tek ihoye Juan wet tay'ätshane tä yok:

–¿Atsi tä ahäpe?

₂₀Juan tek lhaifwonlä mat lhaikalelhtho lhamel wet yok:

–Ohäpkhit'a N'ofwayhthi tä Dios Chenek.

₂₁Wet häp hin'oltso äp tay'ätshane wet yok:

–Tä mälhyejtso, ¿atsi tä ahäpe? ¿Hät ahäpe profeta Elías p'iya?

Juan yok:

–Ohäpkhit'a.

Lhamel tujlhache tä yok:

–¿Wok ahäpe Profeta tä toyhlä tä nämla p'iya?

Juan yok:

–Kha.

₂₂Wet lhamel äp yok:

–¿Atsi tä ahäpe tä mälhyejtso? Lhek fwel n'ohohen, häpkhilek ofwenho lhamel tä lechenek n'ohen häp elh tä lhäme tä ahäpe.

₂₃Juan nichulho wet yok:

–Olham ohäpe n'opak tä t'än tä tumho ts'anis tä yok, “Enlhi Lhawuk len'äyij, isyen alhoho”, mälhyej profeta Isaías lhämet p'ante.

₂₄Wet häp iyhäjtso tä äp häpe Fariseo lhayis kachenhay ₂₅tay'ätshane Juan wet yok:

–Tä mälhyejtso tä akahäpeya N'ofwayhthi tä Dios Chenek, wok Elías, wok Profeta tä oyämetso, ¿chipte tä lebautisaynhen wichi?

₂₆Juan nichulho wet yok:

–Olham ts'ilak inät tä obautisaynejen wichi. Mat i'amejen elh tä amel katäfwelayej, ₂₇lham nekche on'äyij, häpe t'at elh tä olham matche tä n'am t'uhawetej chik olanhi lenisäj t'ak.

₂₈Häp m'ayhay tä mälhyejentso ihi p'ante honhat lhip tä lhey Betania, häp honhat tä tumej tewok tä lhey Jordán lhip tä tumej hichä, tä Juan ibautisaynhen p'ante wichi.

₂₉Tä ifwala elh p'ante Juan hiw'enlä Jesús tä ihoye lham, wet yok:

–Lhek yahinya, häp täjtsi Tson'ataj Lhäs tä Dios ichen honhatena yämlek isoyej lech'isukyajay wichi. ₃₀Häpenaj lhamtsi tä oyäme tä oyok, “Iche elh tä nekche on'äyij tä len'ohyaj inu'pe olham on'ohyaj, tsi lham pajche iche p'ante tä olham n'am newche.” ₃₁Häte olham ohanhiyejt'a elh tä häpe häp lham. Mat häp tä oneke, wet obautisaynejen inät Israel lhayis häpkhilek nitäfwelej lham.

₃₂Wet häte Juan äp yäme tä yok:

–Ow'en naji Espíritu tä Dios T'amajchet tä inuhchä tä tälh puleye mälhyet hokwinaj, wet takasit tä nichätpe häp lham. ₃₃Mälhyej tä oyäme, olham ohanhiyejt'a elh tä häpe häp lham, mat Dios tä ne'tek obautisaynejen inät wichi, häp tä pajche tahuy n'oyej wet yok, “Häp hin'o chik lew'enche Espíritu tä inuyejchä wet i'pe häp lham, häpkhila elh tä ibautisaynhiyeja wichi häp Espíritu tä Ot'amajchet.”

₃₄“Eh wet olham ow'en naji, wet ofwel amhohen tä matche tä häpe t'at Dios Lhäs.”

₃₅Tä ifwala elh p'ante Juan äp yachajo tä ihi häp lhiptso, lhäy'e täkwfwas lechufwenkay. ₃₆Wet tä hiw'enche Jesús tä yik, wet yok:

–Lhek yahinya, häp täjtso Tson'ataj Lhäs tä Dios ichen honhatena.

₃₇Tä lhamel iläte tä iwoyetso, wet lhamel ihän Jesús. ₃₈Wet Jesús nitilhakche len'äyij, wet tä hiw'enlä lhamel, tay'ätshane tä yok:

–¿Atsi m'ak tä let'uyaykwe?

Lhamel nichulho wet yok:

–Maestro, ¿chi tä lhehi?

₃₉Jesús yok:

–Lhuyay, yahinpe ow'et.

Wet lhamel yikche wet nech'e hiw'enpe lhip tä ihi, wet iyej t'at honajtso. ₄₀Elh lhamel lhey Andrés tä Simón Pedro lechila. ₄₁Lham chunkat tä t'ukwe lech'inij, tä hiw'en ifwenho tä yok:

–Olhamel ow'enne häp N'ofwayhthi tä Dios Chenek.

₄₂Wet nech'e Andrés ihäne lech'inij häp Jesús. Tä Jesús iyahin, tahuyej tä yok:

–Ahäpe Juan lhäs tä lhey Simón, mat athana nech'e eyla Cefas.

_43-44Tä ifwala elh p'ante Jesús yik tä ihoye Galilea, wet hiw'en hin'o tä lhey Felipe tä lew'et Betsaida, häp hupuy tä äp Andrés lhäy'e Pedro häte lew'et. Wet Jesús tahuyej tä yok:

–Nek n'okwe.

₄₅Wet Felipe t'ukwe elh tä lhey Natanael, wet ifwenho tä yok:

–Olhamel ow'en hin'o tä Moisés lhäy'e profetas lesaynhay p'ante yäme. Häpe t'at Jesús tä tälhe Nazaret, José lhäs.

₄₆Natanael yok:

–¿Chip iwoye tä m'ak tä is tälho Nazaret?

Felipe nichulho wet yok:

–Lhuu, wet lew'enla.

₄₇Tä Jesús hiw'enlä Natanael, wet yok:

–Häp täjtsi tä lhamya Israel lhayis elh, häp hin'o tä naj lakanyaja.

₄₈Tä Natanael iläte, tay'ätshane tä yok:

–¿Chipte? ¿Matlhat letäfwel at n'oyej?

Jesús nichulho wet yok:

–Tä kamaj Felipe nit'äna ame, oahiw'en t'at tä lhechufwi higo lhile.

₄₉Tä Natanael iläte täjtso, wet yok:

–Maestro, ¡ahäpe t'at Dios Lhäs wet Israel lhayis laka Niyat!

₅₀Jesús nichulho wet yok:

–¿Häpe t'at olhämet tä ofwel amho tä oyok, “Oahiw'en tä lhechufwi higo lhile”, wet häp tä tamenej tä let'ekha n'oye? Mat ofwel amho tä ihichela m'ayhay tä inu'pe täjtso chik lew'enla.

₅₁Wet Jesús äp yok:

–Matche, matche tä ofwel amhohen, Lew'enla pule tä lhaich'enhi, wet äp Dios laka ángeles tä inupejchä wet äp yäpilphäpej tä hätet iwoyek yen n'äyija Hin'o Lhäs.