Jesús hiw'enyenche honhat hin'o tä asnam tälhe tä nech'e iche
1Tä Jesús yik p'ante, hiw'en hin'o tä asnam tälhe tä nech'e iche. 2Wet lechufwenkay tay'ätshane Jesús tä yok:
–Maestro, ¿atsi m'ak tä tamenej tä asnam hin'ona tälhe tä nech'e iche? ¿Hä lajcha wok lako wok lham lesukyaj tä tamenej?
3Jesús nichulho lhamel wet yok:
–Häpkhit'a lham wok lajcha wok lako chik lesukyaj tä tamenej, mat häpkhilek lhain'älit m'ak tä Dios ihanej iwoyneje tä iwoye. 4Tä mälhyejtso, tä ifwala is chik y'awoye lechumet häp lham tä lechenekn'o. Tsi nek t'at honatsi, wet ihit'ala katsik ihanej chik tachumlhi. 5Tä kamaj oihi honhatna, ohäpe t'at wichi tä i'pe honhat laka isi.
6Tä ileyej tä iwoyetso, ifwats'unhi honhat wet yen iyhäta, wet y'ilenpe asnam telhoy. 7Wet tahuyej wet yok:
–Mäh hoye n'onayhthi tä Siloé wet lej iyhät tä i'pe atelhoy.
(Häp n'olhämet Siloé häp tä yok, N'ochenek.)
Wet asnam yik tä ihoye n'onayhthitso. Tä nichäte, ilej iyhät, wet tä tapil nech'e hiw'enche honhat. 8Wet lew'etfwas lhäy'e wichi iyhäj tä pajche hiw'enpej tä t'alhejepej m'ak chik isej, lhamel yok:
–¿Hä kahäpeya hin'o tä tatayphäpej tä t'alheje wichi t'awayhat?
9Iyhäj yok:
–Häpe t'at.
Mat iche iyhäj tä yok:
–Häpkhit'a, ch'ääj tä nichätche.
Mat lham hin'otso yok:
–Matche, ohäpe t'at.
10Tä mälhyejtso, wichi tay'ätshane wet yok:
–¿Mat chiwoye tä nech'e lew'enche honhat?
11Lham nichulho wet yok:
–Häp hin'o tä lhey Jesús, häp tä yenlhi iyhät wet y'ilenpe ottelhoy, wet yok, “Mäh hoye n'onayhthi tä Siloé wet lej iyhät.” Wet tä oyik, tä onchäte olej ottelhoy, wet nech'e ow'enche honhat.
12Wet äp wichi tay'ätshane tä yok:
–¿Wet chip ihi hin'otso?
Lham yok:
–Thayej, ohanhiyejt'a ihi.
Fariseo lhayis inityen tä tay'ätshane hin'o tä nech'e hiw'enche honhat
13-14Häp fwala tä Jesús yenlhi iyhät tä hiw'enyenche honhat häp asnam, häpe t'at fwala tä n'ot'elakw'et. Wet wichi ihäne Fariseo lhayis häp hin'otso, 15wet lhamel tay'ätshane tä yok:
–¿Chiwoye tä nech'e lew'enche honhat?
Lham nichulho wet yok:
–Iyhät tä õy'ilenpe ottelhoy, wet tä olej ow'enche honhat.
16Wet iyhäj Fariseo lhayis yok:
–Häp hin'o tä yenlhi täjtso tälhiyet'a Dios, tsi yenhit'a t'amajcheta fwala tä n'ot'elakw'et.
Mat äp iche iyhäj tä yok:
–Mat chik häp hin'o tä lesukyaj ihi, ¿chipte tä ihanej iwoyneje tä yenlhi n'otetnhay tä wuj tä iselkat n'amejen?
Tä mälhyejtso, n'äl tä y'ajit'awek Fariseo lhayis letichunhayajay. 17Wet lhamel äp yachajo tä tay'ätshane häp hin'o tä pajche asnam, wet yok:
–¿Wet cho am, atsi tä lefwetaj häpe hin'otso tä aiw'enyenche honhat?
Lham nichulho wet yok:
–Häpe profeta.
18Mat niyatey tä Judío lhayis yok:
–Mathichet'ak asnamt'apmhaji lhäy'e tä fwetaj nech'e tä hiw'enche honhat.
Tä mälhyejtso, lhamel t'äne häp lajcha lhäy'e lako 19wet tay'ätshane tä yok:
–¿Hä häpe t'at täjtsi amel äs tä lhämaye tä asnam tälhe tä nech'e iche? ¿Mat chipte tä nech'e hiw'enche honhat?
