Job 28

₁Iche t'at lhipey tä ichufwi honhat

tä õ'tälhtho plata lhäy'e oro,

wet äp õ'lejen.

₂Häp chinaj õ'tälhtho honhat,

wet tuntey tä ni'isa alhoho õ'wachuhathiche

tä õyene chinaj tä ichät tä lhey cobre.

₃Hin'ol ikalhi tä tiyäj honhatch'oye

tä t'ukwe tuntey tä ihi honhat tä ichalaj.

₄Ifwoyenpe lhipey tä ihi honhat,

itonteho n'ow'etes,

itihiche lhipey tä õkninuyakwe,

ifwuhiwethä niyhäy tä ihonhatch'oye

tä atofwehlä wichi.

₅Honhat häp tä n'olhäk tälho,

mat tä tumchä tet iwoye itäj tä lak'e.

₆Häp tä lew'et tuntey

tä ifwak'anhen tä isis

wet oro tä honhat lhayej.

₇Nits'ilakhiyat che miyo lhayis

wok afwenchey tä iyhäjkot

che hiw'ene lhiptso.

₈Itshätäy tä fwitses t'äsihot'a lhiptso,

nits'ilakhiyat che t'owalhaj che inukwe.

₉Hin'o iti'pe takwey tuntey,

wet tijchufwi tachenhas.

₁₀Ifwoynhomche tachenhas

wet tatelhoy hiw'ene

m'ak tä matche tä laha ihi

tä ikänitlhi lham.

₁₁Ikalelhätch'oye lhipey

tä tewok lhayis tälho,

wet ihänho isi m'ak tä nin'älahen

wet nech'e n'älpe.

₁₂¿Mat chi tälhi n'ohanyhayaj?

¿Atsi lhip tä tälho n'otäfwnhayaj?

₁₃Hin'o ihanhiyejt'a laha n'ohanyhayaj,

tsi nilhokaye tä i'pe honhat.

₁₄Lewen'itaj yok, “Ihit'a kana.”

Awalak yok, “Ihit'a n'oyej.”

₁₅Õ'kalhiyejit'a oro,

äp õknikalhiyejit chinaj t'äj che õ'chäjej.

₁₆Tej che õ'fwetaj õ'chäjej

oro tä wuj laha thayej,

äp nikalhiyahi t'at.

Tej tä n'olhamis tä wuj laha

wok tuntey tä isis thayej,

ikalhihit'a.

₁₇N'ohanyhayaj iwohiyet'ak õ'thatlä oro tä lhamya,

tsi laha tefwaype oro wet cristal.

₁₈Tej che tuntey tä isis tä wuj laha,

mat w'awulhihit'a n'ohanyhayaj.

₁₉Häp tuntey tä ika'tuhen tä tälhe Etiopía,

w'awulhihot'a n'ohanyhayaj.

Tej che oro tä isajya thayej.

₂₀¿Chi tälhi n'ohanyhayaj?

¿Atsi lhip tä tälho n'otäfwnhayaj?

₂₁Tek lhain'ältej nilhokej m'ayhay

tä iläyhiche tä i'pe honhat,

lhäy'e afwenchey tä ipuleye.

₂₂Tej tä n'ot'ilek wet n'op'itsekw'et yok,

“Tajlhame tä w'et olät'atch'oye.”

₂₃Mat Dios tä nitäfwelej

lhip tä n'ohanyhayaj ihi,

wet ihanej ihi n'äyij tä tataye.

₂₄Tsi lham hiw'en t'at nilhokej honhat lhipey

wet nilhokej m'ak tä ichufwi pule.

₂₅Tä Dios hiw'enho p'ante

leyalh lhayis lakhajyhayaj,

wet yen pesa inät,

₂₆wet äp yenlhi pelhay keyis

wet iwo n'äyija pelhay

häpkhilek y'ajpe honhat,

₂₇te hiw'en n'ohanyhayaj wet itetshan,

yelhte wet iwo lahaya.

₂₈Wet Dios ifwenho wichi wet yok:

“Huminayn'o wet woyaye olhämtes tä Awukn'o,

häpkhilek lehan m'akej.

Atontehlä m'ak tä ni'isa,

häpkhilek n'äl tä lehan honhatej.”