N'otasnhayaj tä õ'tiyej häp oelh tä iwoye m'ak tä hich'atej tä ni'isa
1Lhawuk äp tahuyej Moisés wet yok:
2–Häp täja olhämet tä is chik lefwenho häp Israel lhayis, lhäy'e häp wichi tä kahäpeya Israel tä iyej lhamel. Chik hin'o yen t'awayhata lhäs häp dios tä kamatache tä lhey Moloc, iwohiyet'ak wichi tä lew'et honhat niläna. Is chik lhamel ithatejlhi tuntey häpkhilek y'il. 3Olham ottayhlahlä hin'otso, osohiyeja tä iyej wichi. Tsi yen häpeya m'ak tä kok'aye ow'et tä Ot'amajchet, wet iläkwlhi olhey tä Ot'amajchet, häp tä yachaje lhäs häp dios Moloc. 4Wet chik wichi nitetshanhiyela wet nilänhiyela häp hin'otso, 5olham tä ottayhlahlä lham lhäy'e lew'et lheley. Wet osohiyeja tä iyej wichi, lhäy'e häp wichi tä ihänlhi häp lham, tsi häp tä lhaich'oyhteje tä äpte lhamel n'okwiyej Moloc.
6“Chik iche elh tä ihoye hin'ol tä yämhoplhi wichi tä pajche y'inhen, lhäy'e hin'ol tä han'ältshantses, wet lhaikänchiyej tä ihänlhi häp m'ayhayna, olham ottayhlahlä hin'otso wet osohiyeja tä iyej wichi.
7“A'enay amajchetesa n'oyej häpkhilek ahäpehen ot'amajchetes, tsi olham ohäpe amel Awuk Dios. 8Woyaye olhämtes wet enay achumyaja. Olham tä ohäpe amel Awuk wet oayen t'amajchetesa.
9“Elh at chik häpe chik takäpfwayeje lewit'äyhyaj häp lajcha wok lako, iwohiyet'ak õkniläna. Tsi tä t'uhläk lajcha wok lako lewit'äyhyaj ihi, is chik õyen tesayej, õ'län.
10“Chik iche elh tä iwo lakain'oyajayej atsinha tä hin'o elh lech'efwa, iwohiyet'ak õkniläna hin'o wet õy'isej häp atsinha.
11“Chik iche hin'o tä itiyej lakey häp lajcha lech'efwa, iläkwlhi lajcha. Hin'o lhäy'e atsinha is chik õyen tesayej, õ'länhen.
12“Chik iche hin'o tä itiyej lakey häp letiche, iwohiyet'ak õknilänahen lhamel. Is chik õyen tesayej, tsi häpe m'ak tä hich'atej tä ni'isa tä lhamel iwoye.
13“Chik iche hin'ol tä lhayen ch'efwasa, häpe m'ak tä matche tä õ'näyiho. Is chik õyen tesayej lhamel, õ'länhen.
14“Chik iche hin'o wet iyej häp atsinha, wet y'isej atsinha lako tä yen ch'efwaya, is chik õhp'ohen iläyejen nilhokej häp lhamel, häp tä iwoye m'ak tä matche tä ni'isa. Tsi häp tä isit'a chik mälhyejtso amel akeyis.
15“Chik iche hin'o tä yen lech'efwaya itshäwet, iwohiyet'ak õkniläna hin'o lhäy'e itshäwet.
16“Chik iche atsinha tä lhayen itshäwet lech'efwaya, is chik õyen tesayej atsinha, õ'län, lhäy'e itshäwet.
17“Chik iche hin'o tä iyej lepuhfwa tä lajcha lhäse wok lako lhäse, wet yen ch'efwaya, õ'chenlach'oye lhamel tä iyej wichi. Tsi häp tä lhayen ch'efwasa tä lhalepuhfwas, wet matche tä lhain'äfwlhatejwethä häp m'ak tä ni'isa tä iwoyej lhamehen. Õyenla tesayej lhamel.
18“Chik iche hin'o tä itiyej lakey häp atsinha tä nowaylhi, itshäne t'at lhip tä atsinha w'oyis tälhe, wet atsinha äpte lham t'at tä iwo iseyhlä hin'o. Wet lhamelna is chik õ'soyej tä iyej wichi.
19“Yej tiyej akey häp ako lepuhfwa wok ajcha lepuhfwa. Tsi häp tä newa katsik häpe, awit'ofw t'at, õayenla tesayej amel.
20“Elh chik häpe chik itiyej lakey lewithok ch'efwa, wet iläkwlhi häp lewithok. Õyenla tesayej lhamel, y'inhihena tä lajit lelesa.
21“Elh chik häpe chik isoyej lepuhfwa häp lech'efwa, wet iläkwlhi lepuhfwa. Matche tä oy'ulhan täjtso tsi häpe m'ak tä kok'aye, wet lhamelna leles ihihit'ala.
22“Is chik amel lewoye nilhokej olhämtes lhäy'e ochufwenyajay, wet lhen akeya häpkhilek n'am sohla amejen honhat tä ohän amhohen chik amel lhehihila. 23Yej ten lakeyis häp wichi tä oyokosichephäla tä ihi honhat tä amel lehohiyela. Lhamel iwoye nilhokej m'ayhay tä ni'isachehen tä oyämetso, wet häp tä oy'ulhanej lhamel. 24Olham ofwel amhohen tä alewuhuyla häp wichitso laka honhat. Tsi olham tä oyachajila amehen, wet häpe honhat tä t'os lhäy'e akäyek tet iwoye inät, iläfwelchehen tä ihi.
“Olham tä ohäpe Awuk Dios wet pajche ow'enhat ahilähen häp wichi tä i'pe honhat. 25Wet häp tä is chik amel lew'enhatlä itshätäy tä laj lakokhayaja häp itshätäy iyhäj tä kok'aye. Lhäy'e häp afwenchey tä laj lakokhayaja is chik lew'enhatlä häp afwenchey iyhäj tä kok'aye. Tsi isit'a chik amel alekokyeneje itshätäy, afwenchey, lhäy'e häp m'ayhay tä lhaitonchehen honhat tä yikhen, tä pajche okalelhät amhohen tä häpe itshätäy tä kok'aye. 26Is chik amel alhenay amajchetesa n'oyej, tsi olham tä ohäpe Awuk tä N'ot'amajchet. Wet pajche ow'enhat ahilähen häp wichi tä i'pe honhat, wet ottshupi amehen tä oayen oka wichiya.
27“Chik iche hin'o wok atsinha tä lhayen han'ältshantsaja, wok yämhoplhi wichi tä pajche y'inhen, iwohiyet'ak õknena tesayej, õ'län, õ'thatejlhi tuntey.”
