Lev 14

₁Lhawuk tahuyej Moisés wet yok:

₂–Häp täja lakey t'inhayaj länek tä õ'lejej lakokhayaj tä iyeji t'inhayaj tä ni'isa tä i'pe t'äj. Õ'hänhiyela häp sacerdote ₃wet inuhiphäla tä ihi wichi lew'et, yikhilachufwi tä itetshan. Wet chik hiw'en t'inhayaj länek tä ichesej t'inhayaj tä iwo lakam'osa, ₄wet ne'tehlak õ'chäje täkwfwas afwenche lesas tä iläyhen tä laj lech'ohleya häpkhilek ilejej lakokhayaj, lhäy'e hal'ä tä pänhichetek, lhäy'e n'oyik tä niyäkw tä ichät, lhäy'e häp hal'ä tä lhey hisopo lhachafwaj tä lew'ole ihi. ₅Wet sacerdote ne'tehlak õ'län elh afwenche les wet õ'ti'pe n'okähi tä iyhät tä inät tä tälhe hits'ifwik ihi, häpkhilek lew'oyis nitsäyho. ₆Wet tachumhiyela häp afwenche lhäs elhaj tä n'ila, lhäy'e hal'ä tä pänhichetek, lhäy'e häp n'oyik tä niyäkw tä ichät, lhäy'e hal'ä tä lhey hisopo lhachafwaj tä lew'ole ihi, wet y'uythihola afwenche tä pajche y'il lew'oyis tä lhayej inät tä tälhe hits'ifwik. ₇Wet chik tajyäme täja, itsäyhichela siete veces hin'o tä õ'lejej lakokhayaj tä iyeji t'inhayaj, wet häp tä ikalelhthiyeja tä nemhit kok'aye. Wet afwenche lhäs elhaj häp tä iwahnhitshila.

₈“Wet hin'o tä õ'lejej lakokhayaj iwohiyet'ak nilejahen lew'uyis, wet äp is chik inay, wet yäm nofw lew'oley tä yähäs, häpkhilek nofw tä kok'aye. Wet nech'e häp tä iwohiyela chik yäple wichi lew'et, mat äp kamaj ihla ayej alhoye siete ifwalas. ₉Wet chik nichäte siete ifwalas, wet is chik yachajo tä yähäsila nilhokej häp lew'oley tä ihi lhetek, lhäy'e lepäsey, lhäy'e tatechasey, lhäy'e nilhokej lepusey. Wet äp ilejihena lew'uyis wet äpte inayhla, wet häp tä nech'e mathichela tä nofw tä kok'aye.

₁₀“Wet chik nichäte ifwala elh tä y'ununche, wet tachumhiyela täkwfwas tson'ataj les tä hin'ol tä isis tä newache m'ak chik iyej, lhäy'e häp tson'ataj lhäs tä atsinha tä hiw'en tefwaji nekchäm tä isilataj tä newache m'ak chik iyej. Wet is chik tachuma seis kilos y medio harina tä matche tä is tä tälhe yachuyaj lhay, tä häpe otw'ayhat tä õ'tsäye aceite. Wet äpte is chik tachuma medio litro aceite. ₁₁Wet sacerdote ihänhiyela carpa tä olham owukwe lepe häp hin'o tä ilejej lakokhayaj, lhäy'e nilhokej häp m'ayhay tä yen otw'ayhata, wet itihihila tä ottache. ₁₂Wet nech'e tachumhiyela elh tson'ataj les tä hin'ol, wet y'isiyeja lhip aceite. Häpe t'at otw'ayhat tä tiskanejpe hin'o letes, wet sacerdote itihla n'oye. ₁₃Wet õ'länla tä ihi lhip tä n'ot'amajchetej itshätäy tä õ'länhen tä õtiskanejpe n'och'isukyajay lhäy'e häp itshätäy tä õ'wunhomche. Tsi otw'ayhat tä õ'womejpe hin'o letes häpe m'ak tä lhäy'e lhip tä ot'amajchet, wet õhw'enhathiyeja häp sacerdote, te iwoye otw'ayhat tä õtiskanejpe n'och'isukyaj.

