Jonás 1

₁Lhawuk tahuyej p'ante Jonás, Amitay lhäs, wet ifwenho tä yok:

₂–Mäh hoye Nínive, häp hupuy tä wuj, wet wo silätayej wichi tä ihi, olak, “Lhawuk yok, Otay ahilähen, tsi otoyench'oya häp wuj m'ak tä ni'isa tä ihi amel haw'et.”

₃Mat Jonás iwohiyet'a, yik tä ilethanlä Lhawuk. Ihoye hupuy tä lhey Jope wet hiw'en barco tä itaye Tarsis, wet tiskanpe lehi wet tiyäjo yämlek yikche. ₄Mat Lhawuk ichene p'ante ihwokwetaj tä wuj tä äytaji tä yafwutpe awalak, wet wuj pelhay tä iche, wet täy lhimphaj chik wasi lehi. ₅Wet lewos wuj tä nowayhen wet elhpej t'änch'oye laka dios. Wet lhamel iwom lelhuk tä ihi barco, ithate awalak yämlek lhäy'e lhip tä nichoyhata lehi. Mat pajche inuhchä p'ante Jonás tä iho lech'oye lehi wet imähi, häm wuj tä imä. ₆Wet barco kaniyat ihoye Jonás wet yok:

–¿Atsi m'ak tä lewoye, nahati länek? ¡Lhek nephä, änch'oye aka Dios! Elat lham n'aitetshan wet n'aifwayhtej lhawit'äy yämlek kay'atäyalhi.

₇Wet lewos tahu lhamejen wet yok:

–Huwa, n'akoyej suerte yämlek y'ahanej ihi elh tä häpe tä tumenej tä lhawit'äy ichät lhatapehen.

Wet lhamel ikoyej suerte, wet itshupiye Jonás.

₈Wet lhamel nech'e y'ätshene p'ante Jonás tä yok:

–Lhek fwen n'ohohen, ¿atsi tä tamenej tä lhawit'äyna ichät lhatapehen? ¿Atsi m'ak tä häpe achumet wet chi tä letälhi? ¿Atsi tä aka honhat? ¿Atsi wichi tä ahäpe?

₉Wet Jonás ichulho tä yok:

–Ohäpe Hebreo lhayis elh wet on'okwiyejpej Owuk Dios tä ipuleye, häp lham tä yenlhi p'ante honhat lhäy'e awalak.

₁₀Wet äp ifwenho lhamel häp m'ak tä tumenej tä ihi barco, wet yok:

–Olethanlä Owuk Dios.

Tä lhamel iläte, wet wuj tä nowayhen wet y'ätshene tä yok:

–¿Chipte tä lewoye täjna?

₁₁Wet tä lhäy'epej lhip tä fwitsaj awalak, lhamel y'ätshene Jonás tä yok:

–¿Atsi m'ak chik oayene yämlek awalak iwo letamseka n'oyejen?

₁₂Wet Jonás ichulho tä yok:

–Chumay n'oye wet that n'oye inät häpkhilek iwo letamseka. Tsi ohanej tä olham tä otumenej tä pelhay tä äytajina ichät atapehen.

₁₃Mat lhamel wuj tä lhaikhajyenhen p'ante tä ihutlä inät yämlek ichätyene honhat häp lehi. Mat lhamel nikalhahi, tsi lhäy'e lhip tä fwitsaj inät. ₁₄Tä mälhyejtso, lhamel nech'e t'änch'oye p'ante Lhawuk wet yok:

–¡Iwuk, olhamel olhaip'altsen ame, tek is chik hin'ona tumenej olhamel chik oy'inhen! ¡Wet chik naj letesa, yej ti n'oyejen otes chik y'inhila! Tsi häp am, Iwuk, lewoye m'ak tä am lehuminche.

₁₅Wet nech'e lhamel ichuma p'ante Jonás wet ithate awalak. Wet iwo letamseka inät, noj tä fwitsaj. ₁₆Tä lhamel hiw'en, wuj tä nowaye p'ante Lhawuk. Wet lhamel ilän tshäwet tä iwo lew'ayhata Lhawuk, wet ifwenho lhämet tä yäm kalelhäj tä yok:

–Olhamel on'okwihila amej.

₁₇Mat Lhawuk iwaklhatej p'ante häp w'ahat tä wujche yämlek tim Jonás. Häm ihi fwalas tres wet honatsis tres tä lham ihi w'ahat lets'e.