Itshäwet tä õ'länhen häpkhilek tatäy wichi letes, lakey tä õyenlhi
1“Häp itshäwet tä õ'länhen häpkhilek tatäy wichi letes, häp täja lakey tä õyenlhi. Häpe t'at otw'ayhat tä matche tä ot'amajchet. 2Itshäwetna is chik õ'häne honhat lhip tä õ'länhenpej itshätäy tä õ'wunhomche tä õyachaj n'oye. Wet häp tä nech'e is chik õ'län häp itshäwet, wet lew'oyis häp tä õ'tsäyhichehena altar lhipey. 3Is chik nilhokej itshäwet t'alhä tä õyachaj n'oye: Häp lechäs t'alhä, wet t'alhä tä iyej lheley, 4lhäy'e lechäntowayis, lhäy'e t'alhä tä iyej, lhäy'e lewho t'alhä, wet t'alhä tä iyej letänek, häp tä is chik õ'lanhi, õhp'ajtej lechäntowayis t'alhä. 5Wet sacerdote nech'e iwunhihola tä i'pe altar tä häpe otw'ayhat tä õ'wujyen n'oyej. Häpe t'at otw'ayhat tä õtiskanejpe hin'o letes. 6Nilhokej sacerdotes tufwila, mat is chik tufw tä ihi honhat tä ot'amajchet, tsi häpe m'ak tä matche tä ot'amajchet.
7“Itshäwet tä õ'län häpkhilek tatäy hin'o letes, lakey tä õyenlhi tet iwoye itshäwet tä õtiskanejpe n'och'isukyaj lakey tä õyenlhi. Sacerdote tä yenlhi m'ak tä elh yen otw'ayhata, lham t'at tä tufwila t'isan. 8Wet chik sacerdote yachaj n'oye häp itshäwet tä iwunho tä elh yen otw'ayhata, lham t'at tä õyen lewuka itshäwet t'äj. 9Wet chik sacerdote yachaj n'oye otw'ayhtes tä pan tä õ'thatche n'onhonthi, wok õ'tulelh, wok õhp'o tä õ'tihi n'okähi, õhw'enhihola häp lham häpkhilek lhäk. 10Wet nilhokej otw'ayhtes tä n'olhäk tä tälhe yachuyaj lhay tä õ'thate aceite wok tä aceite newayej, is chik w'awulhchä tä õhch'esajen, wet häp tä õhw'enhihomchela nilhokej sacerdotes tä Aarón leles.
M'ak tä wichi yen Lhawuk t'awayhata tä lha'isyene, lakey tä õyenlhi
11“Häp m'ak tä wichi yen otw'ayhata tä lha'isyen n'oye, häp täja lakey tä õyenlhi. 12Chik m'ak tä tamenej tä hin'o hiw'en n'oho otw'ayhatna häp tä akäjejlhi m'ak tä owoyeje, is chik äpte hiw'en n'oho pan tä levadura newayej tä õ'lheteji aceite, lhäy'e tortillafwas tä õ'tsäche'pe aceite, lhäy'e pan tä õyenejlhi harina tä matche tä is tä õ'lheteji aceite. 13Wet is chik hip'ajtej pan tä levadura iyej. 14Tä nilhokej otw'ayhtesna, wet õtchumhiyela tefwajpejni lhip wet õyachajila n'oye. Wet sacerdote tä tachuma itshäwet w'oyis wet itsäype altar, häp tä lhamlak tufw pan lhipeytso. 15Wet t'isan itshäwet tä hin'o ilän tä akäjejlhi m'ak tä owoyeje lhäy'e tä lha'isyen n'oye, is chik häpe t'at ifwala tä lham yachaj n'oye tä ihämit tä tufw. Isit'a chik imälhthi lhip chik t'amajej yämlek nichäte ifwala elh.
16“Mat chik hin'o ihän n'oye itshäwet tä ilän häp tä nitichunhichela lhämet tä iwoyej n'oye tä yäm matche, wok häp tä hin'o letichunhayaj t'at tä iwo otw'ayhata, is chik häpe t'at ifwala tä yachaj n'oye itshäwet tä tufw. Wet lhip tä imälhehi kamaj isila t'at chik tufw tä ifwala elh. 17Chik kamaj imälhehi lhip, wet chik tumej kanhi nemhit is chik õt'amajej. Is chik õ'wunho häpkhilek itäj ihämit. 18Wet chik tumej kanhi, chik iche elh tä tufw, nemhit laha ihi otw'ayhatna. Tek otchumlahlä tsi nech'e oy'ulhan. Wet elh chik tufw wet letes ihi.