₁₄“Chik tajyäme täja, wet sacerdote tachumhiyela lhip häp tson'ataj lhäs lew'oyis, wet ilänhiyeja hin'o tä ilejej lakokhayaj lech'ote tä lefwomkat lets'e, lhäy'e lefwuj lhokwe tä ihi takwey tä lefwomkat häp tä ilänhiyeja, wet äp ilänhiyeja lefwuj lhokwe tä ihi lepach'o tä lefwomkat. ₁₅Wet tachumhiyela lhip häp aceite wet itsäyhihola lham takwech'o tä lets'amkat. ₁₆Wet y'uythihola lefwuj tä ihi takwey tä lefwomkat, wet itsäyhla'pe siete veces häp lhip tä ihi tä olham ottache. ₁₇Wet aceite lhip tä imälhehi tä ihi takwey, sacerdote tachumhiyela lhip wet ilänhiyeja lech'ote tä lefwomkat lets'e häp hin'o tä ilejej lakokhayaj, lhäy'e lefwuj lhokwe tä ihi takwey tä lefwomkat tä ilänhiyeja, wet äpte ilänhiyeja lefwuj lhokwe tä ihi lepach'o tä lefwomkat. Itihla'pe itshäwet tä õtiskanejpe letes lew'oyis tä pajche iyejen lech'ote lhäy'e lefwuj lhokwe, lhäy'e lefwuj lhokwe tä ihi lepach'o. ₁₈Wet lhip tä imälhehi aceite häp tä ilänhiyeja lhetek häp hin'o tä ilejej lakokhayaj. Wet häp tä nech'e otäyhthiyeja'pe hin'o letes häp sacerdote lechumet tä iwoye.

₁₉“Chik tajyäme täjtso, wet sacerdote ihänla n'oye tson'ataj lhäs tä atsinha tä õ'län tä õtiskanejpe hin'otso lech'isukyaj, häpkhilek olejej lakokhayaj tä iyej. Wet chik tajyäme täja, wet äp ihänla n'oye tson'ataj lhäs elhaj häpkhilek iwunho ₂₀tä i'pe altar, hip'ajthiyeja n'olhäk tä tälhe yachuyaj lhay. Wet chik sacerdote yachaj n'oye m'ayhaytso, wet häp tä otäyhthiyeja hin'o letes wet nofwila tä kok'aye.

₂₁“Chik amostas länek häpe elh tä p'elitsaj, wet hiw'enhit'a m'ak tä w'awulhej tä wuj chik iwom, is chik tachumhiyela tson'ataj lhäs tä hin'o häpkhilek õ'ti n'oye tä tiskanejpe letes tä ihihlä lech'isukyaj, lhäy'ehila harina tä matche tä is tä inu'pe lhip dos kilos tä aceite iyej, lhäy'ehila medio litro aceite, ₂₂wet täkwfwas pop wok hokwinaj lesas, häp m'ak tä ikalhi tä yen otw'ayhata. Elhaj häp tä tiskanhiyeja'pe lech'isukyaj, wet elh häp tä õ'wunho tä yen n'okhayaja n'oyej. ₂₃Chik nichäthiyela ocho ifwalas, häp tä ichäjiyela sacerdote nilhokej otw'ayhtesna tä hiw'en n'oho tä häpkhilek õ'lejej lakokhayaj tä iyej. Wet itihihila tä ottache tä ihi carpa tä owukwe lepe. ₂₄Wet sacerdote tachumhiyela tson'ataj lhäs tä otw'ayhat tä tiskanejpe hin'o tä p'elitsajtso letes, wet y'isiyeja lhip aceite, wet häp tä itihla n'oye. ₂₅Wet õ'länla tson'ataj lhäs wet sacerdote tachumhiyela lhip lew'oyis, wet ilänhiyeja hin'o tä ilejej lakokhayaj lech'ote tä lefwomkat lets'e, lhäy'e lefwuj lhokwe tä ihi takwey tä lefwomkat häp tä ilänhiyeja, wet äp ilänhiyeja lefwuj lhokwe tä ihi lepach'o tä lefwomkat. ₂₆Chik tajyäme täja, wet sacerdote itsäyhihola lham takwech'o tä lets'amkat häp aceite lhiphaj, ₂₇wet y'uythihola lefwuj tä ihi takwey tä lefwomkat, wet itsäyhla'pe siete veces häp lhip tä ihi tä olham ottache. ₂₈Äpte ilänhiyeja lech'ote tä lefwomkat lets'e häp hin'o tä ilejej lakokhayaj, lhäy'e lefwuj lhokwe tä ihi takwey tä lefwomkat tä ilänhiyeja, wet äpte ilänhiyeja lefwuj lhokwe tä ihi lepach'o tä lefwomkat. Itihla'pe itshäwet tä õtiskanejpe letes lew'oyis tä pajche iyejen lech'ote lhäy'e lefwuj lhokwe, lhäy'e lefwuj lhokwe tä ihi lepach'o. ₂₉Wet lhip tä imälhehi aceite häp tä ilänhiyeja lhetek häp hin'o tä ilejej lakokhayaj. Wet häp tä nech'e otäyhthiyeja'pe hin'o letes häp sacerdote lechumet tä iwoye.

