Sacerdotes iwohiyet'ak nit'amajayej m'ayhay tä Lhawuk t'amajchetes
1Lhawuk tahuyej Moisés wet yok:
2–Fwenho Aarón lhäy'e leles tä is chik lhamel t'amajej m'ayhay tä ot'amajchetes tä Israel lhayis yen t'amajcheta n'oyej. Tsi chik nit'amajayej, wet iläkwlhi olhey tä n'ot'amajchet. Olham ohäpe lhamel Lewuk. 3Fwenho lhamel, olak, “Häp ifwalasna lhäy'e ifwalas tä tatay alhoho, chik iche ales elh chik häpe chik lakokhayaj ihi wet tachuma häp m'ayhay tä n'ot'amajchetes tä Israel lhayis yen t'amajchetayej Lhawuk, wet hin'otso nemla õ'wahnej chik tach'ote Lhawuk lechumet.” Fwenho lhamel olhämetna. Olham ohäpe Lewuk.
4-5“Aarón leles elh chik häpe chik t'inhayaj tä ni'isa tä ilän tä i'pe t'äj, wok kok'ayeje tä lho t'i nitsäy, isit'a chik tufw m'ayhay tä ot'amajchetes pajla'tha iches, nofw tä kok'aye, häp tä nech'e tufwila.
“Wet Aarón leles elh chik häpe lakokhayaj ihihila chik itsok m'ak tä kok'ayeje n'op'itsek, wok chik leles nitsäy, wok chik itsok hin'o tä kok'aye wok itshäwet tä lhaitonche honhat tä kok'aye. 6Hin'o chik itsok elh chik häpe häp m'ayhayna, nech'e kok'ahiyejela pajla'tha honatsiyej, wet isit'a chik tufw m'ayhay tä ot'amajchetes chik kamaj ninaya. 7Chik ifwala y'uy, häp tä nech'e nofwila tä kok'aye, wet häp tä tufwila m'ayhay tä ot'amajchetes tsi häpe t'at tä lhäk. 8Isit'a chik tufw häp itshäwet p'itsek, wok itshäwet elh tä fwitsaj tä lelänek, häpkhilek nikok'ayayeje. Olham ohäpe Lewuk.
9“Fwenho lhamel tä iwohiyet'ak niwoyaye olhämtes tä one'tek iwoye, häpkhilek niwoya ch'isukyaja. Tsi chik yen w'et m'aka olhämtes, wet y'inhihena. Olham ohäpe lhamel Lewuk wet oyen t'amajchetesa lhamel.
Wichi tä õkniwahnayej chik tufw m'ayhay tä n'ot'amajchetes
10“Hin'o tä nitälhayejlä sacerdote, isit'a chik tufw m'ayhay tä ot'amajchetes tä õhw'enho sacerdotes. Chik häpe sacerdote laka asiyak wok lechumyenek, on'äyejo chik tufw m'ayhay tä ot'amajchetestso. 11Mat chik sacerdote lechäjek häp lakwenek, häp tä is t'at chik tufw m'ayhay tä ot'amajchetes. Wet lhäy'e häp wichi tä nichäthihchä sacerdote lew'et, is t'at chik tufw sacerdote lhäk.
12“Chik sacerdote lhäse tawhayey wet iyej hin'o tä tälhe wichi iyhäj, isit'a chik tufw häp otw'ayhtes tä ot'amajchetes tä õhw'enho sacerdote. 13Mat chik tesa häp lhäse, wok lech'efwa iwom, wet leles ihihit'a, wet chik tapile lajcha lew'et, wet nech'e tet iwoye täjte kamaj niwoya lech'efwaya, is t'at chik tufw lajcha lhäk. Mat wichi iyhäj tä nitälhayejlä sacerdote, häp tä isit'a chik tachufwiyej sacerdote.
14“Elh tä tufw n'olhäk tä ot'amajchet, mat lenech'ethayajit'a tha häp tä nhanayej chik häpe ot'amajchet, is chik tis sacerdote wet inuhatpe lhip m'ak tä tufw. 15Mat isit'a chik sacerdotes tach'anlhaye Israel lhayis chik nit'amajayej otw'ayhtes tä õyachaj n'oye chik itech'aynej m'ak chik kahäpeya n'ot'amajchet. 16Tsi chik Israel lhayis tufw m'ayhay tä ot'amajchetestso, tamenla lhamejen tä letes ihi. Olham ohäpe Lewuk wet oyen t'amajchetesa häp lhamel.”
