Juan 16

₁“Ofwel amhohen m'ayhayna häpkhilek nittäya tä let'ekhayay n'oye. ₂Tsi Judío lhayis ne'tehlak lhekaych'oye laka n'ohusew'etes, wet nek t'at lewhäy tä elh chik häpe tä ailänhen yohlak, Häp tä otch'ote Dios lechumet. ₃Mat tä iwoynejetso m'ak tä iwoye, häp tä nitäfwelayej Ojcha wet äp nitäfwela n'oyej. ₄Ofwel amhohen täjtso, häpkhilek chik nichäte lewhäy, letichunhichela olhämtesna.

“Tälhe tä nech'e owo tesa ochumet, ofwenhit'a amhohen tähestso tsi häp tä oit amejen. ₅Mat athana oyik, oyäple Elh tä lechenekn'o, mat niwohit elh amel chik tay'ätshanej n'oye lhip tä ohoye. ₆Tajlhama tä afwitajayaj tapoyej ahusey tä ofwel amhohen tähestso. ₇Mat oyok, matche olhämet, lhäy'e lhip tä is chik oyik häpkhilek amel aisej, tsi chik n'am nek, nämhit'ala Hach'otfwa yämlek i'amejen. Mat chik oyik, ochenla amehen. ₈Wet chik näm, lhäy'ehila lhip chik itäfwnhatejen wichi tä i'pe honhat häp m'ak tä häpe n'och'isukyaj, lhäy'e m'ak tä is alhoho, lhäy'e Dios lakalelhthayaj. ₉Tä lhamel nichaya n'oye, häp tä häpe n'och'isukyaj. ₁₀Wet tä ohoye Ojcha lhäy'e tä nemla lew'enayn'o, häp tä hin'älitn'o tä ohäpe elh tä iwoyepej m'ak tä is alhoho. ₁₁Wet tä pajche õ'tiyej letes häp honhat laka niyat, häp tä hin'älit tä Dios lakalelhthayaj iche.

₁₂“Eh, häp täjtso m'ak tä ofwel amhohen. Mat kamaj wujpe m'ayhay tä ot'uhläk ofwel amhohen, mat athana elat tek lekalhayhi nilhokej. ₁₃Mat chik nämla Espíritu tä hin'älit m'ak tä matche, lhamlak lhäy'ehila lhip chik ichufwen amejen m'ak tä matche. Tsi yämhiyet'ala m'ak tä tälhe lham, mat yämhiyela m'ak tä iläte, wet äp ihanthila amejen m'ayhay tä ihichela. ₁₄Lham iwujyenlan'o, tsi tachumlatlä m'ak tä tälh n'oye wet itäfwnhatla amejen. ₁₅Nilhokej m'ak tä iyej Ojcha häte olewuk t'at. Häp tä tamenej tä oyok, Espíritu tä T'amajchet tachumlatlä m'ak tä tälh n'oye wet itäfwnhatla amejen.”

₁₆Wet Jesús äp yok:

–Pajiyejt'a wet nemla lew'enayn'o, mat chik äp pajfwaj yachajiholak äp lew'enay'atn'o.

₁₇Wet nech'e elhpej lechufwenkay tay'ätshanej lhamehen wet yok:

–¿Chipte tä ifwel n'amhohen tä pajiyejt'a wet nemla y'aw'en, wet chik äp pajfwaj yachajihola chik y'aw'enhila? ¿Atsi m'ak tä yäme tä yok, “Ohoye Ojcha”? ₁₈Wet ¿atsi lhämet tä yok, “Pajiyejt'a”? Y'ahanhiyejt'a m'ak tä yäme.

₁₉Jesús nitäfwelej tä lechufwenkay t'uhläk tay'ätshaneje tähestso. Wet tahuyej lhamel tä yok:

–¿Hä letay'ätshanej amehen tä oyonekwe, “Pajiyejt'a wet nemla lew'enayn'o, mat chik äp pajfwaj yachajiholak äp lew'enayn'o”? ₂₀Matche, matche tä ofwel amhohen, Afwitajayaj ihlat amejen wet letafwichelahchä, mat häp wichi tä honhat leles akäslatwethä. Mat oyok, afwitajayaj nech'e häpkhila t'at akäjyaj. ₂₁Chik atsinha eyte iwohi lhäsa, wuj tä lelhakli ihi tsi nichäte lewhäy. Mat tä lhäsaj nichätchä, nemhit nitichunche leteläythayaj tä iyej, tsi wuj lakäjyaj tä lhäsaj nech'e iche honhatena. ₂₂Wet häp tä mälhyej'attso amel, athana lelhak'anhilawethä ayej. Mat yachajiholak oahiw'en wet wujlak akäjyaj ihi, wet nehit katsik ihanhiyeja iwoyneje chik iso amejen akäjyajtso. ₂₃Häp ifwalatso nemla letay'ätshanej n'oye m'ak at chik häpe.

“Matche, matche tä ofwel amhohen, M'ak at chik häpe chik let'alhayeje Ojcha häp tä isej olhey, hiw'enla amhohen. ₂₄Athana kamaj niwohit m'ak chik let'alhayeje Ojcha häp tä isej olhey. Oyok, alhaye, hiw'enlat amhohen, häpkhilek nittäya lhip akäjyaj.”

₂₅“Tähestso otech'aynej m'ayhay chik häpe tä ofwel amhohen. Mat nämla lewhäy tä nemla wo m'ak chik otech'aynej, tsi on'älthichehena olhämtes tä oyäme häp Ojcha. ₂₆Wet häp ifwalatso let'alhiyela m'ak at chik häpe häp tä isej olhey. Mat ofwel amhohen tä olhamhit'alak olhaip'altsene atapehen häp Ojcha, ₂₇tsi lham t'at tä aihumnhen, häp tä lehuminayn'o wet let'ekhayaye tä otälhe t'at häp lham Dios. ₂₈Oyiktech'oye Ojcha wet onek honhatena, mat athana oyikch'oye honhat wet oyäple häp Ojcha.”

₂₉Tä lechufwenkay iläte, wet yok:

–Athana nech'e kalelhäj m'ak tä lhäme, nemhit wo m'ak chik letech'aynej. ₃₀Athana olhamel ow'en tä lehanej nilhokej m'ayhay, wet tej chik newa katsik nämejphä chik tay'ätshan ame, mat am lehanej t'at. Häp tä olhamel ot'ekhaye tä matche tä letälhe Dios.

₃₁Jesús nichulho lhamel wet yok:

–¿Athana nech'e let'ekhayaye? ₃₂Lhek yahinya, nek lewhäy, wet häpe t'at athana, yämthilek amel lefwtsatayhi wet elhpej yäple m'ak tä iwoye, wet lewomlatn'o. Mat tek ots'ilak, tsi Ojcha in'oyej.

₃₃“Ofwel amhohen tähestso häpkhilek atamsekis ihi n'oyej. Ateläythayaj ihla amejen honhatena, mat akhajyenhen, tsi olham pajche okalhi honhat lakhajyhayaj.”