₃₀“Chik tajyäme täja, sacerdote ihänla n'oye elh häp pop wok hokwinaj les elh chik häpe, m'ak tä ikalhi tä yen otw'ayhata häp hin'o tä ilejej lakokhayaj tä iyej. ₃₁Afwencheytso, tefwaji tä tiskanejpe lech'isukyaj wet elh häp tä häpe otw'ayhat tä õ'wunho, wet hip'ajthiyeja yachuyaj lhay. Wet chik sacerdote yachaj n'oye m'ayhaytso, wet häp tä otäyhthiyeja hin'otso letes wet nofwila tä kok'aye.

₃₂“Häp täjtso lakey hin'o tä t'inhayaj länek tä lakam'os ihi tä niw'ena m'ak tä wuj chik yen otw'ayhata, häpkhilek otäyhtej lakokhayaj tä iyeji t'inhayaj.”

₃₃Lhawuk äp tahuyej Moisés lhäy'e Aarón wet yok:

₃₄–Chik nech'e amel lhewhihila häp honhat tä Canaán tä ow'enla amhohen häpkhilek alewuhuy, ihichela ifwala chik olänej sä'ä elh at chik häpe häp hup tä ihi aka honhattso. ₃₅Wet hup lewuk ihohiyela sacerdote, yohlak, “Tet häp chik sä'ä tä ilän owukwe.”

₃₆Tä kamaj sacerdote nitiyäjachufwi häp hup, wet ne'tehlak õ'ti alhoye nilhokej m'ak tä ichufwi. Tsi isit'a chik lakokhayaj y'aje m'ak chik häpe tä ichufwi. Wet chik nofw alhoye lheley tä õ'tonphä, wet häp tä sacerdote tiyäjlachufwi tä itetshan häp m'ak tä ilän hup. ₃₇Chik itetshanhila, wet nitäfwenhiyeja chik hiw'en m'ak tä iyejen hup lhipey chik häpe sä'ä, wet w'atshanhiche wet lhiphaj tä lhahi tä ichät, atoschehchä, tiyäjo hup lhipey. ₃₈Wet chik inuphä tä tälhchufwi hup, wet ne'tehlak õhp'ohi pajla'tha siete ifwalas. ₃₉Wet chik nichäte siete ifwalas, wet yachajihola tä itetshanhila. Wet chik sä'ä yik t'at tä i'pe hup lhipey, ₄₀wet ne'tehlak õ'lanche tuntey tä sä'ä iyejen, wet õ'iskone honhat lhip tä kok'aye tä i'alhoye wichi lew'et. ₄₁Wet ne'tehlak nilhokej hup lhipey tä ilech'oye tä õyähäs. Wet lemokw tä õyähäs kamaj äp õ'hänhiyela honhat lhip tä kok'aye tä i'alhoye wichi lew'et. ₄₂Wet õtchumhiyela iyhäj häp tuntey, õ'thathihomchela iyhäj tä õ'lanche lew'etes. Wet õhp'ohiyeja'pe iyhät tä nech'ayek nilhokej häp hup lhipey.

