Job 9

₂“Matche t'at m'ak tä tetso,

mat hin'o ihanhiyejt'a iwoyneje

che yämhoplhi Dios wet yok,

Otes ihihit'a.

₃Che iwoye t'at che inokwajejlhi,

ihanhiyejt'a iwoyneje che nichulho

m'ak at che häpe che Dios tay'ätshane.

₄Dios häpe ahantsaj,

te lakhajyhayaj äp wuj.

¿Atsi tä lhayäm t'unlä

wet is t'at p'iya? Ihichet'a.

₅Iwelkate tä Dios y'ayhthen tachenhas,

itilhkatchehchä tä wuj tä lewäk ihi.

₆Lham hiw'ahhathi honhat

wet isichäthi lhipey tä t'unejiche.

₇Lham tä ninuhtaphä ifwala,

wet äp nin'älitahen katetsel.

₈Lham ts'ilak t'at tä hich'enhi pule,

wet äp w'eleklhi'pe inät tä iwo lhetheya.

₉Lham tä yenlhi pule lheley,

lhäy'e kates tä iyhäj lhaihutej,

lhäy'e iyhäj tä nitäkw tä lhaihänwethä,

lhäy'e iyhäj tä tumej tapinhiye.

₁₀Lham tä yenlhi m'ayhay tä wus

tä n'am hanej che oy'ithat,

lhäy'e m'ak tä otseltejpej

tä n'am hanej che otetshanlä.

₁₁Tej che lham inu olhipche,

tha äp n'am w'enhitpe,

wet häp tä n'am täfwelej.

₁₂M'aklak ikatej, ¿atsihilak ilehatche?

¿Atsihilak yok, atsi m'ak tä lhenlhi?

₁₃Che Dios tawäkwäy, nofwiphät'a tha,

hip'ajtejche katsi lhamel tä tach'ote p'ante Rahab,

inät lheletaj.

₁₄“¿Atsi olhämtes che otshupyene

häpkhilek otayhtejlä Dios?

₁₅Tej tä ois alhoho,

tha ohanhiyejt'a che onchulho,

tsi lham t'at tä Okalelhthayajwo

wet olhaip'altsene.

₁₆Che ot'alhe lakalelhthayaj,

tach'ahuhlat n'oye,

mat n'am nenhiyet che iwohiyela olhämettso.

₁₇Ilänla n'oyej pelhay tä äytajche,

wet äp y'ayhthitshila olätshay tä laj otesa.

₁₈Ipayyenhilhilan'o

wet äp niwahnhila n'oyej che ot'iyalhi.

₁₉Che y'äme lakhajyhayaj,

wet matche t'at.

Che ot'änejlä okalelhthayaj,

ihichet'a elh tä inityene.

₂₀Tej tä ois alhoho wet laj otesa,

mat olhämteslak ikalelhätn'o tä otes ihi.

₂₁“Tej tä ois alhoho,

mat oy'elej on'äyij.

₂₂Nilhokej m'ak tä häpe t'at,

wet häp tä oyok,

Dios itäyhthen wichi tä ni'isahen

lhäy'e iyhäj tä isen.

₂₃Che m'ak tä ni'isache

ihämtej lhamel tä le'isyaj ihiche,

wet Dios akäjejlhi lewit'äyhyaj.

₂₄Inayhitpe n'okalelhthayajwos tatey

wet hiw'enho honhat häp wichi

tä iwoye m'ak tä ni'isachehen.

Che kahäpeya Dios, ¿wet atsi tä häpe?

₂₅“Oka ifwalas iläfwenhen,

inu'pe n'ochenek.

Ow'enhit'a m'ak at che is.

₂₆Tä yik, tet iwoye n'ohi tä t'ilin, iläfwel.

Leläfwyhayaj tet iwoye miyo

tä nakelche lelänek.

₂₇Che oyok, op'ethethilahlä

otichunhayaj tä äytaj

wet on'älthila okäjyaj tä i'pe ottey,

₂₈m'ak tä äytaj kamaj in'oyej wet istunpejn'o,

tsi ohanej tä Dios yenhiyet'ak

ohäpe elh tä is alhoho.

₂₉Wet che lham tä yen n'oye elh tä letes ihi,

¿chi iwoyek w'et olhaikhajyen t'at?

₃₀Tej che olhailejlhit thayej,

onityen tä olejchehen otkweyey,

₃₁kamaj Dios y'uythila n'okwe

chowej tä iyhät ihi,

wet tejlak ow'uyis y'ulhanhila n'oyej och'ohle.

₃₂“Dios tehit'a iwoye hin'o,

wet häp tä n'am hanej che otahuyej wet oyok,

Mäh n'ahoye n'okalelhthayajw'et,

häpkhilek kalelhäj elh tä letes ihi.

₃₃Ihichet'a elh tä len'ohyaj ihi

tä okachi itihi häpkhilek itetshan n'ohen.

₃₄Is t'at che Dios ileyej tä itasinlhin'o

lhäy'e tä istunlhi n'oyej m'ak tä äytajche,

₃₅häpkhilek otahuyej tsi nemhit onowaye.

Mat tä niteyatso, wet okalhihit'a.