Juan 7

₁Tä tajyäme täjtso, Jesús ilunche honhat tä Galilea. Tek t'uhläk ihi Judea, häp tä Judío lhayis tä ihi t'uhläk ilän. ₂Mat tä tott'aye Judío lhayis lakäjyaj tä lhey N'ohupelis, ₃lech'inhis tahuyej wet yok:

–Mäch'oye täja, hoye Judea, häpkhilek lhamel tä ayen häneka hiw'en m'ak tä lhenlhi. ₄Tsi hin'o tä t'uhläk wichi nitäfwelej weskathiyejt'a m'ak tä yenlhi. Wet tä lhenlhi m'ayhay tä lhenlhipej, apäyne nilhokej wichi tä i'pe honhat.

₅Lhamel iwoynejetso lhämet tsi tej tä lech'inhis at thayej, t'ekhahiyet'a Jesús. ₆Mat lham ifwenho lhamel wet yok:

–Amel lefwetajay lewhäy at chik häpe is t'at. Mat kamaj nichäthiyet'a owhäy. ₇Honhat leles ihanhiyejt'a chik n'äyi amhomche. Olham häp tä n'äyi n'oho, tsi on'älitpe m'ak tä lhamel iwoye tä ni'isa. ₈Mähen amel, hoyaye t'at n'okäjyaj. Olham ohohiyet'a, tsi kamaj nichäthiyet'a owhäy.

₉Tä Jesús ifwenho lhamel täjtso, wet imälhehi Galilea. ₁₀Matkat tä lech'inhis tajyämehen tä yikhen tä ihoye n'okäjyaj, lham häte ihoye t'at, mat tek lhain'ältej wichi, lhimphaj tä lhaiskat. ₁₁Wet niyatey tä Judío lhayis ilunche t'at n'okäjyaj tä lhamel t'ukwe, wet yopejkwe:

–¿Chip ihitso?

₁₂Wet wichi wuj tä yämejwethä Jesús. Iche iyhäj tä yok, “Is hin'otso.” Mat äp iche iyhäj tä yok, “Isit'a, ikanej wichi.”

₁₃Mat lhamel weskatej t'at lhämtestso, tsi nowaye laka niyatey.

₁₄Tä lechowej häp n'okäjyajtso, Jesús tiyäje Dios Lew'et wet iwo lechufwenyaja. ₁₅Tä Judío lhayis iläte lhämtes tä iwoye, wuj tä iseltejen wet yok:

–¿Chipte tä hin'otso ihanej m'ayhay, tä häpe elh tä lhaknichufwena?

₁₆Mat Jesús nichulho lhamel wet yok:

–M'ak tä oyen ochufwenyaja tälhit'a n'oye, tälhe t'at Elh tä lechenekn'o. ₁₇Wet chik iche elh tä t'uhläk iwoye Dios lenech'ethayaj, nitäfwenhichela m'ak tä olham oyen ochufwenyajana, chik tälhe Dios wok tälh n'oye. ₁₈Häp elh tä t'uhläk wichi iwunit, yäme t'at m'ak tä lewuk häp lham. Mat elh tä t'uhläk wichi iwunit elh tä lechenek, häp tä yen lhämeta m'ak tä matche, wet ihichet'a m'ak chik kamatache tä yäme.

₁₉“Wet oyok, Moisés hiw'en p'ante amhohen häp Ley, mat niwohit elh chik häpe amel chik iwoye. ¿Chipte tä let'uyayhläk lelänayn'o?”

₂₀Tä wichi iläte, wet yok:

–¡Ahät tä i'amhi! ¿Atsi tä t'uhläk ailän?

₂₁Jesús yok:

–M'ak tefwajni tä oyenlhi naji häp ifwala tä n'ot'elakw'et, wet häp tä nilhokej amel leseltejen. ₂₂Mat lhek tetshanay olhämet. Moisés p'ante ne'tek lewoyayepej n'olhijtsek tä häpe n'otetnek (tej tä nitälhaye lham Moisés, mat amel atetsel p'ante häp tä lakey). Wet amel lewoyaye t'at täjtso. Tej chik häpe ifwala tä n'ot'elakw'et, mat lew'enho t'at han'äfwaj häp n'otetnektso. ₂₃Wet tä amel lenowayhläk lenäk'äsay häp Ley p'ante tälhe Moisés, wet häp tä tej chik häpe thayej ifwala tä n'ot'elakw'et, mat lew'enho t'at n'otetnektso häp han'äfwaj, tä mälhyejtso, oyok, ¿chipte tä lechuwetay n'oye'pe tä ochesat hin'o t'isan imälhewek häp ifwala tä n'ot'elakw'et? ₂₄Lhek yahinya, yej wo akalelhthayajayejpe aelh m'ak tä atelhoy hiw'en, mat äm is alhoho akalelhthayaj tä lewoye, tetshan m'ak tä matche tä häpe.

₂₅Elhpej tä lew'et Jerusalén lhamel tay'ätshan lhamehen wet yok:

–¿Hä kahäpeya täjtsi hin'o tä lhaka niyatey t'ukwe yämthilek ilän? ₂₆Lhek yahinya, iyej t'at wichi wet yämhoplhi, mat niwohit elh chik tahuyej. ¿Elat nech'e niyatey ihanej p'iya tä häpe N'ofwayhthi tä Dios Chenek? ₂₇Mat n'amel y'ahanej ihi honhat tä tälhe. Mat häp N'ofwayhthi tä Dios Chenek, chik nämla nehit katsik ihanhiyeja ihi honhat tä tälhe.

