Häp hupuy tä õhw'enho Leví lhayis
1-2Tä Israel lhayis ihi p'ante hupuy tä Silo tä ihi honhat tä Canaán, häp Leví lhayis kaniyatey lhamel ihoye sacerdote Eleazar, lhäy'e Josué, lhäy'e nilhokej Israel lhayis iyhäj kaniyatey. Wet tahuyej tä yok:
–Lhawuk ifwenhohte Moisés tä t'uhläk õhw'en n'ohohen hupuy lhayis yämthilek olhamel oyen ow'eta, lhäy'e lhipey yämthilek lew'et iche tä ot'ekyenwethä oläy.
3Tä mälhyejtso, Israel lhayis hiw'enho Leví lhayis elhpej hupuy tä lewuk lhamel, lhäy'e lhipey yämthilek lew'et ihi chik hit'ekyenwethä leläy, mälhyej tä Lhawuk ne'tek lhamel iwoye. 4Wet õ'chunkat Leví lhäs Coat kawichi tä tälhe sacerdote Aarón p'ante. Wet tä õ'wo sorteaya, õtajej lhamel trece hupuy tä ihi honhates tä lewuhuy wichi tä tälhehen letetsel Judá, Simeón lhäy'e Benjamín. 5Wet iyhäj Coat kawichi õtajej diez hupuy tä lewuhuy wichi tä tälhehen letetsel Efraín lhäy'e Dan, lhäy'e lechowej Manasés kawichi.
6Wet Leví leles iyhäj tä letes häpe Gersón, õtajej lhamel trece hupuy tä lewuhuy wichi tä tälhehen letetsel Isacar, Aser lhäy'e Neftalí, lhäy'e lechowej Manasés kawichi tä lhamel lew'et Basán. 7Wet iyhäj Leví leles tä lhamel letes Merari, õtajej lhamel doce hupuy tä lewuhuy wichi tä tälhehen letetsel Rubén, Gad lhäy'e Zabulón.
8Mälhyejtso tä Israel lhayis hiw'enhomche Leví leles häp hupuy lhayis, lhäy'e honhates yämthilek lew'et ihi leläy tä hit'ekyenwethä, mälhyej tä Lhawuk ifwenho p'ante Moisés yämthilek lhamel iwoye.
Häp hupuy lhayis tä lewuhuy Coat lechetsos tä tälhe Aarón
9Häp hupuy tä owo lheyisa athana ihi Judá kawichi kahonhat lhäy'e Simeón kawichi kahonhat. 10Mat häpe t'at tä õhw'enho Leví lhäs Coat kawichi tä tälhe sacerdote Aarón p'ante yämthilek lhamel yen lew'etesa. Tsi lhameltso häp tä ichun tä õhw'enhomche p'ante honhates yämthilek lew'et. 11Õhw'enho lhamel häp hupuy tä lhey Kiriat-arba, wok oyok, Hebrón, tä ihi chenhas tä ihi honhat tä lewuk Judá kawichi. Häp täjtso hupuy tä lhamya tä pajche lewuhuy gigante tä lhey Anak leles. Wet õhp'ajtej honhates yämthilek Aarón leles tä lepes lheley leläy lhäkw'et. 12Mat häp yachuyajw'etes lhäy'e wichi lew'etes pajche õhw'enho Caleb tä Jefone lhäs yämthilek lewuk.
13Hebrón häpe hupuy tä õyen n'oletnhaweta häpkhilek elh chik ilän elh ihoye wet ihi. Wet tä õhw'enhomche Aarón leles tä lepes lheley yämthilek yen lew'eta, häte õhp'ajtej hupuy tä lheyis täja: Pelaj, 14N'owujyaj, Estemoa, 15Holotaj, Debir, 16Aín, Juta, lhäy'e Fwala Wukwe. Nueve hupuyna, elh weihalhapej õhp'ajtej t'at honhat lhip tä leläy lhäkw'et. 17-18Wet häte õhw'enho lhamel cuatro hupuy tä ihi Benjamín kawichi kahonhat tä lheyis Gabaón, Geba, Anatot, lhäy'e Almón. Wet elh weihalhapej õhp'ajtej t'at honhat lhip tä leläy lhäkw'et.
19Tä mälhyejtso, iche trece hupuy lhäy'e honhates tä leläy lhäkw'etes tä õhw'enho sacerdotes tä Aarón leles tä lepes lheley.
