Job 21

₂“Che amel let'uhläk letach'otay n'oye,

wet is che letach'ahuyaye olhämtes.

₃Teläytayej tä letach'ahuyay n'oye,

che tefwaytshi elat let'ischeyayej.

₄Oyetyaj itihiyejt'a hin'ok häpe,

häp tä tamenej tä olhakli iyeji.

₅Tä leyahinn'o,

häpkhilek lenuhat amhohen wet lhoyay tam.

₆Che oyen tichunhayaja,

wet onowayhyaj isijyenpe ot'äj.

₇¿Chipte tä kamaj iläyhiche

wichi tä iwoye m'ak tä ni'isachehen,

pajtha thänhäy wet äp takhajayhen?

₈Hiw'en leles lhäy'e lechetsos tä lhaichiyhelthen,

wet äp letamsekis ihiche t'at.

₉Niwohit täjche istunlhi lew'et,

äp Dios nitasnhiya t'at.

₁₀Leläy iwolhat lelesa,

wet leles tek y'inhiche.

₁₁Wichi tä iwoye m'ak tä ni'isachehen leles tiyäjchephä,

tet iwoye tson'ataj les tä ikoyhen.

₁₂Lakäjyaj ihi,

takatinwethä wet t'ichoywethä

tä iwo lechosa n'ofwolis wet n'opum.

₁₃Wichi tä ni'isahen hiw'en m'ak

wet letamsekis ihi nilhokej ifwalas,

pajtha ileyejen honhat.

₁₄Yok, Is che Dios lhaitonte n'ohlähen.

Tek owatläk ohanej m'ak tä lechumyaj.

₁₅¿Atsi m'ak che oisej tä otchumhoplhi

wet owo ot'alhyajaye?

₁₆Olhamel t'at tä okatej m'ak tä owatlä.

Mat olham otichunhayaj tehit'a iwoye lhamel.

₁₇“Wichi tä iwoye m'ak tä ni'isachehen y'inhihent'a

tä kamaj nithänhäya,

tehit'a iwoye isi tä ihanej tä y'om.

Ihichet'a m'ak che ni'isache

che iyejwethä lhamel.

Dios itihiyejt'a lewäk lhamel

wet hiw'enhihot'a leteläythayajay.

₁₈Ihichet'a tä ifwtsatpehentso

che te iwoye hup tä yafwthitaj ifwtsatyenpe honhat.

_19-20Õyäme tä Dios tisichela'pe wichi

häp lhokwey lakeyis.

Mat olham oyok, Is che iyhäj tä ni'isahen

lhamel t'at tä tiskanpe lakeyis.

Is che lhamel hiw'enpe lewit'äyhyaj

wet iyähi n'olhäthi tä Dios

tä laj letumfwaya lewäk tapoyej,

häpkhilek matche tä ilät letasnhayaj.

₂₁Mat che lew'et lheley tä tiskanpe

wichi tä ni'isahen lakeyis,

wet wichitso m'ak ihanhiyejt'a

tsi lep'itseyhay t'at.

₂₂“Niwohit elh che ihanej che ichufwen Dios.

Lham t'at tä ikalelhät pule lheley.

₂₃Iche wichi tä nichäte t'ilek

wet wuj lakhajyhayaj, letamsek ihiche.

₂₄Yätajen lhäy'e tä laj t'inhayaja.

₂₅Iyhäj nitäfwenhit'ach'oye m'ak tä is,

wet y'inhen tä laj lakäjyaja.

₂₆Matlhat nilhokej t'at tä nichäte t'ilek,

w'enhahit'a lhamej t'olis wet iwos tufwen.

₂₇“Ohanej t'at m'ak tä letichunej n'okwe

lhäy'e m'ak tä let'uhläk lewit'äyen n'oyej.

₂₈Niyatey tä ni'isahen nichäte lakapes

wet lewukwey wasiche.

₂₉Mat olham oyok,

Is che letay'ätshanaye wichi tä iwo w'ekyaja.

Is che letach'ahuyaye lhämtes tä yok,

₃₀Che Dios iwo lewäkwa,

wet wichi tä ni'isahen tefwayej,

Dios itasinhit'a lhamel.

₃₁Niwohit elh che yen tesayej lakeyis

wet newache elh che iwo hayahlä.

_32-33Che õyikchufwi lep'itsek

tä õ'häne n'ot'olis,

wichi ichunlä wet iyhäj imälheche len'äyij.

Honhat tä õ'tihi is t'at

wet lhäy'e lhip tä õt'uye.

₃₄“¡Mattajichet'a tä lefwetajay letach'otay n'oye!

¡Asitäyhyajay t'at tä lhenaylhi!”