1-2Am tä lhämej n'oye otes
tä ohäpe Dios tä laj tumfwaya,
leyej tä letatay n'ohlä
wet chulho m'ak tä oyäme.”
Job lhay'ayhatchä
3Tä Lhawuk ileyej lhämet, wet Job nichulho tä yok:
4“Ihichet'a m'ak che onchulhej amho.
W'et om'ayek t'at.
5Wujmatpey olhämtes. Lepes t'at.”
Dios yachajo tä tahuyej Job
6Wet Dios yachajo tä tahuyej Job tä ihi pelhay tä yafwuteji. Wet yok:
7“Awaklhathen, akhajyen,
wet chulh n'oho tä oty'ätshan ameje m'ak.
8¿Hä lefwetaj otes ihi
mat am laj atesa?
9¿Hä lefwetaj akhajyhayaj te iwoye okhajyhayaj?
¿Hä lefwetaj achos te iwoye ochos
tä häpe pelhay t'ajnhayaj?
10Che mälhyejtso, ¡that atape awujyaj,
w'uyhi han'ohyaj lhäy'e asilatyaj tä lefwetaj i'amej!
11¡Yahin wichi tä lhaichäjwethä,
is che aka'tshayaj y'ayhatchehchä lhamel!
12¡Is che awäk tä äytajche
ithat katsi lhamel!
¡P'ajtitchehchä lhip at che ihi
häp wichi tä ni'isahen!
13¡Jänchehlä lhamel,
en anaytshayaji n'ot'ilekw'etes
tä honataj ihi!
14¡Wet olham ontäfwenhiyeja tä akhajyhayaj
häp tä lekalheji täjtso!
Dios itichunyenche Job häp iwu lhayis tak
15“Lhek tetshan iwu lhayis tak tä wujtaj.
Häp tä olhenek t'at, tet iwoye am,
wet tuj hup tet iwoye w'asetaj.
16Lew'en tä t'unchehen lechäyi t'isanis,
wet t'isanis tä ilech'oye takhajayhen.
17Lechäs tet iwoye pänhichetek tä t'un,
wet lesätäy tä ihi t'isan iwo lakotsola.
18Lhiley lhäy'e takäläy wusche,
tet iwoye chinhas tä t'unchehen.
19Häpe olhenek tä lhamya,
wet tajlhamat olham tä ohanej tä otumlä.
20Tuj hup tä i'pe tachenhas
tä itshätäy tä fwitses ihipej
tä yen käjyaja.
21Imächufwi hupelis,
weskatchufwi hon'al tä hip'o'pe iyhät.
22Hal'äy lehupelis hip'o'pe,
wet sichuyukwat tä iwhäye tewok lhäsaj ilunejlhi.
23Che tewok tapoyej, nowayhiyet'a.
Tej che inät i'pe lenhus,
mat iwo letamseka.
24¿Atsi tä ikalhi tä itonphä
wet äp ilanche tatelhoy
wok inayhit lenhus?
