Lev 25

₁Lhawuk tahuyej Moisés tä i'pe tachenaj tä Sinaí, wet yok:

₂–Fwenho häp Israel lhayis, ok, “Amel chik lechätho honhat tä Lhawuk hiw'enla amho, lewohipeja t'elakw'eta honhat tä lewujyenej Lhawuk. ₃Seis nekchämis tä letutcheyhihichepeja akäsw'etes, wet nekchämisna häp tä lhisthihenpeja uva lhiley lhachal, wet lelanhihipeja häp lhay. ₄Wet chik nichäte nekchäm tä siete, häp tä is chik lewo t'elakw'eta akäsw'etes tä lewujyenej Lhawuk. Nemhit letutcheyhen häp nekchämtso wet nemhit äp lhisthen uva lhiley lhachal. ₅Wet isit'a chik lelanhi yachuyaj tä atolhkas lhay, tä tälh häp lhoy tä weschä tä lepes tä lelanhi. Wet äpte yej lanhi uvas tä ihi akäsw'et tä älhyej ka'istahihena häp lhachal. Tsi häp tä lewo t'elakw'eta honhat. ₆Häp yachuyaj atolhkas tä iche häp nekchämtso, w'awulhiyeja t'at chik letufw lhay, lhäy'e häp akawos, lhäy'e chumhas, lhäy'e wichi tä tälhe honhat elh tä i'amejen, ₇lhäy'e aläy, lhäy'e itshätäy tä kan'oläya tä lew'et honhat. Nilhokej yachuyaj tä tälhpe honhat häpkhila wichi lhäy'e itshätäy tä lhäk.

₈“Chik letetshan tä ifwalas ihi siete tä ihi semana, wet chik letetshanlä häp nekchämis tä ihipej siete tä äp ihi siete, wet häpe t'at cuarenta y nueve nekchämis. ₉Wet iwel'a tä siete, häp ifwala tä diez, häp ifwala tä õ'wo lahaya hach'isukyajay wet Lhawuk itäyhat amejen ates tä ihihlä, wet is chik nilhokpe aka honhat tä õyafwutchehen tson'ataj ch'ul. ₁₀Wet chik nichäthiyepeja cincuenta nekchämis, amel lhenla amajcheta. Tsi häpe nekchäm tä õhp'altsen wichi, häpkhilek nilhokej lhamel tä ihi aka honhat isej. Chik õ'chäjipeja laka honhat, wet õyachajiyepeja. Wet wichihipeja tä n'okwenkay yäpnhiyepeja lepuhfwas. ₁₁Häpkhila t'at nekchäm tä õhp'altsen wichi, wet mathichela tä amel aisej. Häp tä tamenej tä isit'a chik letutcheyhen häp nekchämtso, wet yej lanhi yachuyaj tä atolhkas lhay, wet yej lhisthen häp uva lhiley lhachal wet yej lanhi lhay. ₁₂Tsi häpe nekchäm tä n'ot'amajchet häpkhilek amel aisej. Wet letufwla t'at yachuyaj lhay tä amenhit'ak letihchä lhiley, lhamel t'at tä tälh tä ihi akäsw'etes.

₁₃“Häp nekchämtso tä häpe nekchäm tä õhp'altsen wichi, wet amel lhachajihola tä letachuma honhatpej tä alewuhuy. ₁₄Chik iche hin'o tä ichäj elh kahonhat, wok iwom honhat tä lewuk wet elh ichäj, isit'a chik ikanej elh. ₁₅Elh tä ichäj elh kahonhat, is chik itetshanlä häp nekchämis tä tälhe nekchäm tä õhp'altsen wichi tä õyachajehen lhamel häp laka honhatpej. Wet nech'e häp tä ihanhiyeja laha tä tiskanpe. Elh tä iwom laka honhat, is chik itetshanlä häp nekchämis tä tatäy chik nichäte nekchäm tä õhp'altsen wichi tä õyachajehen lhamel häp laka honhatpej. Wet nech'e häp tä ihanhiyeja laha tä is chik elh tiskanpe. ₁₆Chik nitäkw häp nekchämis tä kamaj tatäy chik õ'lanhihipeja yachuyaj lhay, häp honhat tä õ'chäj häp tä wuj laha. Wet chik nintäkwa nekchämis tä tatäy chik õ'lanhihipeja yachuyaj lhay, häp honhat tä õ'chäj häp tä wujit'a laha. Tsi m'ak tä õ'wo haya häpe t'at nekchämis tä õ'lanhi yachuyaj lhay.

₁₇“Yej kanej aelh chik häpe. Ch'ahuye Dios wet woye lhämtes, tsi lham häpe Awuk Dios. ₁₈En achumyaja lechufwenyajay wet woye m'ak tä ne'tek lewoye, häpkhilek atamsekis ihi tä lhehi amel aka honhat. ₁₉Letufwla äk tä tälhe honhat, häpkhilek atamsekis ihiche wet nemhit lechuyuhen.

