Lev 19

₁Lhawuk äp tahuyej Moisés wet yok:

₂–Häp täja olhämtes tä ot'uhläk lefwenho häp Israel lhayis.

“A'enay ot'amajchetesa, tsi häp tä olham tä amel Awukn'o tä aka Dios, ohäpe Elh tä N'ot'amajchet.

₃“Aelh tefwajpejni is chik tach'ahuye lako lhäy'e häp lajcha.

“Is chik lhen amajcheta häp ifwalas tä n'ot'elakw'et. Olham tä ohäpe amel Awuk Dios.

₄“Yej hänlhi n'ocheyälis, wet yej lhenlhi amhohen acheyälis chik lhenejlhi lechinaj tä lewachuhathiche. Olham tä ohäpe amel Awuk Dios.

₅“Chik lhachaj n'oye itshäwet tä lelän tä lhen otw'ayhata tä ale'isyen n'oye, is chik lewoyneje m'ak tä one'tek lewoye häpkhilek okäjejlhi. ₆Is chik letufw t'at häp ifwalatso tä lew'en n'oho, wet äpte kamaj is t'at chik letufw tä äp ifwala. Wet mat lhip chik imälhehi chik tumej kanhi, häp tä is chik lewunho, ₇tsi nech'e okokyene, oy'ulhan. Wet chik iche elh tä tufw, nemla okäjejlhi otw'ayhattso. ₈Tamenla lhamej chik letes ihi wet õ'sohiyeja tä iyej oka wichi. Tsi hap tä ikänchi m'ak tä olham oyen t'amajcheta.

₉“Chik nichäte lewhäy tä lelanhi häp akäs lhay, isit'a chik lhäm matche chik nofwej tä ihi alafwek, wet yej lanche häp lech'ahfwas tä imälhehi. ₁₀Yej lhäm matche tä letifwej uvas tä lelanhi tä ihi lhile, wet yej t'äkwe häp iyhäj uvas tä nat. N'äyhlä häp wichi tä p'elitses, lhäy'e wichi iyhäj tä kahäpeya Israel lhayis. Ohäpe amel Awuk Dios.

₁₁“Yej t'etan, yej w'et lhämlhi, wet yej t'akanej aiyhäj.

₁₂“Yej w'et lewo olheyayej ämet tä lehanej tä kamatthiyachela. Tsi isit'a chik ka'ena amajcheta olhey tä ohäpe Awuk Dios.

₁₃“Yej tatayejlä m'ak tä ni'isa aelh wet yej soyej m'ak tä lewuk.

“Chik lewo achumyeneka, isit'a chik letis chik ifwala elh. Häpet tä ileyej tä tachumlhi, is chik letispe lechumet tä iwoye.

₁₄“Yej thatej lewit'äyhyaj häp elh tä ch'otech'o, wet yej tihi m'ak chik häpe len'äyij häp elh tä asnam. Ch'ahu n'oye wet woyepej olhämtes. Ohäpe häp amel Awuk Dios.

₁₅“Chik iche m'ak tä lekalelhät, isit'a chik lewoye m'ak tä nit'uhawetayej. Yej alethatche elh tä p'elitsaj wok elh tä hiw'en m'ak. Tetshan m'ak tä is alhoho tä lewo achumeta.

₁₆“Yej lhämeje m'ak tä ni'isa aiyhäj.

“Isit'a chik lew'enho aelh häp lewit'äyhyaj. Ohäpe amel Awuk.

₁₇“Yej wahnej chik ihi ahusek chik len'äyiho aelh. Is chik lefwon aelh chik iche lewhäy tä t'uhawetej. Tsi chik kafwona, amtejej t'at m'ak tä ni'isa tä iwoye.

₁₈“Yej tenlä elh tä iwoyej ame m'ak tä ni'isa wet yej n'äyiho'pe. Mat humin aelh, tech'ayen amej tä alehumin. Olham tä ohäpe Awuk.

₁₉“Woye olhämtes wet en achumyaja.

“Itshätäy tä lhen aläya, yej wahnej chik iwo lelesahlä itshäwet elh tä w'enha lhamej.

