2–Fwenho Aarón lhäy'e leles, wet lhäy'e nilhokej häp Israel lhayis, tä häp täja olhämtes tä ofwenho lhamel. Wet oyok, 3-4Häp Israel lhayis elh chik häpe chik yen otw'ayhata häp itshäwet, chik tolo wok tson'ataj lhäs wok kayla, hin'otso iwohiyet'ak nhänaye häp carpa tä owukwe lepe häpkhilek ilän wet yachaj n'oye. Tsi chik ilän tä ihi wichi lew'et wok i'alhoye, isit'a. Oyenla tesayej häp w'oyis tä itsäy wet õ'sohiyeja tä iyej oka wichi. 5Mälhyejtso m'ak tä owoye häpkhilek Israel lhayis ileyej tä fwetaj yen n'okhayaja n'oyej itshätäy tä lhamel ilänhen tä ichehen'attso tä newa kana. Lhamel ihänhiyela häp sacerdote tä ihi carpa tä owukwe lepe, wet lhamel ilänhihena, wet sacerdote yachajila n'oye häp tä lhamel lha'isyen n'oye. 6Wet sacerdote itsäyhla'pe w'oyis häp oka altar tä ihi owukwe lepe, wet iwunhihola t'alhä tä lenij tä akäjche häp tä ikäjyenlhin'o. 7Wet nemhit is chik ilän itshätäy tä yen n'okhayajayej ahät lhayis tä nichätche kayla lhayis. Nemhit is chik iwo lakeyayej tä lhaikänchiyej tähestso. Häp olhämetna iwohiyet'ak lhamel niwoyaye, pajla'tha nichäte leles tä lepes lheley.
8-9“Fwenho lhamel tä Israel lhayis elh chik häpe, wok elh tä kahäpeya Israel tä i'amejen, chik fwetaj yen n'okhayaja n'oyej häp itshäwet tä ilän wok iwunho, iwohiyet'ak nhänaye carpa tä owukwe lepe häpkhilek ilän wet yachaj n'oye. Chik nenalhi täjtso, wet õ'sohiyeja tä iyej oka wichi.”
Õ'näyejo wichi chik tufw w'oyis
10Lhawuk äp yok:
–Israel lhayis, wok elh tä kahäpeya Israel tä i'amejen, chik tufw häp w'oyis, olham ottayhlahlä, osohiyeja tä iyej wichi. 11Tsi häp tä nilhokej m'ak tä iläyejit lew'oyis tä ihi t'isan. Wet häp tä tamenej tä one'tek õ'tsäype altar häp w'oyis, häpkhilek letiskanej atapehen tä hach'isukyajay ihiche. Tsi w'oyis häp tä is chik õtiskanejpe häp n'ow'atshancheyaj.
12“Häp tä tamenej tä ofwel amhohen tä isit'a chik iche elh amel tä Israel lhayis, wok wichi tä kahäpeya Israel tä i'amejen, chik tufw w'oyis. 13Wet elh at chik häpe Israel, wok wichi tä kahäpeya tä i'amejen, chik isakanej itshäwet wok afwenche tä häpe n'olhäk, is chik itsäy häp lew'oyis wet ipotpe. 14Tsi häp tä nilhokej m'ak tä iläyejit lew'oyis tä ihi t'isan. Häp tä tamenej tä ofwel amhohen tä isit'a chik letufw w'oyis, tsi häp tä nilhokej m'ak tä iläy lew'atshancheyaj. Elh chik häpe chik tufw õ'sohiyeja tä iyej wichi.
15“Elh chik häpe Israel wok kahäpeya Israel, chik tufw itshäwet p'itsek wok itshäwet elh tä fwitsaj tä lelänek, iwohiyet'ak nilejahen lew'uyis wet inay. Mat kok'ahiyela t'at pajla'tha ifwala y'uy, wet nech'e häpkhilek nofw tä kok'aye. 16Wet chik nilejahen lew'uyis wet ninaya, letes ihihila.”