₂₀“Etp'i amel lhok, ¿Atsihila m'ak chik y'atufw tä nemla y'atutcheyhen chik y'anchäte häp nekchäm tä siete tä nemla y'alanhi lhakäs lhay?

₂₁“Lhawuk yok, Olham otkäpfwayhiyela häp nekchäm tä seis, wet yachuyaj lhay tä amel lelanhihla nayahila, w'awulhiyeja tres nekchämis. ₂₂Wet häp tä tetso, chik letutcheyhen, chik lechätepej nekchäm tä ocho, kamaj ihichela m'ak chik aisej tä tälhe m'ak tä lelanhi tä nekchäm tä seis. Nayahila amejen pajla'tha äp lelanhi iyhäj häp akäs lhay tä nech'e.

₂₃“Honhat wet isit'a chik lhäm matche tä lew'enho aelh tä ichäj. Tsi lhaka Dios tä Lewuk, amel haw'ethit'a. Tajlhama tä amel lhehi ayej, tet iwoyek ahäpehen Dios lakasiykas. ₂₄Honhat at chik häpe tä alhen lewukwa tsi lechäj p'ante. Mat äpte lehanej tä is alhoho chik lewuhuy p'ante inachaj lhame wet äp ichäj.

₂₅“Chik iche aelh tä p'elitsaj, m'ak hiw'enhit'a, wet iwom laka honhat, chik paj is chik lepuhfwa tä äp ichäj. ₂₆Wet chik iche hin'o tä newache lepuhfwa, wet chik hiw'en laha chik paj, is chik lham tä inachaj lhame. ₂₇Wet itetshanhilahlä ifwalas tä tälhe ifwala tä iwom, tsi is chik õtispe häp nekchäm tefwaji tä õtutcheyhi laka honhat. Wet chik nitäkw nekchämis tä hin'o tä ichäj tutcheyhi honhattso, wet wujit'alak tiskanpe. Wet nech'e yachajo tä lham tä laka honhat. ₂₈Tha häp tä chik niw'awulhayej chik ihutwek laha häpkhilek inachaj lhame laka honhat, lewukla t'at hin'o tä ichäj, pajla'tha nichäte nekchäm tä õhp'altsen wichi tä õyachajehen lhamel häp laka honhatpej tä iwom. Wet nech'e hin'o tä p'elitsajtso häpkhilek yachajo tä lewuk laka honhat.

₂₉“Chik iche hin'o tä iwom lewukwe tä ihi hupuy tä ilech'oye lelafwek tä tuntey, iwoye t'at chik inachaj lhame pajla'tha nofw häp nekchäm tefwaji tälhe ifwala tä iwom. ₃₀Tha häp tä chik nhanayej iwoyneja chik tiskanpe, wet chik tafwaype nekchäm tefwaji, nech'e lewuk t'at hin'o tä ichäj. Wet äp lewukla t'at häp leles pajla'tha nichäte lepes lheley. Tejlak nichäte nekchäm tä õyachajehen lewuhuy häp wichi lakäywet tä iwompej, tha õyachajiyet'a lewukwetso. ₃₁Mat hupuy tä i'alhoye, newache lelafwek tä tuntey, häp tä õ'tech'aynej honhates tä kawichi lew'eta. Iwoye t'at chik lewuk inachaj lhame. Wet äpte chik nichäte nekchäm tä õyachajehen lewuhuy wichi lakäywet tä iwompej, nech'e yachajo tä lewuk hin'o tä iwom.

₃₂“Wet Leví lhayis häp tä iwoye t'at chik inachajpej lhame lewukwey tä ihi lhamel laka honhates. ₃₃Wet chik Leví lhayis elh nhanayej iwoyneja chik inachaj lhame lewukwe tä iwomla tä matche tä lham tä lewukwe, is chik õyachaje chik nichäte häp nekchäm tä õhp'altsen wichi tä õyachajehen lewuhuy häp wichi lakäywet tä iwompej. Tsi hupuy tä Leví lhayis ihiche, häp tä lhamel t'at tä lewuhuy tä ihi Israel lhayis kahonhat. ₃₄Mat honhatil tä Leví lhayis leläy t'ekhawtes tä ilunejlhi laka hupuy, häp tä iwohiyet'ak õ'wom. Tsi häp tä lajit lepesa tä lhamel laka honhat tähestso.