“Chik letutcheyhi alafwek, yej kasowek. Is chik lew'enhathen yachuyajpej tä w'enha lhamej.

“Yej lhen haw'uya n'oyik tä õ'kasowek m'ak tä õyenejlhi.

₂₀“Chik iche elh tä itiyej lakey häp atsinha tä n'okwenek tä pajche iche hin'o tä ihiyeja, mat hin'o tä ihiyeja kamaj tiskanhit'a'pe, kamaj n'okwenek t'at atsinha, is chik õ'tiyej n'otasnhayaj lhamel. Mat isit'a chik õ'länhen lhamel, tsi lewuk ihi häp atsinha tä n'okwenekna. ₂₁Wet hin'o is chik ihäne tson'ataj tä hin'o häp carpa tä olham owukwe lepe, wet ilänla häpkhilek otäyhtej letes tä ihihlä lech'isukyaj tä iwoye. ₂₂Wet sacerdote yachajila n'oye tson'atajna, wet t'alhla n'oye chik otäyhtej hin'o letes. Wet nemla õyen tesayej lech'isukyaj.

₂₃“Chik amel lechätho honhat tä nech'e amel lehoye, wet letihchä hal'äy, on'äyej amhohen chik letufw lhay pajla'tha ihi tres nekchämis. ₂₄Chik nichäte cuatro nekchämis, wet is chik lhen amajcheta n'oyej häp lhay wet lewo akäjyaja tä lewunitn'o. ₂₅Wet chik nichäte cinco nekchämis, häp tä nech'e is chik letufw. Wet hal'äy häpkhilek matche tä wujla lhay tä ihi. Olham tä ohäpe Awuk Dios.

₂₆“Yej tufw m'ak tä lew'oyis ihi.

“Yej alhen han'ältshantsaja, wet isit'a chik lefwetaj lehanej m'ayhay tä tatay alhoho.

₂₇“Yej tolnhatlhi etek chik lhisetche, wet yej lhisetlä lepesey häp apäsey. ₂₈Yej alesajlhi chik aelh y'il. Wet yej lesayenlhi häp asan. Olham tä ohäpe amel Awuk.

₂₉“Yej wahnej chik äse iwo kain'oyajahi m'ak tä iwoye. Tsi tamenhiyeja honhat tä nech'e häp n'okain'oyaj lew'et.

₃₀“Is chik lhen amajcheta häp ifwalas tä n'ot'elakw'et wet en amajcheta ow'et tä ot'amajchet. Olham tä ohäpe amel Awuk.

₃₁“Yej hoye hin'ol tä yämhoplhi wichi tä pajche y'inhen, lhäy'e hin'ol tä han'ältshantses. Yej tay'ätshaneje m'ak tä kahanayej, yej alekokyeneje. Olham tä ohäpe Awuk Dios.

₃₂“Nephä, kasit, tä lhehi tä wichi tä thänhäy tatache. Tiyej len'ohyaj lhamel tä lew'oley ipelaj, tsi häp tä len'älit tä leti n'oyej owujyaj tä ohäpe Awuk Dios.

₃₃“P'altsen elh tä kahäpeya Israel tä i'amejen. ₃₄Is chik letech'aynej tä häpe aelh Israel. Humin tsi w'enhahit'a lhamej, tet lewoye. Tichunche tä tej tä amel, tha ahäpehente wichi tä kalew'eta tä ihi täjte lheyayhi honhat tä Egipto. Olham tä ohäpe Awuk Dios.

_35-36“Is chik amel lewoye m'ak tä matche tä is alhoho chik lewo akaw'awlhanhata. Chik letetshanej akaw'awlhanhatcha, is chik häpe metros tä matche. Wet chik häpe akaw'awlhanthi tä lechumyenlhi, is chik häpe kilos tä matche. Wet chik häpe aceite wok hat'es, is chik häpe litros tä matche. Olham tä ohäpe amel Awuk Dios, wet oaitonchephähte tä lheyayhi honhat tä Egipto.

₃₇“Woyaye nilhokej olhämtes wet enay achumyaja nilhokej ochufwenyajay. Ohäpe amel Awuk.”