Joel 2

₁Afwutache tson'ataj ch'u tä ihi Sión,

häp chenaj tä Lhawuk t'amajchet,

häpkhilek wichi ihanlä lewit'äyhyaj.

Is chik nilhokej amel

tä lheyayhi honhat tä Judá

lechettiyejchehen anowayhyaj,

tsi atott'a alhoho Lhawuk laka ifwala.

₂Tehlat iwoyek honatsi i'pe honhat,

wet pule lhayis nämla, ichalajilahchä.

Häp nifwotaj tä lakhajyhayaj ihi

lhäy'e tä äp nitäkw,

lhamel lhailhahatpe chenhas,

tet iwoye ifwala hutunhay tä nech'e fwamlafwaj.

Õ'hanhiyejt'ak õhw'en,

wet nipajiyahit chik õhw'enla.

₃Lhamel tet iwoye itäj

tä ihämit nilhokej m'ak tä inukwe.

Honhat tä kamaj ninuyakwe letamsek t'at,

tet iwoye yachuyajw'et tä Edén p'ante.

Mat lhip tä pajche tälhche

nech'e ts'anis t'at,

niwohit m'ak chik imälhehi.

₄Tet häp yel'atas wet iläfwenhen,

tet iwoye yel'atas tä tiyäjo n'oka'tshayaj.

₅Tä lhamel tiyäjche'pe chenhas,

lepakas te iwoye kaletas tä n'oka'tshayajchal,

wet äp te iwoye hal'äy tä tamchäy lepak tä õ'wunho.

Lhamel te iwoye nifwotaj tä wuj

tä wak'alh tä iwo laka'tshayaja.

₆Wichi tä hiw'en täjtso wet y'ilejen,

lhäy'e tä tate'pelis w'enha lhamej.

₇Tsi lhamel tet iwoye n'oka'tshayajwos

tä inukwe alhoho tä inuyehen letayhfwas

wet taw'ulhche'pe n'olafwey

tä tuntey tä hupuy lep'otes.

Tatshupiche lhip tä inukwe,

ihichet'a elh chik tatsay.

₈Tafwomhit'awethä lhamejen,

elh tefwajni inukwe lhip tä inukwe.

Tej tä õhp'ohlä len'äyij,

mat tafway lhip elhe tä hap'akwekhen.

₉Tä inuye hupuy, inukwe alhoho

tä tiyäjpe n'olafwey tä tuntey.

Wet taw'ulhche'pe hupuy,

tiyäjchehen ventanas,

tet iwoye etantses.

₁₀Wet honhat w'ahuhi tä ihi tä lhamel tatache,

wet pule äp w'ahuye,

wet ifwala lhäy'e iwel'a nem isiche,

wet katetsel tatäy tä isiche.

₁₁Wet Lhawuk tä t'än tä ichunlä laka sip'äl,

mälhyej iwoye pelhay tä t'ajan.

Wet nemhit õ'hanej chik õ'wo t'ufwahtesa sip'ältso,

tsi wujtaj'atpey lhamel tä iwoye Lewuk lhämtes.

Tsi m'ak wit'äyhyaj tä wuj tä äytaji,

häp tä ihi Lhawuk laka ifwala,

wet newache elh chik ikalhi.

₁₂Lhawuk yok:

“Mat athana tapilay n'oye,

mälhetwek achowhal.

Yej t'ekhen, änhen wet afwchehchä.”

₁₃Nayahit'a tä lech'esajche haw'uyis

tä lefwetaj lhen atetnekayej

tä wuj tä alhakli ihi.

¡Woyay ahusey iyhäja

wet tapilaye Awuk Dios!

Tsi häpe Dios tä is wet äp hap'altsentsaj.

Wuj tä lehumnhayaj ihi,

wet äp nakenhiyejt'a lewäk,

iteläytej t'at.

Ihumin tä itäyhtejen wichi letes,

ihuminhit'a tä itiyej letasnhayaj.

₁₄Elat iwo elha letichunhayaj wet aitasnhihent'a,

wet itihla amejen lakäpfwayaj

tä häpe yachuyaj lhoy lhäy'e hat'es,

häpkhilek lhen Awuk Dios t'awayhata.

₁₅Afwutache tson'ataj ch'u

tä ihi chenaj tä Sión.

Änehen wichi yämthilek

lhaihute Lhawuk wet lhaichuyhathen.

₁₆Hutwek Dios kawichi

wet en t'amajchetesa.

Hutwek hin'ol tä thänhäy, n'atfwas,

lhäy'e iyhäj tä kamaj tiphen,

lhäy'e wichi tä nech'e tewhayeyhen.

