Job 34

₂“Ch'ahu n'oye, amel tä a'ahantses,

tetshanay olhämtesna.

₃N'ok'ajch'o ihanej m'ak tä akäj

lhäy'e m'ak tä ni'akäja.

Wet n'och'ote tet iwoye,

tä iläte n'olhämtes, ihanej iyhäj tä isen

lhäy'e iyhäj tä ni'isahen.

₄Wet häp tä oyok, Lhek n'atetshan,

häpkhilek y'ahanej m'ak tä iyej Job.

₅Tsi yok, Otes ihihit'a,

mat Dios n'äyej n'oho

lakalelhthayaj tä is alhoho.

₆Che ofwetaj otes ihi, mathichet'a.

Olätsek ichesit'a,

tej tä n'am wo ch'isukyaja thayej.

₇“¡Ihichet'a elh che te iwoye Job!

Iläkwlhi Dios che te iwoye inät tä oyäyej.

₈Ihumin tä ihänlhi wichi tä ni'isahen,

lhäy'ewethä wichi tä awit'äyhtses.

₉Yäme tä hin'o m'ak ikalhihit'a

tä fwetaj lhaikäntejlhi Dios.

₁₀“Mat amel tä a'ahantses, ch'ahuyay n'oye.

Dios tä laj tumfwaya

häpe Elh tä is alhoho,

iwohiyet'a m'ak tä ni'isa.

₁₁Tispe elhpej m'ak at che iwoye.

Hiw'enho m'ak at che t'uhawetej che hiw'enho.

₁₂Matche tä Dios tä laj tumfwaya

niwoyaye m'ak tä ni'isa,

tek inuhattshi m'ak tä is alhoho.

₁₃Wohit'a täjche hiw'enho lakhajyhayaj

tä lhayen niyatayej imälhewek honhat.

_14-15Che isoyej hin'ol lew'atshancheyaj,

wet tan'isichelawek tä y'inhen,

pajla'tha honhat mok t'at.

₁₆“Che lehan honhatej, ch'ahu n'oye,

tetshan t'at olhämtes tä ofwel amho.

₁₇Che Dios y'ulhanhi m'ak tä is alhoho,

ihanhiyejt'a che iwoye niyat lechumet.

Isit'ak letiyej letes

häp lham tä lakhajyhayaj ihi

wet äp is alhoho m'ak tä iwoye.

₁₈Che ni'isahen niyatey,

Dios yen at w'et m'ayhaya.

₁₉Tek hits'ilkat niyatey che ihumin,

wet hiw'awlhatejchä lehumnhayaj

tä itiyej wichi tä hiw'en m'ak

lhäy'e häp p'elitses,

tsi nilhokej lhamel tä lhenhay t'at.

₂₀Hin'ol y'inhenpej honajche,

wichi tä tanuhanhen tatäylhipej,

wet khajnhas nemhit iche,

lakhajyhayaj nofwen.

₂₁Tsi Dios itetshanpej m'ak tä wichi iwoye

wet iyahinpej lhip tä inukwe.

₂₂Ihichet'a honataj tä ichalaji

che iskat elh tä takawit'äynhan.

₂₃Dios tek y'ithat hin'ol lewhäy

che ichätyenho n'okalelhthayaj.

₂₄Iwasthiche hin'ol tä wus

wet äp ithat lew'etho iyhäj.

Tek tay'ätshanejlhi che is m'ak tä iwoye.

₂₅Tsi nitäfwelej m'ak tä lhamel iwoye,

wet che honatsi äp iwasthichepej.

₂₆Itech'aynej iyhäj che anikoyis tä itasnhen,

hiw'enyenej nilhokej wichi,

₂₇tsi lhamel tach'ahuhiyet'a

wet äp nitetshana lhämtes.

₂₈Tä lhamel nip'altsena p'elitses,

wet häp tä p'elitses t'änch'oye Dios

wet lham tach'ahuye t'at.

₂₉Mat che Dios yok tam,

¿atsihilak yen tesa?

Che iskat tatey, ¿atsihilak hiw'en?

Mat itetshan t'at wichi,

₃₀häpkhilek hin'o tä ni'isa

lhaknena niyatayej lhamel

wet äp nifwech'enawethä.

₃₁“¿Hä alefwelejo Dios hach'isukyajay?

¿Hä lhok, Nemla oyachajo och'isukyaj?

₃₂¿Hä let'alhe Dios che ipäyen ame

akeyis tä kahanahläk lewoye?

¿Hä lhok, Nemla owoye m'ak tä ni'isa?

₃₃Mat tä kahuminache m'ak tä Dios iwoye,

¿hä lhenet che iwohiyela m'ak tä lehuminche?

Alewuk t'at m'ak tä lewoye, olhamhit'a.

Fwel n'ohohen atichunhayaj.

₃₄“Ahantses tä ilät n'oye

wet iyhäj tä lehusey ihi yohlak,

₃₅Job yämet m'ak tä nhanayej.

Lhämtes m'ak nitälhaye t'at.

₃₆¿Atsi m'ak tä õnlhoke tä ilech'oye Job,

tsi lhämtes tet iwoye awit'äyhtsaj?

₃₇Ts'ilakhit'a ch'isuk,

y'isej t'at tä lhayen Dios tayhfwaya.

Iläkwlhi Dios tä ihi tä olhamel ottache,

wet yäm wuj lhämtes tä tatayejlä.”