Yej lemäyej atsinha tä matche tä aelh t'at
1Lhawuk tahuyej häp Moisés wet yok:
2–Häp tähesna olhämtes tä is chik lefwenho häp Israel lhayis. Olham tä ohäpe amel Awuk Dios. 3Yej ten Egipto lheley lakeyis, häp honhat tä amel lhehihte. Yej ten Canaán lheley lakeyis, häp honhat tä ohänla amehen. Yej woye m'ak tä lhamel iwoye. 4Is chik lewoye olham olhämtes wet en akeya m'ak tä ihi ochufwenyajay. Olham tä ohäpe Awuk Dios. 5Hänlhi olhämtes wet en achumyaja ochufwenyajay. Tsi elh chik iwoye olhämtes, häp tä iläyhla. Olham tä ohäpe amel Awuk.
6“Isit'a chik iche elh tä itiyej lakey atsinha tä matche tä elh t'at. Olham tä ohäpe amel Awuk.
7“Yej tiyej akey häp ako. Isit'a chik leläkwlhi ajcha. Tsi ako t'at, yej woynejatso akey chik letiyej.
8“Yej tiyej akey ajcha lech'efwa. Isit'a chik leläkwlhi ajcha.
9“Yej tiyej akey apuhfwa, wok ajcha lhäse wok ako lhäse, chik nichäthihchä haw'et wok nichätahihchä. Yej woynejatso akey chik letiyej.
10“Yej alen'äfwlhatejlhi acheyä tä äs tä lhäse wok äse tä lhäse. Isit'a chik letiyej akey.
11“Yej tiyej akey häp apuhfwa tä lako w'enha lhamej, tsi ajcha tä lhäse wet apuhfwa t'at. Häp tä isit'a chik lewoynejatso akey chik letiyej.
12“Yej tiyej akey häp atsinha tä ajcha puhfwa, tsi häp tä ajcha lhip t'at.
13“Yej tiyej akey häp atsinha tä ako puhfwa, tsi häp tä ako lhip t'at.
14“Yej läkwlhi awithok. Isit'a chik letiyej akey lech'efwa, tsi häp tä awit'ofw t'at.
15“Yej tiyej akey atiche tä äs ch'efwa. Isit'a chik lewoynejatso akey chik letiyej.
16“Yej tiyej akey apuhfwa lech'efwa. Isit'ak leläkwlhi apuhfwa.
17“Yej p'ajtej lhäse häp atsinha tä lemäyejlhi, wok lecheyä. Häp täjtso n'okey tä matche tä ni'isa, tsi häp tä lhalhipey t'at.
18“Yej lhen hach'efwaya atsinha tä hach'efwa puhfwa. Wet yej tiyej akey tä kamaj iläy häp hach'efwa, tsi häp tä lhenla lhaletayhfwasa.
Iyhäj n'okeyis tä hich'atej tä ni'isahen
19“Yej tiyej akey atsinha tä nowaylhi.
20“Yej tiyej akey aelh lech'efwa, häpkhilek nitmena amej chik õ'kokyen amehenpe.
21“Isit'a chik lelän äs chik lhen t'awayhata häp dios tä kamatache tä lhey Moloc, häpkhilek kaläkwiyayejlhi olhey tä ohäpe Awuk Dios.
22“Yej alhen ch'efwasa tä ahin'ol. Isit'a chik aletech'aynej chik a'atsinhay, tsi häp tä matche tä on'äyiho täjtso.
23“Isit'a chik lhen hach'efwaya itshäwet, häpkhilek aknikok'ayayeje. Atsinha wet äpte isit'a chik lhayen itshäwet lech'efwaya. Tsi tähesna häpe m'ak tä hich'atej tä ni'isa.
24“Isit'a chik lekokyenej amehen akeyistso. Tsi häp tä mälhyejentso wichi tä oyokosilach'oye laka honhates häpkhilek amel lhenay haw'eta. Lhamel ikokyenej lhamehen lakeyistso, 25wet matche tä ikokyeneje laka honhat. Wet häp tä otetshan m'ak tä ni'isa tä ihi, wet häp tä honhattso nech'e lham tä nemhit iwatlä wichi tä ihi. Tet iwoyek tach'uyejwethä wichi tä yen lew'etesa. 26Mat amel tä ahäpehen Israel lhayis, lhäy'e häp wichi tä kahäpeya Israel tä i'amejen, is chik amel lhen akeya m'ak tä olhämtes ichufwen amejen. Isit'a chik lewoye m'ayhay tä ni'isahentso tä matche tä on'äyiho. 27Tsi wichi tä ihi honhattso tä kamaj amel kachätaye, lhamel iwoye t'at m'ak tä hich'atej tä ni'isa. Wet häp tä tamenej honhat tä okokyene. 28Isit'a chik honhattso tach'uylhi amehenpe akeyis. Isit'a chik ate iwoye wichi tä pajche ihi tä honhat tach'uywethä'pe lakeyis. 29Elh at chik häpe chik iwoye m'ayhaytso tä on'äyiho, õ'sohiyeja tä iyej oka wichi. 30Häp tä is chik amel lewoye olhämet tä one'tek lewoye. Yej ten lakeyis wichi tä ihi honhattso wet yej alekokyeneje. Olham tä ohäpe amel Awuk Dios.”
