Job 18

₂“¿Chihlatek leleyej tä lhämlhi?

Wo elha atichunhayaj

häpkhilek y'atahuy n'amejen.

₃¿Chipte tä letech'ayen n'oyejen

itshätäy tä laj lehuseya?

₄Tej tä alelänej afwitseyaj,

tha lekalhihit'ak lhen ts'aniya honhat

wet tek let'ayhatch'oye lew'etes tachenhas.

₅“Mat m'ak tä matche,

wichi tä ni'isahen nofwila,

tehlat iwoye isi tä y'om,

wet lelhet lhal nemla y'ajphä.

₆Lechäkw nemla isi tä ihi lew'et,

tsi häp tä y'omhila t'at.

₇Lew'ekyaj tä t'unche

nemla lakhajyhayaj ihi,

wet äp lhetnhayajay yäpnhila'pe.

₈Hits'ulhakhilhila hotanaj

wet nemla nich'ola tsi yähäyhi.

₉N'oka niyäkw inayhthila lepach'ol,

wet lakotso hit'unthihila.

₁₀N'onikyhat ihihila n'äyij tä inukwe,

häpkhilek t'äsi.

₁₁Lenowayhyaj ihiyeja nilhokej lhipey,

iläthiyela tä m'ak tä tanhoch'ay ihänlhi t'at.

₁₂Nehläs tä isohiyeja lakhajyhayaj,

wet lewit'äyhyaj neklhaye t'at.

₁₃T'inhayaj tä iyej yiklhaye t'at t'ilek,

tsi tuj t'at lhiphajpej lhiphajpej.

₁₄Õyokwesilach'oye lew'et,

õ'sohiyeja letamsek,

wet äp õ'tonhiyela n'ot'ilek kaniyat.

₁₅Õ'wunhihola lewukwe,

wet azufre häp tä õ'tsäyhla'pe lew'et

häpkhilek nofw t'inhayaj tä iyej.

₁₆Hin'o tä mälhyejtso tehlat iwoye hal'ä

tä lefwettsil tamchäy wet lhachal tasuype.

₁₇Wichi hip'ethethilahlä,

wet nemla iwo lheya.

₁₈Õ'thathiyela honataj,

õyikhatlach'oye honhat.

₁₉Lajlat lelesa,

ihichet'ala elh che häpe che imälhehi lew'et.

₂₀Wichi tä ihi tä ifwala tälhche,

lhäy'e iyhäj tä ihi tä ifwala y'uy,

lhamel inuhthila lhamhohen lenowayhyaj

che ilätch'oye hin'o tä ni'isatso lewit'äyhyaj.

₂₁Tsi häp täjtso lakapes

häp hin'o tä ni'isa tä nitetshana Dios.”