Job 5

₁“Che let'än, ¿atsihilak nichulh amho?

¿Atsi ángel tä akachi letihi?

₂Elh tä amukwe laka'tshayaj ilän,

wet elh tä lefwitseyaj ihi

nichätho t'at t'ilek.

₃Ow'ente elh tä amukwelhi,

tet häp che is lhenek,

mat yofwajkwet nemhit is lewukwe.

₄Leles wohit'a täjche t'uyehen,

n'okalelhthayajwos hip'altsenhit'a lhamel,

wet ihichet'a elh che tach'ote.

₅Lakäs tä wak'alh

nehläs länhay yäpil'atlä,

tej m'ak che hap'akej ch'uthanil,

mat itälhtho t'at,

wet ayhthatses ikäne lakhäy.

₆Tsi n'olhakli tälhihot'a holo,

wet n'oteläythayaj tälhit'a'pe honhat.

₇Hin'o t'at tä yenlhi m'ak wit'äyhyaj,

tet iwoye miyo les tä wey'ähen.

₈“Olham oyok, is che alep'altsene Dios

wet lhachaje lham takwey m'ak tä tamen amej.

₉Lham yenlhi m'ayhay tä wus

tä n'am hanej che oy'ithat,

lhäy'e m'ak tä otseltejpej

tä n'am hanej che otetshanlä.

₁₀Ichenpej pelhay tä itsäype honhat

wet ipumyen nilhok alhotaj.

₁₁Ineyhatphä lhamel tä laj lewujyaja,

wet y'upthen lhamel tä lelhakli ilänhen.

₁₂Yen at w'et m'aka akantses lhetnhayajay,

äp nikalhtache m'ak che fwetaj iwohiye.

₁₃Itsokhiwethä lehanyhayajay

häp wichi tä fwetaj ihan m'akej,

äp nikalhtache wichi tä ni'isahen lhetnhayajay.

₁₄Tej che ischä, tet häp che honatsiyej.

Tä ifwala isi, tanhäphänlhi t'at.

₁₅Dios ifwayhthen wichi tä p'elitses,

wet äp ifwayhtej n'ofwajnhat

iyhäj tä n'olänyaj itiyej.

₁₆Lham häpe p'elitses leniwhayaj,

wet hip'ohiche lak'as wichi

tä iwoye m'ak tä ni'isachehen.

₁₇“Elh tä Dios ifwone,

häpe t'at lakäpfwayaj tä is.

Yej t'ulhan Awuk tä laj letumfwaya tä aifwon.

₁₈Tsi lham häpe tä iwo lätseka elh,

wet äp inayhitpe.

Che lham tä y'aj elh, wet äp y'up'at.

₁₉Ilhatpe tä aifwayhthiyeja awit'äyhyaj,

wet äp tek iwahnhila amej m'ak at che ni'isa.

₂₀Aifwayhthiyeja nifwotaj fwajnhat,

wet äp tejlat che nehläs i'amej,

mat kat'inhiya t'at.

₂₁Ifwayhthila amej n'olhämtes tä õ'ti amej,

wet tek lenowayhiyela m'ak wit'äyhyaj che häpe.

₂₂Let'ischeyhiyeja nehläs

lhäy'e m'ak wit'äyhyaj,

wet tek lenowayhiyela itshätäy tä fwitses.

₂₃Tuntey tek inuhlahlä achumtes,

te akalay'isla itshätäy tä fwitses.

₂₄Atamsek ihihila tä lhehi haw'et,

wet che leyahne akäywetes,

niwohit elh che tatäy.

₂₅Lew'enla tä wuj ales,

tehlat iwoye hon'al tä i'pe honhat,

pajla'tha nichäte lepes lheley.

₂₆Che lechäte hach'utyaj,

wet kamaj atkhajaylhi t'at,

tsi atehlat iwoye yachuyaj lha

tä wak'alh lhoy.

₂₇Tep'attso m'ak tä olhamel ohanej.

Ch'ahuye wet tetshan, häpkhilek aisej.”