Job tach'ahuye Dios lhämet wet lhay'ulhan
1Tä Lhawuk ileyej lhämtes tä iwoye, wet Job nichulho wet yok:
2“Nech'e ohanej tä am
tä nilhokej m'ak tä lekalhi,
wet m'ak at che häpe che lhetne,
matche t'at.
3Isit'a m'ak tä owoye mathi
tä ottayejlä achumtes
häp olhämtes tä laj lehanyhayaja.
Oyäme mathi m'ak tä n'am hanej,
oyen lhämeta m'ayhay tä n'am täfwelej
tä inu'pe otichunhayaj.
4Ammat tä lhok,
Ch'ahu n'oye tä otahuy amej,
wet chulh n'oho tä oty'ätshan ameje m'ak.
5Pajtha athana ts'ilak tä olät hach'oye,
mat nech'e ottelhoy t'at tä aiw'en.
6Häp tä tamenej tä olhay'ulhan,
wet ottayhiphä mok'otaj
tsi owo ohusek elha.”
Dios wuj tä itiyej lakäpfwayaj Job
7Tä Lhawuk ileyej tä tahuyej Job, te äp ifwenho Elifaz tä yok:
–Lhäy'e unfwas wuj tä owäkw i'amejen, tsi isit'a alhoho m'ak tä amel lhämej n'oye, tehit'a iwoye okawo Job.
8Wet häp tä oyok, Chumaye siete w'asetas lhäy'e tson'atas wet hoye okawo Job. Enaylhi atapehen awunek, wet okawo Job y'alhyenlan'o amehen. Wet otch'ahuhiyela t'alhyaj wet otihit'ala amejen awit'äyhyaj. Tsi amel matche tä ach'isukwis, isit'a alhoho m'ak tä lhämej n'oye, tehit'a iwoye okawo Job.
9Tä mälhyejtso, Elifaz, lhäy'e Bildad, wet Sofar, lhamel iwoye Lhawuk lhämet, wet Lhawuk tach'ahuye lakawo Job tä y'alhyene lhamel.
10Tä paj wet Lhawuk hiw'enho Job m'akn'aj tatäyej, wet äp ithatpe iyhäj. 11Wet nilhokej lepuhfwas tä hin'ol lhäy'e tä atsinhay ihoye, lhäy'e lakalay'is tä pajchehen, wet lhamel tachufwiyej tä iwo lakäjyaja. Wet lhamel tahuyej tä yok:
–Is tä tajyäme awit'äyhyaj.
Tsi tefwayej tä Lhawuk yäm äytajche m'ak tä itiyej. Wet lhamel hiw'enho chinaj t'äj, äp hiw'enho n'ofwujhi tä oro.
12Lhawuk takäpfwaye Job, ifwayhatpe tä itiyej nekchämis tä pajchehen. Nech'e catorce mil (14.000) tson'atas, seis mil camellos, dos mil w'asetas tä n'ochumyenhay, wet mil asnolis. 13Te catorce leles tä hin'ol wet tres tä atsinhay. 14Atsinha tä thaläkw lhey Jemima, elh tä yiklhache lhey Cesia, wet elh tä imälhhen lhey Keren-hapuc. 15Ihichet'a atsinhay tä isis tä i'pe honhat che te iwoye Job les tsinhay. Wet lajcha itech'aynej leles tä hin'ol tä hiw'enho lakäywet lhip.
16Tä tälhe tähestso, Job kamaj iläyhi ciento cuarenta (140) nekchämis, wet hiw'enpe lechetsos leles wet äp leles. 17Wet tä nem koyhyaj tä hich'ut, häp tä y'il p'ante.