19“Itshäwet t'isan tä õyen otw'ayhata, chik iche m'ak tä kok'aye chik tachuma, nemhit is chik õtufw. Mat is chik õ'wunho t'at yämlek nofw.
“Häp hin'o chik nikok'ayayeje m'ak chik häpe, häp tä is chik tufw itshäwet tä otw'ayhat.
20“Mat hin'o chik kok'ayeje m'ak chik häpe, chik tufw t'isan itshäwet tä otw'ayhat tä õ'län häpkhilek wichi lha'isyen n'oye, is chik õ'soyej tä iyej Israel lhayis. 21Elh chik häpe chik kok'ayeje m'ak chik tälhe elh wok itshäwet, wet chik äp tufw t'isan itshäwet tä õyen otw'ayhata, is chik õ'soyej tä iyej Israel lhayis.”
Itshäwet tä Lhawuk t'awayhat t'alhä lhäy'e lew'oyis, lakey tä õyenlhi
22Lhawuk tahuyej Moisés wet yok:
23–Häp tähesna olhämtes tä is chik lefwenho häp Israel lhayis. Isit'a chik tufw tolo t'alhä lhäy'e tson'ataj t'alhä wok kayla t'alhä. 24Itshäwet p'itsek t'alhä, wok itshäwet tä elh ilän wet iwo lhipeya, is t'at chik yene m'ak chik häpe, mat isit'ak tufw.
25“Elh chik häpe hin'o chik tufw häp t'alhä itshäwet tä õhw'en n'oho tä õ'wunho, is chik õ'soyej tä iyej Israel lhayis.
26“Lhip chik häpe tä amel lhehi, isit'a chik letufw afwenche lew'oyis wok itshäwet lew'oyis. 27Elh chik häpe chik tufw m'ak chik häpe lew'oyis, õ'sohiyeja tä iyej Israel lhayis.”
Itshäwet lhipey tä õhw'enhatej sacerdote
28Lhawuk äp tahuyej Moisés wet yok:
29–Fwenho häp Israel lhayis, Chik iche elh tä ihän n'oye itshäwet tä ilän tä lha'isyen n'oye, is chik itihi t'at tä ottache. 30Is chik lham t'at tä ichäj n'oye häp otw'ayhat tä õ'wunho. Is chik ichäj n'oye t'alhä lhäy'e t'okwe, wet iti n'oye tä yen otw'ayhata. 31Wet sacerdote iwunhihola itshäwet t'alhä, itihla'pe altar. Mat häp let'okwe wet häp tä sacerdote lhayis tufwila. 32-33Wet itshäwet lheche t'isan tä lefwomkat, äp is chik õhw'enhatej sacerdote tä yachaj n'oye itshäwet w'oyis lhäy'e t'alhä. 34Chik Israel lhayis ihän n'oye itshäwet tä ilän tä lha'isyen n'oye, wet is chik hiw'enhatej sacerdotes tä häpe Aarón lhäy'e leles häp itshäwet let'okwe lhäy'e lheche t'isan tä lefwomkat. Häp täjtso m'ak tä Israel lhayis iwohiyet'ak niwoyaye yämlek tiyäj'attsiy.
35“Häp itshätäypej tä õ'wunhomche tä õyen otw'ayhtesa, is chik õhw'enhatejpej Aarón lhäy'e leles häp t'isan lhipeytso, tälhe t'at ifwala tä ow'enho len'ohyaj tä oyen oka sacerdotesa. 36Ot'uhläk Israel lhayis hiw'enhatej lhipeytso häp sacerdotes, tälhe ifwalatso, wet one'tek lhamel yen lakeya pajla'tha nichäte leles tä lepes lheley.”
37Häp tähestso lakeyis tä õyenlhi häp m'ak tä õyen Lhawuk t'awayhata. Wok oyok, itshätäy tä õ'wunhomche, lhäy'e n'olhäk tä tälhe yachuyaj lhay, lhäy'e t'awayhtes tä õtiskanejpe n'och'isukyaj, lhäy'e t'awayhtes tä wichi hiw'enho häpkhilek Lhawuk itäyhtej letes, lhäy'e t'awayhtes tä hiw'enho chik Lhawuk hiw'enho len'ohyaj häp Aarón lhäy'e leles tä yen laka sacerdotesa, lhäy'e t'awayhtes tä wichi hiw'enho tä lha'isyene. 38Tä Moisés i'pe chenaj Sinaí tä ihi honhat tä ts'anis, Lhawuk ne'tek mälhyejtso t'awayhtes tä Israel lhayis iwoyeje.
