Jos 13

₁Tä Josué nech'e häpe hin'o tä hich'ut t'at, Lhawuk tahuyej wet yok:

–Athana nech'e lechätho nekchämis tä lech'ut t'at, wet kamaj wuj honhates tä imälhehi yämthilek lekalhi: ₂Imälhewek Filisteo lhayis kahonhat, lhäy'e imälhewek honhat tä lewuk Gesur lhayis, ₃tälhe tewok tä lhey Sihor tä ihi Egipto lhip tä tumej hichä, yäk nichäte hupuy tä Ekrón tä tumej tafwojhiye, häp honhat tä lewuk t'at wichi tä Canaán lhayis. Wet iche cinco niyatey tä häpehen Filisteo lhayis tä yen lew'eta: häp niyat tä ihi Gaza, Asdod, Askalón, Gat, lhäy'e Ekrón. Häte imälhehi Hiv lhayis kahonhat ₄tä tumej tapinhiye, lhäy'e imälhewek Canaán lhayis kahonhat, tälhe hupuy tä lewuk Sidón lhayis yäk nichäte lhip tä lhey N'olafwek tä tumejlä Amorreo lhayis. ₅Häte iche Gebal lhayis kahonhat, lhäy'e imälhewek chenhas tä Líbano tä tatay hichä, wet tälhe hupuy tä lhey Ba'al-gad tä iwhäye chenaj tä Hermón, yäk nichäte n'äyij tä tiyäjche chenhas kawayhi tä ihi Hamat. ₆Nilhokej Sidón lhayis lhäy'e wichi tä yen lew'eta chenhas, tälhe Líbano pajtha nichäte Misrefot-maim, olham oyokwesila lhamel tä ihi tä Israel lhayis tatache. Wet am one'tek lew'enhatejen honhat häp Israel lhayis, mälhyej tä pajche one'tek lewoye. ₇W'enhomche honhates häp wichi tä tälhehen letetsel tä ihi nueve, lhäy'e lechowej Manasés laka wichi, yämthilek lhayen lewuhuya.

₈Häp Rubén laka wichi lhäy'e Gad laka wichi, lhäy'e lechowej Manasés laka wichi, lhamel pajche ikatej honhat tä Lhawuk lakawo Moisés yen p'ante lewuka tä ihi Jordán lhip tä tumej hichä. ₉Häpe t'at honhat tä tälhe hupuy tä Aroer tä ifwache tewok tä lhey Arnón, lhäy'e hupuy tä ihi lechowej häp honhattso, lhäy'e mälhewek chenhas lhip tä w'awulhchä, tälhe Medeba pajtha nichäte Dibón. ₁₀Häte nilhokej hupuy lhayis tä lewuk Sehón, Amorreo lhayis kaniyat tä ihi Hesbón, pajtha nichäte Amón lhayis kahonhat lepes. ₁₁Häte õtajej lhamel honhat tä lhey Galaad, lhäy'e Gesur, lhäy'e Maaca, lhäy'e chenaj tä Hermón, lhäy'e mälhewek honhat tä Basán pajtha nichäte Salka. ₁₂Häte honhates tä pajche niyat tä lhey Og tä ihi Basán lhayen p'ante lewuka tä lham ihi Astarot lhäy'e Edrey. Häp niyattso häpe gigantes tä Refaím lhayis tä lepes lheley elh. Moisés pajche ikalhi p'ante wichitso wet yokwes lhamel. ₁₃Mat häp wichi tä lew'et Gesur lhäy'e Maaca, Israel lhayis yokwesit'a. Wet ihi t'at lew'etes, wet yäk häp fwalasna kamaj wichitso iyej t'at Israel lhayis.

₁₄Mat häp wichi tä tälhe letes Leví, Moisés tek hiw'enho honhat. Tsi m'ak tä õhw'enhatej lhamel häpe lhip tä tälhe m'ayhay tä wichi yen t'awayhata Lhawuk tä õ'wunhomche tä õyen n'okhayajayej lham tä häpe Israel lhayis laka Dios. Häp täjtso m'ak tä Lhawuk ne'tep'antek Moisés iwoye.

