Jos 12

₁Häp täja lheyis häp niyatey tä Israel lhayis ikalhi p'ante tä tumej Jordán lhip tä tumej hichä, lhäy'e honhates tä lhamel ikalhi, tälhe tewok tä lhey Arnón yäk nichäte chenaj tä Hermón, imälhewek honhat tä Jordán lhip tä tumej hichä: ₂Iche häp Amorreo lhayis kaniyat tä lhey Sehón tä lew'et hupuy tä Hesbón. Lham leniyatyaj y'ajpe honhat tä Galaad lechowej, tälhe hupuy tä Aroer tä tataye tewok Arnón lhip, wet tälhe tewok lhiptso yäk nichäte tewok tä lhey Jabok tä ihi Amón lhayis kahonhat lepes. ₃Wet häte niyatej p'ante tewok Jordán lhip tä tumej hichä, tälhe lewomek tä lhey Kineret yäk nichäte Lewomekitaj Nosoy. Häp honhat tä tataye hupuy tä Bet-jesimot tä tumej tapinhiye, yäk nichäte chenaj tä lhey Pisga.

₄Häte Israel lhayis ikalhi p'ante niyat tä lhey Og tä ihi Basán, häp gigantes tä Refaím lhayis tä lepes lheley häp tä elh. Lham yen p'ante lew'eta hupuy tä Astarot lhäy'e Edrey, ₅wet niyatej p'ante honhates tä tälhe chenaj tä Hermón, lhäy'e häp lhip tä lhey Salka, lhäy'e mälhewek honhat tä Basán yäk nichäte lepes Gesur tä tumejlä, lhäy'e Maaca, yäk nichäte lepes p'ante Sehón kahonhat, häp niyat tä ihi Hesbón.

₆Häp Lhawuk lakawo Moisés lhäy'e Israel lhayis, lhamel ikalhi p'ante niyateytso. Wet Moisés hiw'enhomche p'ante honhatestso häp wichi tä tälhe letes Rubén, lhäy'e wichi tä tälhe letes Gad, lhäy'e lechowej wichi tä tälhe letes Manasés.

₇Häp täja lheyis niyatey tä Josué lhäy'e Israel lhayis ikalhi tä ihi honhat tä tewok Jordán lhip tä tumej kaphä, tälhe hupuy tä Ba'al-gad tä ihi chenhas tä Líbano lakawayhi, yäk nichäte chenaj tä lhey Halak tä tataye Seír. Josué hiw'enhatejen Israel lhayis häp honhatestso tä lhamel ikalhi, yämthilek lhayen lewuhuya: ₈häp honhat tä chenhas lhäy'e lakawayhil, lhäy'e honhat tä ifwache tewok Jordán, lhäy'e lhipey tä nistakchehchä, lhäy'e ts'anis, lhäy'e honhat tä lhey Négueb. Häp honhatesna tä Israel lhayis ikalhi, lewuhuy häpehen Het lhayis, Amorreo lhayis, Canaán lhayis, Ferez lhayis, Hiv lhayis, lhäy'e Jebús lhayis.

₉Häp täja lheyis honhates tä Israel lhayis itäyhthen niyatey tä ihi: Jericó, N'owastsek, hupuy tä tott'aho Betel, ₁₀Jerusalén, Hebrón, ₁₁Jarmut, Lakis, ₁₂Eglón, Gezer, ₁₃Debir, Geder, ₁₄N'otäyhyaj, Arad, ₁₅Pelaj, Adulam, ₁₆Makeda, Betel, ₁₇Tapúa, Hefer, ₁₈N'olafwek, Sarón, ₁₉Madón, Hasor, ₂₀Simron-merón, Aksaf, ₂₁Taanak, Meguido, ₂₂Kedes, Jokneam tä ihi Carmelo, ₂₃Dor tä ihi honhat tä lhey Dor, Goyim tä ihi Gilgal, ₂₄lhäy'e Tirsa. Iche treinta y uno niyatey tä Josué lhäy'e Israel lhayis ilänhen.