Job 7

₁“Hin'o tä i'pe honhat äytajche lechumet,

tet iwoye chumaj tä tachumlhi nilhokej ifwalas.

₂Tet iwoye n'okwenek

tä niteläjlä che lhay'up'at,

wet tet iwoye n'ochumyenek

tä iniwhihlä lakaha.

₃Häp tä otetso,

iwel'apej iwel'apej m'ak tälhiyet'a,

honajchepej tä oteläythayaj ihi.

₄Che omä katsi, oyok,

¿Chihlatek onephä?

Mat honatsi pitaj

wet och'ola pajtha ifwalayej.

₅Ot'isan iwos tapoyejej,

ot'äj tek n'äleji t'ähes lhäy'e lemok,

wet äp iwot t'ila, äp tasuy'atpe.

₆Oka ifwalas tajila lepes

wet äp newache oniwhayaj.

Tsi iläfwenhen, tet iwoye

n'oyikcha tä n'okach'es.

₇“Dios, lhek tichune

tä ow'atshancheyaj tet iwoye leyalh.

Äp yachajihot'ak ow'enla m'ak tä is.

₈Nemhit õ'yahnhila n'o'pe,

wet am atey nemla hiw'enn'o

tsi äp oihichet'ala.

₉Tet iwoye pule tä nofw, tatäy t'at,

tettso n'oelh tä tiyäjo n'op'itsekw'et,

pajihit'ak inuphä.

₁₀Yäpnhiyet'a lew'et,

wet iyhäj nemhit hiw'en.

₁₁Häp tä tamenej tä n'am ch'etej olhaklis,

oyämhiyela, opitsajiyejela

m'ak tä tapay tä ihi ohusek.

₁₂¿Chipte tä nem lewahintshin'o

tä letech'ayen n'oyej inät lheletaj?

₁₃Che oyok, Ohowet iwo otamseka,

wet nahati iwäjyenla otichunhayajay,

₁₄leskon n'oye m'ak tä äyteschehen tä omä,

wet lestun n'oyej ofwilhey tä tanhoch'achehen.

₁₅Is che õhp'ohi oyalh n'äyij,

tsi owatläk oy'il t'at.

₁₆Okalhihit'a, nemhit is che oläyhi.

Wo otamseka, tsi ot'unhit'a.

₁₇“¿Atsi m'ak tä häpe hin'o

wet chipte tä wuj tä lewo haya?

¿Chipte tä lhen atichunhayaja?

₁₈¿Chipte tä letetshan ifwalaspej

wet äp lhelhte nilhok lewhäy?

₁₉¿Chihlatek leleyej tä leyahinn'o?

Nits'ilakhiyat che otim okhofw.

₂₀Lajit whäya tä letetshan wichi.

Che nem otch'ahulhi, tek oaikänchi.

¿Chipte tä lhenn'o atiyäjeka?

¿Chipte tä nemla leteläyit n'oyej?

₂₁¿Hä tek letäyhat och'isukyaj?

¿Hä tek letäyhat m'ak tä ni'isa tä owoye?

Pajiyejt'a wet oihlachufwi honhat.

Che let'u n'okwe, oihichet'ala.”