₁₅Moisés hiw'enhomche p'ante honhates häp Rubén laka wichi, õhw'awlhatej t'at lhamel tä wusche'pe. ₁₆Wet lhamel laka honhat tälhe hupuy tä Aroer tä ihi tewok tä Arnón lhip, lhäy'e hupuy tä ihi lechowej honhat tä ifwache tewoktso, lhäy'e mälhewek chenhas lhip tä w'awulhchä tä iwhäye Medeba. ₁₇Tälhe täja pajtha nichäte Hesbón lhäy'e nilhokej hupuy lhayis tä iche chenhas lhip tä w'awulhchä, häp hupuy lhayis tä lheyis Dibón, N'owuk Kachenhas, Bet-ba'al-meón, ₁₈Jahas, Kademot, Waj T'änyaj, ₁₉Hupuy Täkwfwas, Sibma, Seret-sahar tä ihi chenaj tä ihi lakawayhi, ₂₀Bet-peor, Bet-jesimot, lhäy'e chenaj tä Pisga lhipey tä nistakchehchä.

₂₁Tä mälhyejtso, Rubén laka wichi lhayen lewuka nilhokej hupuy lhayis tä iche chenhas lhip tä w'awulhchä, lhäy'e mälhewek honhat tä lewuk p'ante Sehón, häp Amorreo lhayis kaniyat p'ante tä ihi Hesbón. Moisés pajche ikalhi Sehón lhäy'e niyatey iyhäj tä ihi Madián tä lhamel tach'ote häp Sehón. Häp lhamel lheyis Eví, Rekem, Zur, Hur, lhäy'e Reba. ₂₂Häte Israel lhayis ilän n'ältshantsaj tä lhey Balaam tä häpe Beor lhäs, lhäy'e wujpe wichi iyhäj.

₂₃Häp tähestso hupuy tä wus lhäy'e tä niwusa tä Moisés yen p'ante lewuhuya häp Rubén laka wichi. Hiw'awlhatej t'at iyhäjpej tä lhalepuhfwas, pajtha nichäte tewok Jordán.

₂₄Häte Moisés hiw'enhomche honhates häp Gad laka wichi. Õhw'awlhatej t'at iyhäjpej tä lhalepuhfwas. ₂₅Honhat tä lewuk lhamel häpe hupuy tä Jazer, lhäy'e nilhokej hupuy lhayis tä ihi Galaad, lhäy'e lechowej häp Amón lhayis kahonhat, pajtha nichäte hupuy tä Aroer tä tatayhlä Hup Lhokwetaj, ₂₆lhäy'e honhat tä tumejlä Hesbón lhäy'e Ramat-mispa lhäy'e Betonim, wet tälhe Mahanaim pajtha nichäte Debir lepes. ₂₇Häte lhayen lewuka häp Sehón laka honhat tä imälhehi, wok oyok, hupuy lhayis tä ihi chenhas kawayhi tä lhamel lheyis Hup Tojphä, T'owalhajw'et, Sukot lhäy'e Safón. Tä mälhyejtso, Gad kawichi kahonhat tälhe tewok Jordán lhip tä tumej hichä, wet lepes nichäte lewomekitaj tä lhey Kineret lhip tä tumej tapinhiye.

₂₈Häp tähestso hupuy tä wus lhäy'e tä niwusa tä Moisés yen p'ante lewuhuya häp Gad laka wichi. Hiw'awlhatej t'at lhamel tä wusche'pe.

₂₉Häte Moisés hiw'enhomche honhates häp lechowej Manasés laka wichi. Hiw'awlhatej t'at iyhäjpej tä lhalepuhfwas yämthilek lhayen lewuhuya. ₃₀Häpe t'at nilhok honhates tä pajche lewuk häp niyat tä lhey Og tä ihi Basán. Wok oyok, mälhewek Basán tälhe Mahanaim, lhäy'e sesenta lhipey tä wichi ihiche tä Jaír lhayen lewuka, ₃₁lhäy'e lechowej honhat tä Galaad, lhäy'e hupuy tä Astarot lhäy'e Edrey. Nilhokej hupuytso tä õyen lewuka Manasés lhäs tä lhey Maquir leles tä lepes lheley. Õhw'awlhatej t'at lhamel tä wusche'pe.

₃₂Häp tähestso honhates tä Moisés hiw'enhomche p'ante Israel lhayis yämthilek lhayen lewuhuya. Täjp'ante ihi honhat tä Moab lhip tä w'awulhchä tä tumej Jordán lhip tä tumej hichä tä tatayhlä hupuy tä Jericó, Moisés hiw'enhatejen lhamel nilhokej häp honhatestso. ₃₃Mat Leví lhayis Moisés tek hiw'enhomche honhat. Mat tahuyej lhamel wet yok:

–Israel lhayis Lewuk Dios häp tä amel akäywet.