Häp n'olhäk tä tälhe yachuyaj lhay tä õyen Lhawuk t'awayhata
1“Elh at chik häpe tä ichäj n'oye otw'ayhat tä häpe n'olhäk tä tälhe yachuyaj lhay, is chik häpe harina tä matche tä is wet is chik itsäype aceite lhäy'e m'ak tä lenij akäjche tä häpe incienso. 2Chik tajyäme täja, ihänhiyela sacerdotes tä Aarón leles. Wet lhamel elh tach'awhihola harina tä aceite iyej, lhäy'e nilhok incienso tä i'pe harina, wet iwunhihola tä i'pe altar. Wet nech'e häpehila n'otw'ayhat tä letetnek tä is chik ontichunche, wet lenij tä akäjche häp tä ikänitlhin'o. 3Wet lhip tä imälhehi häp tä Aarón lhäy'e leles lhamel lhäk. Häpe lhip tä n'ot'amajchet t'at, tsi tälhe m'ak tä õyen otw'ayhata.
4“Chik häpe pan tä õhp'o tä õ'thatche n'onhonthi chik õyen otw'ayhata, is chik häpe pan tä levadura newayej tä õyenejlhi harina tä matche tä is, wet is chik õ'tsäye aceite. Wok is chik häpe tortillafwas tä levadura newayej, mat is chik õ'tsäype aceite.
5“Chik lhen otw'ayhata pan tä letulelh, is chik lhenejlhi harina tä matche tä is. Wet tsäye aceite mat yej thate levadura. 6Wet is chik lech'esajen, wo lhipeya wet tsäype aceite. Wet nech'e häpehila otw'ayhat tä n'olhäk tä tälhe yachuyaj lhay.
7“Chik lhen otw'ayhata pan tä lep'o tä letihi akähi, is chik lhenejlhi harina tä matche tä is, wet tsäye aceite.
8“Chik wak'alh tä lhenlhi m'ak tä lhen otw'ayhata, is chik letihi tä ottache. Wet lhachajiyela sacerdote, wet lham nech'e ihänhiyela häp altar. 9Wet häp tä tachumhiyela lhiphaj otw'ayhatna wet iwunhihola tä i'pe altar. Wet nech'e häpehila otw'ayhat tä letetnekej tä is chik ontichunche, wet lenij tä akäjche häp tä ikänitlhin'o. 10Wet lhip tä imälhehi häp tä Aarón lhäy'e leles lhamel lhäk. Häpe lhip tä n'ot'amajchet t'at, tsi tälhe m'ak tä õyen otw'ayhata.
11“Isit'a chik lethate levadura otw'ayhat tä n'olhäk tä tälhe yachuyaj lhay chik lew'en n'oho. Isit'a chik levadura chik häpe wok akäyek chik õ'wunho häpkhilek õyen otw'ayhata. 12Levadura lhäy'e akäyek is t'at chik lhen otw'ayhata, mat is chik häpe yachuyaj lhay tä lechunkatshay. Mat isit'ak õ'wunho chik õ'ti'pe altar, tsi tek okäjejlhi lenij.
13“Nilhokej n'olhäk tä tälhe yachuyaj lhay tä lhen otw'ayhtesa, is chik nisoy iyej t'at. Isit'a chik nisoy newayej yachuyaj lhay tä lhen otw'ayhata. Tsi nisoy häpe t'at n'otetnek tä alhachaj n'oye wet Awukn'o. Nilhokej otw'ayhtes tä lewoyej n'oye, is chik lep'ajtej nisoy.
14“Chik lhachaj n'oye n'olhäk tä tälhe aka yachuyaj lhay tä lechunkatshay, is chik häpe lhay tä y'o wet lep'ohen. Wet chofwaji häp lhoy tä nech'e t'at tä lelanhi tä tälho lhile. 15Is chik letsäype aceite häp otw'ayhtes, lhäy'e incienso. Wet nech'e häpehila otw'ayhtes tä yachuyaj lhay. 16Wet sacerdote iwunhihola lhip yachuyaj lhoy tä õ'chofwaji, lhäy'e aceite, lhäy'e nilhok incienso. Wet nech'e häpe otw'ayhat tä õyen tichunhayaja n'oyej.