Is chik lhamelna inukwephä

tä tälhchufwi lew'et

wet ihoye iyhäj tä lhaihutwek.

₁₇Häp sacerdotes tä tachumhilhi Lhawuk Lew'et lhip

tä lepe tumej lhip elh

wet altar tumej lhip elh,

is chik lhamel tafwchehchä wet yok:

“Iwuk, täyhtej letes aka wichi.

Yej wahnej chik wichi iyhäj

iläkwlhi olhamel tä oalewuk.

Yej wahnej iyhäj honhatil chik ifwihat.

Isit'ak iti n'oyejen lhämet

tä leläkwyhanyaj tä yok,

¿Chip ihitso aka Dios?”

₁₈Lhawuk nech'e hin'älit

tä wuj tä ihumin laka honhat

wet hip'altsene laka wichi.

₁₉Wet nichulho lhamel wet yok:

“Lhek yahinya, ochenla amehen yachuyaj lhay,

lhäy'e hat'es, lhäy'e aceite,

häpkhilek amel lew'en m'ak tä naya

wet atamsekis ihi.

Nemla oyachajo chik owahnej

wichi iyhäj chik ailäkwethä.

₂₀Te otonthiyela ahilähen

häp chol tä tälh tafwojhiye,

wet ochenhiyela honhat tä ts'anis.

Iyhäj tä ichun nathihola lewomekitaj

tä tumej tä ifwala tälhche wet hich'ahen.

Wet iyhäj tä imälhechehen len'äyij nathihola lewomekitaj

tä tumej tä ifwala y'uy wet hich'ahen,

wet najutla lep'itseyhay.

¡Oyämla wus m'ak tä owoye!”

₂₁Honhat, wo akäjyaja wet yej noway,

tsi Lhawuk yämla wus m'ak tä iwoye.

₂₂Amel, itshätäy tä lheyayhi tayhi, yej noway.

Tsi häp tä huphas tä i'pe honhat nech'e w'atshanhihena,

wet hal'äy iwohla lhaya,

wet higos lhäy'e uvas wujlatpe.

₂₃Jerusalén lheley,

is chik amel akäswethä

wet akäjejlhi Awuk Dios.

Tsi ichen amehen pelhay chik lewatlä

tä ihi fwiy'etil lhäy'e yachup,

tet iwoye ifwalas tä pajche ichepej.

₂₄Nech'e ihichela yachuyaj lhay tä wuj,

lhäy'e uvas, lhäy'e häp aceite.

₂₅“Wet oyachajila amehen achumtesnaj tatäy

häp nekchämisnajtso tä chol ikänchi yachuyaj.

Olham t'at tä otayhtej ahilähen

häp choltso tä tet iwoye nifwotas.

₂₆Mat tälhe ifwalasna let'ekhenla,

tsi häp tä ihichela äk tä naya,

häpkhilek lewunitayn'o tä ohäpe Awuk Dios.

Tsi olham oyenlhi amhohen

m'ayhay tä wuj tä isis,

wet nemla oka wichi len'äfwlhi ihi.

₂₇Amel, Israel lhayis, letäfwenla n'oyej

tä olham tä ohäpe Awuk Dios tä oi'amejen,

wet ihichet'a elh.

Wet nemla oka wichi len'äfwlhi ihi.

₂₈“Chik tafwaytshi häp m'ayhayna,

otsäyhla'pe oka Espíritu nilhokej wichi.

Häp ales tä hin'ol lhäy'e tä atsinhay

yenla silätyaja m'ak tä häpe oka Espíritu lhämet,

wet hin'ol tä thänhäy tafwilhanhihena,

wet mamses hiw'enla lew'enhay.

₂₉Wet okawos tä hin'ol lhäy'e tä atsinhay

otsäyhla'pe oka Espíritu chik nichäte ifwalastso.

₃₀Wet opäynhiyela m'ayhay tä wus lhäy'e tä isis

tä ipuleye lhäy'e tä ihonhate tä iselkathihena wichi:

häp w'oyis, itäj, lhäy'e tutsaj tä wuj.

₃₁Wet ifwala nech'e honatsi ihihila,

wet iwel'a mälhhiyejat w'oyis,

tä kamaj ninäma Lhawuk laka ifwala tä wuj

lhäy'e tä iche m'ak tä äytaj.”

₃₂Mat elh chik häpe chik t'änch'oye Lhawuk, tafwayhla.

Wet iyhäj wichi tä ihi Jerusalén lhayämthihena,

mälhyej tä pajche Lhawuk ifwenho.

Lhamel tä Lhawuk pajche t'ähiche y'inhihent'ala.