Job 3

₃“Isi p'antek n'am newhi oko,

isi p'antek n'am newche.

₄Isi p'antek ifwalatsi lhayen honatsiya

wet nin'änhiya'pe honhat,

wet Dios tä ikaphä nenhiya lelhakliya.

₅Isi p'antek honataj yen kweneka ifwalatso

wet pule tä ichalaji lhaip'oyejpe,

häpkhilek ifwala matche tä lenowayhyaj ihi,

tet iwoyek y'om laka isi.

₆Isi p'antek honataj tim honatsi

tä nech'e oihi oko,

häpkhilek nemhit iyej p'ante

iyhäj honatsis tä ihi nekchäm.

₇Isi p'antek honatsitso lajit m'akahi,

wet wichi nit'änhiyawethä tä laj lakäjyaja.

₈Isi p'antek hiyawul tä ikänchi honatsitso,

häp lhamel tä ihanej tä ineyhatphä Leviatán,

m'akitaj tä alhutas tak.

₉Isi p'antek katetsel tä ifwalawos nemhit isiche,

wet isi tä õ'niwhi nämhit'a,

wet n'änhit'ahlä che ifwala isatlä.

₁₀Onchuwete honatsi p'ante onchäthihchä

tä iwahin n'oyej m'ayhay tä äyteschehen.

₁₁“¿Chipte tä n'am t'il p'ante

tä kamaj oihi oko lakahi?

¿Chipte tä n'am t'il p'ante

tä nech'efwaj tä oiche?

₁₂¿Chipte tä õp'ante ipalakn'o

wet äp õtifwkatlhin'o?

₁₃Che oy'inhi p'ante, oihin'et katsi,

otamsek ihihin'e t'at, owo ot'elakw'eta,

₁₄op'akhiyejn'e niyatey

tä yenchelhi hupuy tä wasiche,

₁₅lhäy'e n'oniyatyajwos

tä iskon lhamej lakäywet tä wuj.

₁₆¿Chipte p'ante tä õkniskatan'o

che ote iwoye han'äfwaj tä y'inhi

tä niw'enaye isi?

₁₇Wichi tä ni'isahen lakapes häpe n'ot'olis,

lhäy'e iyhäj tä t'elkas ilänhen hap'akej.

₁₈Wichi tä õ'chumyene mhaji lechumet tä äytajche,

lhamel iwo t'elakw'eta tä ihi n'op'itseyhayw'et,

lewuk nemhit isukunej lechumet.

₁₉Lhiptso häp tä äp ihi elh tä laj lewujyaja

lhäy'e elh tä lewujyaj ihi,

wet n'okawo tefwayej lewuk.

₂₀“¿Chipte tä Dios iwahnej

elh tä atha len'äyij häp isi,

wet äp iläyit elh tä lepayhyaj ihi?

₂₁N'ot'ilek tä õ'niwhi tä ninäma,

tet iwoye n'okäywet tä õtjänlä tä õt'ukwe.

₂₂Tajlhamet che hin'o nichäte n'ot'olis,

wet nech'e tä lakäjyaj ihi.

₂₃¿Chipte tä Dios hiw'enho lew'atshancheyaj

elh tä nikalelhäja len'äyij,

wet äp ilafwlhi?

₂₄“Oyakw'etej olhech'ethayaj,

ot'änyajay oy'ayhthiyejent'a.

₂₅Nichät n'o'pe m'akmhaj onowayhlä.

₂₆Lajit ot'elakw'eta,

matche tä äytaj otichunhayaj.

Lajit otamseka, tajlhamet olhakli.”