₃₅“Chik aelh matche tä p'elitsaj wet iho ame, is chik letach'ote. Tet iwoyek akasiyak wok hin'o tä tälhe lhip elh tä takasit aj amej, let'amajej tä iyej haw'et. ₃₆Yej wo m'ak chik lesoyej wet yej t'ayhattshi laha m'ak tä lecheyäjäntej. Ch'ahuye lhaka Dios wet woye lhämtes. Ch'anlhaye t'at aelhtso tä iyej haw'et, tech'aynej chik apuhfwa. ₃₇Isit'a chik let'alhe'pe chik y'isej lhip chinaj t'äj chik lecheyäjäntej. Wet äpte isit'a chik let'ayhatchetshi laha häp n'olhäk tä lew'enho. ₃₈Lhawuk häpe aka Dios tä itonphähte amel tä letälho honhat tä Egipto, häpkhilek hiw'en amhohen häp honhat tä Canaán. Tsi t'uhläk häpe amel aka Dios.

₃₉“Chik iche amel aelh tä matche tä p'elitsaj, wet lhaifwel amho häpkhilek lechäj, isit'a chik lechumyenlhi tä letech'aynej at chik akwenek. ₄₀Is chik letech'aynej achumyenek tä lakaha ihi wok akasiyak tä iyej haw'et. Tachumhilhilat amho pajla'tha nichäte nekchäm tä wichi yachajehen lewuhuy häp lakäywet tä iwompej. ₄₁Wet häp tä nech'e yikhilach'oye haw'et, lhäy'e häp leles. Lhamel yäpnhiyela lew'et tä lepuhfwas ihi. ₄₂Tsi häp tä nilhokej amel ahäpehen t'at Lhawuk lakawos tä lham itonphähte tä tälho honhat tä Egipto. Häp tä tamenej tä isit'a chik õ'aichäjen chik õ'tech'ayen amejen n'okwenkay. ₄₃Yej ch'atej aelh chik lewoyeje m'ak tä ni'isa. Ch'ahuye lhaka Dios wet woye lhämtes.

₄₄“Wet chik lewatläk lew'en n'okwenek, is chik lechäj elh wichi tä tälhe honhatil tä i'awhäyehen. ₄₅Äpte iwoye t'at chik lechäj häp wichi tä i'amejen tä kalew'eta amel aka honhat, lhäy'e häp lhamel leles tä nichäthihchä amel aka honhat. Is t'at chik lechäjen wet alhenay lewuhuya. ₄₆Wet chik amel let'inhen, ales tä imälhehi haw'et nech'e lhamella chik yen lakwenkaya, pajla'tha nichäte ales tä lepes lheley. Tha mat isit'a chik lhen akweneka aelh chik häpe tä Israel lhayis elh.

₄₇“Chik iche hin'o tä i'amejen tä hiw'en m'ak, tä kahäpeya Israel lhayis elh, wet chik iche aelh tä matche tä p'elitsaj, wet lhaiwom, wet hin'otso tä kahäpeya Israel ichäj, wok elh hin'o tä kahäpeya Israel ichäj, ₄₈chik tetso, is chik iche lepuhfwa chik yike wet tiskanpe, ₄₉chik lewithok, wok lewithok lhäs, wok elh at chik matche tä elh. Wok lham t'at tä tiskan letape chik hiw'en laha, häpkhilek nemhit n'okwenek. ₅₀Lham lhäy'e hin'o tä pajche ichäj, lhamel itetshanhilahlä häp nekchämis, tälhe ifwala tä elhtso lhaiwom pajla'tha nichäte nekchäm tä n'ot'amajchet tä õyachajehen lewuhuy m'ak tä iwompej. Wet is chik lhamel itetshan häp n'ochumyenek lakaha, häpkhilek ihanej laha chik w'awulhi chik õtiskanejpe hin'otso wet nemhit n'okwenek. ₅₁Wet chik wuj nekchämis tä tatäy chik nichäte nekchäm tä n'ot'amajchet, is chik yachaj lhip tä wuj häp laha tä pajche õ'chäjej. Wet nech'e yachajo tä nemhit n'okwenek. ₅₂Mat chik nintäkwa nekchämis tä tatäy chik nichäte nekchäm tä n'ot'amajchet, is chik yachaj lhip tä niwuja häp laha tä pajche õ'chäjej. Wet nech'e yachajo tä nemhit n'okwenek. ₅₃Wet tä kamaj iyej hin'o tä ichäj, is chik amel letetshan häpkhilek lewuk itech'aynej chik häpe hin'o tä kan'okweneka. Tsi isit'ak nit'amajayej.

₅₄“Mat chik newache elh tä tiskanpe hin'ona, wet hin'o tä ichäj ilehiyejat chik nichäte nekchäm tä õyachajehen lewuhuy häp m'ak tä wichi iwompej. Wet nemhit häpe lakwenek, lhäy'e häp leles tä ihi. ₅₅Tsi Israel lhayis häp tä Lhawuk yen laka wichiya wet häpehen lakawos. Lham tä itonphähte lhamel tä tälho honhat tä Egipto, wet lham häpe t'at lhamel Lewuk Dios.”