₄₃“Chik yachajo tä sä'ä iyejen hup lhipey tä õ'nech'aynhiche tuntey, lhäy'e häp iyhät tä õ'nech'aynhi tä õhp'oyejpe hup lhipey tä õyähäs, ₄₄wet sacerdote tiyäjlachufwi tä itetshan. Chik sä'ä yik t'at, nech'e nilhokpe häp hup lhipey, wet häpe sä'ä tä ni'isa wet kok'aye hup. ₄₅Is chik õ'nachu, wet nilhokej lhipey tä õ'thathiyela lhip tä kok'aye tä i'alhoye wichi lew'et.

₄₆“Elh chik häpe chik tiyäjchufwi huptso tä häpe ifwalas tä sacerdotes t'uhläk õhp'ohi t'at lepe, kok'ahiyejela pajla'tha ifwala y'uy. ₄₇Wet elh chik häpe chik t'ekchufwi wok imächufwi häp huptso, wet iwohiyet'ak nilejahen lew'uyis häpkhilek nofw tä kok'ayeje.

₄₈“Wet chik sacerdote tiyäjchufwi tä itetshan, chik hiw'enla tä sä'ä yikhit'a tä i'pe hup lhipey tä tajyäme tä õ'nech'aynhi iyhät tä õhp'oyejpe, wet häp tä ikalelhthiyeja tä huptso is t'at, kok'ahiyet'a, sä'ä ileyej. ₄₉Wet chik õyäm matche tä õ'lejej lakokhayaj, is chik sacerdote tachumhiyela täkwfwas afwenche lesas, lhäy'e häp hal'ä tä pänhichetek, lhäy'e n'oyik tä niyäkw tä ichät, wet lhäy'e häp hal'ä tä lhey hisopo lhachafwaj tä lew'ole ihi. ₅₀Wet ilänla tefwaji häp afwenche lesastso, itihla'pe n'okähi tä iyhät tä inät tä tälhe hits'ifwik ihi. ₅₁Chik tajyäme täja, tachumhiyela hal'ä tä pänhichetek, lhäy'e häp hisopo lhachafwaj, lhäy'e n'oyik tä niyäkw tä ichät, wet lhäy'ehila afwenche tä õkniläna. Wet y'uythihola afwenche elh tä õ'län lew'oyis tä lhayej inät tä tälhe hits'ifwik, wet äp itsäyhichehena siete veces häp hup lhipey. ₅₂Wet häp tä ilejiyeja hup lakokhayaj häp afwenche lew'oyis lhäy'e inät tä tälhe hits'ifwik, lhäy'e afwenche tä õkniläna, wet hal'ä tä pänhichetek, lhäy'e hisopo lhachafwaj, wet lhäy'e häp n'oyik tä niyäkw tä ichät. ₅₃Chik tajyäme täja, wet ihänhiyela lhip tä wichi newahi häp afwenche elh tä õkniläna, wet iwahnhitshila. Wet häp tä mälhhiyejatso, iwohiyet'ak õkniwoyaye lakeyis tä õyenlhi, häpkhilek nech'e isila häp hup, nofwila t'at lakokhayaj.

₅₄“Häp tähestso ochufwenyaj tä yämeje t'inhayajay tä iwo lakam'osa, lhäy'e amo tä afwtsaj, _55-56lhäy'e m'ak tä t'ukwa, lhäy'e amos tä ipäjchephä, lhäy'e m'ak tä ipelajiche tä i'pe n'ot'äj, lhäy'e sä'ä tä iyej wesaj wok hup, ₅₇häpkhilek akalelhäj m'ak tä kok'aye lhäy'e häp m'ak tä nikok'ayaye.”