Häp hupuy lhayis tä lewuhuy Coat leles iyhäj
20-22Wet iyhäj Leví leles tä tälhe Coat, õhw'enhomche lhamel häp cuatro hupuy tä ihi Efraín kawichi kahonhat. Elh lhey Sikem, häp hupuy tä õyen n'oletnhaweta häpkhilek elh chik ilän elh ihoye wet ihi. Wet iyhäj lheyis Gezer, Kibsaim, lhäy'e Bet-horón, lhäy'e honhates tä leläy lhäkw'etes. 23-24Wet häte õhw'enho lhamel cuatro hupuy tä ihi Dan kawichi kahonhat tä lheyis Elteke, Gibetón, Ajalón lhäy'e Gat-rimón. Wet elh weihalhapej õhp'ajtej t'at honhat lhip tä leläy lhäkw'et. 25Wet häte õhw'enho lhamel hupuy tä ihi Manasés kawichi kahonhat tä lheyis Taanak lhäy'e Ibleam, lhäy'e lhipey tä leläy lhäkw'etes.
26Tä mälhyejtso, iche diez hupuy tä õhw'enho Leví leles tä tälhe Coat, lhäy'e honhates tä leläy lhäkw'etes.
Häp hupuy lhayis tä lewuhuy Leví leles tä letes häpe p'ante Gersón
27Wet häp Leví leles tä iyej Gersón kawichi, õhw'enho lhamel hupuy tä lewuk Manasés kawichi lechowej elh, lhäy'e lhipey tä leläy lhäkw'etes. Elh lhamel lhey Golán tä ihi honhat tä Basán, wet häpe t'at hupuy tä õyen n'oletnhaweta häpkhilek elh chik ilän elh ihoye wet ihi. Wet hupuy elh lhey Beestera. 28-29Wet häp honhates tä lewuk häp Isacar kawichi, õhw'enho Leví leles cuatro hupuy tä lheyis Äytaj, Daberat, Jarmut, lhäy'e Inät Lafwey. Wet elh weihalhapej õhp'ajtej t'at honhat lhip tä leläy lhäkw'et. 30-31Wet häp honhates tä lewuk Aser kawichi, õhw'enho lhamel cuatro hupuy tä lheyis T'alhyaj, Abdón, Yachuyajw'et, lhäy'e Alhotaj. Wet elh weihalhapej õhp'ajtej t'at honhat lhip tä leläy lhäkw'et. 32Wet häp honhates tä lewuk häp Neftalí kawichi, õhw'enho lhamel tres hupuy tä lheyis Kedes, Hamot-dor lhäy'e Kartán, lhäy'e honhates tä leläy lhäkw'etes. Kedes ihi Galilea wet häpe hupuy tä õyen n'oletnhaweta häpkhilek elh chik ilän elh ihoye wet ihi.
33Tä mälhyejtso, iche trece hupuy tä õhw'enho häp Gersón kawichi, lhäy'e honhates tä leläy lhäkw'etes.
Häp hupuy lhayis tä lewuhuy Leví leles tä letes häpe p'ante Merari
34-35Wet häp Leví leles iyhäj, wok oyok, lhamel tä letes häpe p'ante Merari, õhw'enho lhamel cuatro hupuy tä ihi Zabulón kawichi kahonhat tä lheyis Jokneam, Karta, Dimna, lhäy'e Nahalal, lhäy'e honhates tä leläy lhäkw'etes. 36-37Wet häp honhates tä lewuk häp Rubén kawichi, õhw'enho lhamel cuatro hupuy tä lheyis Beser, Jahas, Kademot, lhäy'e Waj T'änyaj, lhäy'e honhates tä leläy lhäkw'etes. 38-39Wet häp honhates tä lewuk häp Gad kawichi, õhw'enho lhamel cuatro hupuy tä lheyis Ramot, Mahanaim, Hesbón, lhäy'e Jazer, lhäy'e honhates tä leläy lhäkw'etes. Ramot ihi Galaad wet häpe hupuy tä õyen n'oletnhaweta häpkhilek elh chik ilän elh ihoye wet ihi.
40Tä mälhyejtso, iche doce hupuy tä õhw'enho häp Merari kawichi, lhäy'e honhates tä leläy lhäkw'etes.
41Wet nilhok hupuy tä lewuhuy Leví leles tä ihi Israel lhayis kahonhates, iche cuarenta y ocho, lhäy'e honhates tä leläy lhäkw'etes tä hupuy ihiche lechowhal. 42Häp tä mälhyej p'antetso, elh weihalhapej leläy lhäkw'et ilunejlhi t'at, wet hupuy ihi lechowej.
Lhawuk yäm matche lhämet p'ante iwoyeje Israel lhayis letetsel
43-44Mälhyejtso tä Lhawuk yäm matche lhämet p'ante ifwenho häp Israel lhayis letetsel. Hiw'enhomche honhates häp Israel lhayis wet lhamel ihi t'at, wet yen lew'eta wet letamsekis ihi. Wet letayhfwas ihanhiyejt'a iwoyneje yämthilek ikalhi, tsi Lhawuk hiw'enho lakhajyhayaj lhamel wet ikalhi t'at letayhfwas. 45Wet matche t'at, nilhokej Lhawuk lhämtes p'ante ischehen tä ifwenho letetsel, häpe t'at tä iwoyeje Israel lhayis. Niwohit elh chik imälhehchä chik niwoyaye.