₂₈Jesús ihi t'at Dios Lew'et wet iwo lechufwenyaja. Tä iläte täjtso, wet nech'e ifwitsenej lechos wet yok:

–¡Amel lefwetajay letäfwelay n'oyej wet äp lehanayej ihi honhat tä otälho! Oyok, tä onäm olhamhit'ak olhaichen, mat häp Elh tä t'uhawetej chik wichi t'ekhaye, häp tä lechenekn'o, mat amel tek letäfwelayej. ₂₉Olham tä ontäfwelej, tsi otälhe wet lham t'at tä lechenekn'o.

₃₀Tä wichi iläte, t'uhläk itsoklhi, mat ihit'a katsik takwey itiyej, tä kamaj lham nichätaye lewhäy. ₃₁Wet wujpe wichi tä nech'e t'ekhaye, wet lhamel yok:

–Chik näm N'ofwayhthi tä Dios Chenek, ¿hä yenhilhila letetnhay tä inu'pe m'ak tä hin'otsi yenlhi?

₃₂Tä Fariseo lhayis iläte m'ak tä wichi yen lhämetayej Jesús, lhamel lhäy'e sacerdotes tä len'ohyajay ihiche ichen hin'ol tä t'uye Dios Lew'et yämthilek itsoklhi.

₃₃Jesús yok:

–Pitajit'a lewhäy tä oihla amejen, wet oyäpnhiyela häp Elh tä lechenekn'o. ₃₄Amel let'uhla n'okwe mat tek lew'enlan'o, tsi tek lehanhiyeja lewoyneje yämthilek lechäte lhip chik oihihila.

₃₅Niyatey tä Judío lhayis tay'ätshan lhamehen wet yok:

–¿Chihla tiyäji hin'otsi, tä yäm lhame tä kay'aw'enhila? ¿Elat ihohiyela n'aiyhäj tä ihiche honhates iyhäj wet ichufwenhihena p'iya häp wichi tä w'enha lhamejen tä iyej? ₃₆¿Chip iwoye lhämet tä yok, “Let'uhla n'okwe mat tek lew'enlan'o, tsi tek lehanhiyeja lewoyneje yämthilek lechäte lhip chik oihihila”?

₃₇Häp ifwala tä lepes n'okäjyaj, häp ifwala tä lhamya, Jesús takasit wet ifwitsenej lechos tä yok:

–Elh chik häpe tä ichim, is chik iho n'oye wet iyä. ₃₈Mälhyej Dios lhämet tä ihi Lehi tä yok, “Häp elh tä t'ekha n'oye, tewok lhayis tä häpe inät tä n'ow'atshancheyaj tälhihola lechowej.”

₃₉Tä iwoyetso, Jesús yäme häp Espíritu tä Dios T'amajchet tä elh chik häpe chik t'ekhaye lham, ikathiyeja. Tsi kamaj ayej Espíritu tä T'amajchet ninäma p'ante, tä kamaj nichätaye lewhäy Jesús lewujyaj.

₄₀Iche iyhäj wichi tä iläte lhämtestso wet yok:

–Matche tä häp täjtsi Profeta tä toyhlä tä nämla.

₄₁Wet iyhäj yok:

–Häpe N'ofwayhthi tä Dios Chenek.

Mat äp iche iyhäj tä yok:

–Kha, tsi N'ofwayhthi tä Dios Chenek iwohiyet'ak tälho Galilea. ₄₂Tsi Dios lhämet tä ihi Lehi yäme tä Dios Chenektso tälhiyela David leles tä lepes lhele, wet äp tälhihola Belén, häp hupuy tä David lew'et p'ante.

₄₃Tä mälhyejtso, wichi tek w'awulhejchä m'ak tä yämeje Jesús. ₄₄Iche iyhäj tä t'uhläk itsoklhi, mat ihit'a katsik takwey itiyej.

₄₅Häp hin'ol tä t'uye Dios Lew'et, lhamel yäple sacerdotes tä len'ohyajay ihiche lhäy'e Fariseo lhayis. Wet lhamel tay'ätshane hin'oltso wet yok:

–¿Chipte tä kachäjaya alhoho hin'otso?

₄₆Lhamel yok:

–¡Ihichet'a elh chik lhämtes häte iwoye tä lham yämlhi!

₄₇Tä Fariseo lhayis iläte, wet yok:

–¿Hä nech'e häte amel lematitche t'akanyaj tä iwoye? ₄₈Lhek tetshan olhämet, ¿hä iche elh n'amel lhaka niyatey wok Fariseo lhayis elh chik häpe tä ichaye lham? ₄₉¡Häp wichitso tä nitäfwelayej Ley p'ante tälhe Moisés, lewit'äy ihihila!

₅₀Wet Nicodemo, häp Fariseo tä pajche ihoye Jesús, lham tahuyej iyhäj wet yok:

₅₁–Häp Ley p'ante tälhe Moisés yok, “Yej letiyej letes häp elh chik häpe tä kamaj kalätaye lhämtes wet äp kahanayej m'ak tä iwoye.”

₅₂Mat tä iyhäj iläte Nicodemo lhämetna, lhamel nichulho wet yok:

–Mat ¿chiwoye? ¿Hä ahäte ahäpe Galilea lhele? Lhek achufwenej Dios lhämtes tä ihi Lehi. Lew'enla tä ihichet'a profeta chik häpe tä tälhe Galilea.

[ ₅₃Wet nech'e lhamel elhpej yäple lew'et,