Häp honhates tä lewuk Manasés laka wichi
1Häp tähesna honhates tä lewuk wichi tä tälhe Manasés, häp José lhäs tä lechunkatsek. Iche Manasés lhäs tä lechunkatsek tä lhey Maquir, häp Galaad lajcha, wet häpe hin'o tä wuj tä ihanej tä iwo laka'tshayaja. Wet õhw'enho honhat tä Galaad lhäy'e Basán tä tumej Jordán lhip tä hichä. 2Wet honhates tä tumej Jordán lhip tä tumej kaphä õtajej wichi iyhäj tä tälhe Manasés. Wok oyok, häp Abiezer leles, Helec leles, Asriel leles, Sikem leles, Hefer leles, lhäy'e Semida leles.
3Matkat häp Zelofehad tä häpe Hefer lhäs tä letes Manasés, häp hin'otso newache lhäs, ts'ilak leles tsinhay. Lheyis Mahla, Noa, Hogla, Milca lhäy'e elh tä lhey Tirsa. 4Atsinhaytso lhamel ihoye p'ante sacerdote tä lhey Eleazar, lhäy'e Josué, lhäy'e Israel lhayis kaniyatey, wet tahuyej tä yok:
–Lhawuk ne'tehtek Moisés hiw'en n'ohohen honhates, mälhyej tä hiw'enhomche owithohoy.
Tä mälhyejtso, Josué iwoye t'at m'ak tä Lhawuk ne'tek õ'woye. Hiw'enho atsinhaytso honhates tä lewuk, mälhyej tä hiw'enhomche lewithohoy. 5Häp tä tamenej tä Manasés laka wichi ikatej diez honhat lhipey, lhäy'e honhates tä ihi Galaad lhäy'e tä ihi Basán tä tumej Jordán lhip tä hichä. 6Tsi atsinhay tä oyämene ikatej honhates tä lewuk lhamel, mälhyej iwoye hin'ol. Honhat tä Galaad lewuk häp Manasés leles iyhäj.
7Tä mälhyejtso, Manasés kawichi kahonhat tälhe Aser lhayis kahonhat pajtha nichäte hupuy tä Mikmetat tä tatayhlä Sikem. Tälhe täja línea tiyäjche tä tapinhiye pajtha nichäte inät tä ihi Tapúa. 8Wet tej tä honhattso tä Tapúa ihi lewuhuy häp Manasés kawichi, mat Tapúa, häp hupuy tä ihi línea, lewuk t'at Efraín kawichi. 9Tälhe täja línea tiyäjche tä tapinhiye pajtha nichäte tewok lhäsaj tä lhey Kaná. Häp hupuy lhayis tä tumej tewok lhäsaj lhota tä tapinhiye, lewuk Efraín kawichi, tej tä ihi Manasés kahonhat thayej. Wet Manasés kahonhat lepes inukwe tewok lhäsaj lhota tä tumej tafwojhiye, pajtha nichäte lewomekitaj Mediterráneo. 10Tä mälhyejtso, tewok lhäsaj lhota tä tumej tapinhiye lewuk Efraín, wet lhota tä tumej tafwojhiye lewuk Manasés. Wet honhates tä lewuk Aser kawichi häp tä tumej tafwojhiye, wet Isacar kawichi kahonhates tumej hichä. 11Wet iche hupuy lhayis tä lewuk Manasés tä lhamel ihi Isacar kahonhat lhäy'e Aser kahonhat. Lhamel lheyis Bet-seán, Ibleam, Dor, Endor, Taanak lhäy'e Meguido, lhäy'e wichi lew'etes tä tott'ahomche lhamel, lhäy'e chenhas tä ihi tres. 12Matkat Manasés kawichi ikalhihit'ak yokwes häp Canaán lhayis tä lew'etes tähestso. Wet lhamel ihi t'at, yikhit'ach'oye. 13Tä paj Israel lhayis nech'e takhajayhen. Mat yokwesit'a Canaán lhayis tä ihi laka honhattso, mat yen lakawosa, ichumyene lechumet tä äytajche.
José leles lhayen lewuhuya häp tayhi lhayis
14-17Ifwala elh José leles, wok oyok, häp Efraín kawichi lhäy'e Manasés kawichi, lhamel ihoye Josué wet tahuyej tä yok:
–¿Chipte tä tefwajni honhat tä lew'en n'ohohen? Tsi olhamel owujpey wet Lhawuk takäpfway n'oyehen.
Josué nichulho lhamel wet yok:
–Tä wujpe amel wet iyhäj laj lew'eta tä lheyayhi chenhas tä lewuk Efraín, tä mälhyejtso, hoyaye honhat tä Ferez lhayis kahonhat lhäy'e Refaím lhayis kahonhat, wet owajchephäla tayhi lhayis.
Lhamel yok:
–Matche, honhat tä olhamel oihi w'awulhiyejt'a olhamel. Wet häp Canaán lhayis tä lew'et honhat tä w'awulhchä, lhamel hiw'en kaletas tä n'oka'tshayajchal tä chinhas. Lhamel ihi Bet-seán lhäy'e lew'etes tä tott'ahomche, wet iyhäj yen lew'eta lakawayhi tä lhey Jezreel.
Wet Josué nichulho lhamel wet yok:
–Wujpey amel wet lhäy'e lhip tä akhajyhayaj ihi. Tä mälhyejtso, tajlhamhiyet'ala honhat lhip tä pajche oyachaj amehen. 18Mat lhäy'ehila chenhas tä tayhi i'pe chik alewuhuyla, wet lhowajichephäla wet lewoyayhla kotsayej. Wet häp Canaán lhayis tä lhämene, tej tä takhajayhen wet hiw'en kaletas tä n'oka'tshayajchal tä chinhas, mat häte lhokwesichephäla lhamel.
