Job 22

₂“¿Hä lhenet che Dios isej hin'o?

Tej che ahantsaj hin'o thayej,

Dios isiyejt'a.

₃Tej che ais wet laj akeya,

mat Dios tä laj tumfwaya isit'a amej.

₄Tä lham aifwon wet aikalelhät,

tälhiyet'a tä lewoye lhämtes.

₅Tsi tä lewoye m'ak tä ni'isa

wet äp kawoya pesa hach'isukyaj,

häp tä tamenej tä awit'äyhyaj ihi.

₆Tsi lecheyjäntej aiyhäj häp chinaj t'äj,

wet tä lhamel kamaj nitiskana'pe letes,

wet häp tä lesoyej lakhäy pajtha ts'ilakchehen,

tej tä nittäya amej haw'uy thayej.

₇Lew'enhihot'a inät elh tä ichim,

wet lew'enhihot'a lhäk elh tä nichuyu.

₈Tä ahäpe elh tä takhajay wet han'ohyaj ihi,

alhen lewuka honhat tä lhehi.

₉Letolnhathomche takweyey tesalis,

wet lewit'äyen chipenhas.

₁₀Häp tä tamenej tä lhähäy t'at,

wet anowayhyaj iwelkat ame.

₁₁Lhehi t'at honataj, kaw'ena katsi,

wet tet iwoye tä inät inu ame tä hip'o atape.

₁₂“Dios ihi pule tä atojphä.

Lepach'ol iyej t'at katetsel.

₁₃¿Chipte tä lhok, Dios m'ak ihanhiyejt'a.

Iw'echehi pules tä ichalas,

ihanhiyejt'a iwoyneje che itiyej lakalelhthayaj wichi?

₁₄Lefwetaj pules hip'o'pe tet iwoye sak'al,

wet tä lham ilunlhi,

wet hiw'enhiyet'a m'ak tä ihonhate.

₁₅¿Hä kamaj lenukwe n'äyij tä pajche

tä wichi tä ni'isahen inukwe?

₁₆Lhamel y'inhen t'at tä nitaja lewhäy,

tet iwoyek tewok tä tapoyej che inuye.

₁₇Lhamel yok,

Is che Dios tä laj tumfwaya lhaitonte n'ohlähen,

tsi ihichet'a m'ak tä iwoyeje olhamel.

₁₈Mat lham tä yäm tapoyej lew'etes m'ak tä hiw'en,

tsi letichunhayajay tehit'a iwoye lhamel.

₁₉Wichi tä isen akäswethä,

wet iyhäj tä laj letesa t'ischeyejen,

tä hiw'en lhamel tä ni'isahen lewit'äyhyaj,

₂₀lhäy'e lakhäy tä itäj iwunhomche wet nofw t'at.

₂₁“Lhek a'isyene Dios wet wo atamsekayej.

Äp yachajihola m'ak che hiw'enla amho.

₂₂Chumlä lham lechufwenyaj,

wet tihi ahusek nilhokej lhämtes.

₂₃Is che lhäplej Dios tä laj tumfwaya,

häpkhilek ainech'aynhi.

Is che letiyej kanhi

m'ak tä ni'isa tä ihi haw'et,

₂₄wet aka oro nemhit lewo lahaya,

letech'aynej honhat mok

wok tuntey tä ihi tewok n'äyij.

₂₅Che lewoynejetso m'ak tä lewoye,

häp Dios tä laj tumfwaya häpkhila aka oro

wet aka plata tä naya.

₂₆Lham häpkhila akäjyaj,

wet häpkhilek let'ekhayepej.

₂₇Che let'alhe, tach'ahuhila ame,

wet äp lhämlat matche ämet tä let'untejche.

₂₈Lekalhihila m'ak tä lewoye,

wet isi ihutunhichela han'äyij.

₂₉Tsi Dios y'ayhatchä elh tä lhaichäjlhi,

wet ifwayhat elh tä lhay'ayhatchä.

₃₀Che ais alhoho wet laj hach'isukyaja,

wet aifwayhthila.”