20Lajcha lhäy'e lako nichulho wet yok:
–Matche, häpe t'at olhamel olhäs, tälhe tä nech'e iche asnam t'at. 21Mat tä hiw'enche honhat athana, olhamel ohanhiyejt'a m'ak tä tamenej wet tek ohanej elh tä häpe tä hiw'enyenche honhat. Mat ätshane lham tsi thaläkw, lhamlak ifwel amhohen.
22Lhamel iwoynejetso lhämet tsi nowaye niyatey tä Judío lhayis, häp tä lhamelna pajche y'ajwekej letichunhayaj tä yok, “Elh chik häpe chik yok, Jesús häpe N'ofwayhthi tä Dios Chenek”, lhamel n'äyejo chik fwetaj ihoye Dios laka wichi tä lhaihutwek. 23Häp tä tamenej tä hin'o lajcha lhäy'e lako yok, “Ätshane lham tsi häpe hin'o tä thaläkw t'at.”
24Wet niyatey tä Judío lhayis äp yachajo tä t'äne hin'o tä pajche asnam, wet tahuyej tä yok:
–Lhek yahinya, olhamel oyok, häp hin'otso häpe t'at elh tä lesukyaj ihi. ¿Chiwoye am ämet? Lhek fwel n'ohohen m'ak tä matche tä lhehi tä Dios tatache.
25Lham yok:
–Ohanhiyejt'a chik häpe hin'o tä lesukyaj ihi wok laj lesukyaja. Mat ohanej tä pajche ohäpe t'at asnam, mat athana ow'enche honhat.
26Wet lhamel äp yachajo tä tay'ätshane wet yok:
–¿Atsi m'ak tä iwoyej ame tä aiw'enyenche honhat?
27Lham nichulho wet yok:
–Pajchene ofwel amhohen, mat tek letach'ahuyay n'oye. ¿Chipte tä let'uhläk oyachajo? ¿Wok elat nech'e häte amel let'uhläk lhenay ahäneka häp lhamtso?
28Tä lhamel iläte lhämettso, tawäkwäywethä wet iläkwlhi wet yok:
–¡Am tä lehänlhi lhamtso, mat olhamel ohänlhi Moisés! 29Tsi olhamel ohanej tä Dios yämhoplhi p'ante Moisés, mat häp hin'otso ohanhiyejt'a honhat tä tälhe.
30Hin'o nichulho lhamel wet yok:
–¡Wet chipte tä mälhyejtso tä amel kahanayej ihi honhat tä tälhe! ¡Mat lhek yahinya, hiw'enyen n'okwe honhat! 31N'amel y'ahanej tä Dios tach'ahuhiyet'a wichi tä lesukyaj ihi, ts'ilak lhamel tä n'okwiyej wet iwoye lham lenech'ethayaj. 32Tälhe tä nech'enyaya ihichet'ak õyäme tä iche hin'o tä hiw'enyenche honhat elh tä asnam tälhe tä nech'e iche. 33Chik nitälhiye Dios häp hin'otso, ihanhiyejt'a iwoyneje chik yenlhi m'ak chik mälhyejtso.
34Tä niyatey tä Judío lhayis iläte, wet wuj tä tawäkwäye wet yok:
–¡Am tä tälhe tä nech'e lheche tä asukyaj ihi! ¿Chipte tä lefwetaj lechufwen n'ohen? ¡Mäh!
Iyhäj tä lehusey asnamis
35Tä Jesús ihanch'oye tä niyatey tä Judío lhayis ichen kanhi hin'o, wet yik tä lhaichutyenej wet tay'ätshane tä yok:
–¿Hä lechaye häp Hin'o Lhäs?
36Hin'o nichulho wet yok:
–Päyen n'oye elh tä häpe, häpkhilek ochaye.
37Jesús yok:
–Lew'en t'at. Hin'o tä yämlhi amho, ohäpe t'at.
38Wet hin'o takhoschufwi tä iläte wet yok:
–Ocha ame, Iwuk.
39Wet nech'e Jesús yok:
–Olham onäm honhatena yämlek owo okalelhthayaja, häpkhilek asnamis hiw'enchehen honhat, wet iyhäj tä fwetaj hiw'enchehen honhat n'äl tä asnamis t'at.
40Wet iche iyhäj Fariseo lhayis tä iwhäye, tä iläte Jesús, wet lhamel yok:
–¿Chiwoye tä mälhyejtso? ¿Hä olhamel ohäte ohäpehen asnamis?
41Jesús nichulho lhamel wet yok:
–Chik ahäpkhihen asnamis, ates ihihit'a. Mat tä lhäm amehen tä ahäpkhihent'a asnamis, ates ihi t'at.