Itshätäy tä õ'länhen tä õyachaje Lhawuk
17Lhawuk äp tahuyej Moisés wet yok:
18–Fwenho olhämetna Aarón lhäy'e leles, wet lhäy'e nilhokej häp Israel lhayis, olak, “Elh chik häpe häp amel tä Israel lhayis, wok wichi tä kahäpeya tä i'amejen, chik t'uhläk yäm matche lhämetn'aj iwoyeje Lhawuk, wok lham tä letichunhayaj tä is chik iwo t'awayhata, wet häp tä ilän itshäwet wet yachaje Lhawuk häpkhilek õ'wunho, 19iwohiyet'ak kahäpeya itshäwet tä hin'o tä isilataj tä newache m'ak chik iyej, häpkhilek Lhawuk tachumlä. Is chik häpe tolo tä hin'o, wok tson'ataj tä hin'o, wok kayla tä hin'o. 20Wet isit'a chik lewit'äy at chik häpe tä iyej itshäwet, tsi Lhawuk tek tachumlahlä chik ni'isa.
21“Elh chik häpe chik t'uhläk yäm matche lhämetn'aj iwoyeje Lhawuk, wok lham tä letichunhayaj tä is chik iwo t'awayhata, wet häp tä ilän itshäwet wet yachaje Lhawuk häpkhilek lha'isyene, is chik häpe tolo wok tson'ataj tä isilataj tä newache m'ak chik iyej, häpkhilek Lhawuk tachumlä. 22Isit'a chik lhen t'awayhata itshäwet tä asnam wok lelätsek ihi, chik tatshetajaylhi wok amoslhi, wok chesoy länek wok letshi ilän. Wet yej chäj alhoho itshäwet tä mälhyejtso tä let'uhläk õ'wunho tä i'pe n'otw'ayhtesw'et tä lhen Lhawuk t'awayhata. 23Chik lhen atichunhayaja tä is chik lewo t'awayhata Lhawuk, is t'at chik häpe tolo wok tson'ataj tä takälä elh pitaj wok takälä elh nipitaja. Mat chik m'ak tä tamenej tä lewo Lhawuk t'awayhata, häp tä lefwetaj lematitche ämetn'aj lewoyeje, wet Lhawuk tek tachumlahlä häp itshäwet tä takäläy mälhyejentso. 24Wet isit'a chik lhen t'awayhata itshäwet tä lechänsilis amos, wok õ'käjiche, wok õ'tonhiche, wok õ'lanche. Chik lhewhihila aka honhat, yej lhenayhla akeyisa tä lhachaje Lhawuk häp itshäwet tä lewit'äyhyaj mälhyejtso. 25Wet yej tachumahlä itshäwet tä mälhyejtso tä wichi tä w'enha lhamej fwetaj hiw'en amhohen. Yej fwetajayla lhachaje lhaka Dios. Tek tachumlahlä tsi häp tä tawit'äylhi.”
26Lhawuk äp tahuyej Moisés wet yok:
27–Tolo lhäs tä nech'e nichätchä, wok tson'ataj lhäs, wok kayla lhäs, is chik iyej t'at lako pajla'tha siete ifwalas. Wet chik nichäte ocho ifwalas, häp tä nech'e otchumlahlä chik õ'wunho tä õyen n'okhayaja n'oyej. 28Mat isit'a chik õhp'ajtej lhäs häp ifwala tä õ'län tolo wok tson'ataj wok kayla.
29“Chik m'ak tä tamenej tä hin'o hiw'en n'oho otw'ayhatna häp tä akäjejlhi m'ak tä owoyeje, is chik õ'woye t'at häp m'ak tä lakey tä häpkhilek otchumlä. 30Is chik nofw tä õtufw häp ifwalatso. Isit'a chik imälhehi lhip chik õyämte chik äp ifwala elh. Olham ohäpe amel Awuk.
31“Is chik amel lewoyaye olhämtes wet enay achumyaja. Olham ohäpe Awuk. 32Yej läkwlhi olhey tä n'ot'amajchet. Is chik nilhokej Israel lhayis yenn'o t'amajcheta. Olham ohäpe amel Awuk wet oayen t'amajchetesa. 33Otonphähte amel tä lhehi honhat tä Egipto häpkhilek ohäpe amel aka Dios. Ohäpe amel Awuk.”
