Luc 1

_1-4Teófilo: Ochen ame olhämetna tä ahäpe elh tä lewujyaj ihi. Ot'uhläk wuj tä lehanej tä matche t'at häp m'ayhay p'ante in'oyejen tä pajche õ'chufwen amej. Wujpe iyhäj tä t'uhläk ikalelhätchä m'ayhaytso, wet lhamel itihi lelesaynhay häp m'ak tä wichi tä hiw'enpe ifwenho olhamel. Tsi wichina matche tä hiw'enpe nilhokej m'ayhaytso, tälhe tä iwo tesa, wet yen at silätyaja. Tä mälhyejtso, tä olham pajche lhäy'e lhip tä olhaichufwenej tähestso, ow'en tä is che olhamtej olesayen m'ak tä kalelhäj, tälhe tä ichun pajtha nichäte lepes. Wet häp täja m'ak tä ochen amena.

₅Häp lewhäy p'ante hin'o tä lhey Herodes niyatej honhat tä Judea, iche p'ante sacerdote tä lhey Zacarías, lham häpe t'at sacerdotes tä Abías lhayis elh p'ante. Wet lech'efwa lhey Elisabet, tälhe Aarón lhayis p'ante. ₆Häp lham lhäy'e lech'efwa inukwe t'at Dios len'äyij, lhamel iwoye nilhokej Lhawuk lhämtes wet nehit katsik ihanej iwoyneje che yen tesayej m'ak at che häpe. ₇Mat leles ihihit'a, tsi tälhe tä Elisabet lhutsha, sufwnaj t'at, yäk wuj tä thänhäy lhamel.

₈Wet nichäte p'ante lewhäy tä sacerdotes tä Abías lhayis tachumhilhi Dios Lew'et tä ihi Jerusalén. ₉Wet lhamel lakey tä iwo sorteaya, wet yiwete Zacarías yämlek ihochufwi Lech'o Elh tä N'ot'amajchet häpkhilek iwunho incienso. ₁₀Wet tä iwunho, nilhokej wichi i'alhoye tä iwo let'alhyaja. ₁₁Wet ángel tä tälhe Lhawuk lhain'ältej Zacarías, takasit tä ihi lhip tä lefwomkat häp altar tä incienso lew'et tä õ'wun. ₁₂Tä Zacarías hiw'en, inuhat lhamho, wuj tä nowaye. ₁₃Mat ángel tahuyej wet yok:

–Zacarías, yej noway, tsi Dios iläte t'at alhyaj tä lewoyepej, wet hach'efwa Elisabet iwohla lhäsa. Ena lheya Juan. ₁₄Akäjyaj tapohla amej, wet wujla'pe wichi che akäjejlhi che nech'e iche, ₁₅tsi Lhawuk yenhiyela hin'o tä len'ohyaj ihi. Iyähiyejt'ala vino wok hat'es che häpe, wet Espíritu tä Dios T'amajchet tapohiyeja tälhe tä ihi lako kachowej. ₁₆Wet inachajiyela wujpe Israel lhayis häp Lewuk Dios. ₁₇Wet hätehlat iwoye profeta Elías p'ante, n'okhajyhayaj p'ante iyej häpkhilek iyej, wet ichunlach'oye Lhawuk, häpkhilek inityenej wichi yämlek lha'isyene leles wet kachuhantses iwoye m'ak tä wichi tä isen iwoye. Mälhhiyejatso Juan lechumet, tä iwaklhat wichi yämlek ichumlä Lhawuk.

₁₈Zacarías tay'ätshane ángel wet yok:

–¿Chiwoye, atsi m'ak tä tach'ot n'oye yämlek ohanej tä matche täjtso? Tsi olham och'ut, och'efwa häte hich'ut t'at.

₁₉Ángel nichulho wet yok:

–Olham ohäpe Gabriel, otch'ote Dios lechumet. Lham t'at tä ichenn'o ame yämlek ofwel amho lesilätyaj tä isilatajna. ₂₀Mat tä lekachu olhämet, nemla letahuy pajla'tha nichäte lewhäy che lhayäm matche tähestso.

₂₁Wet wichi tä i'alhoye tä iniwhihlä Zacarías, lhamel tay'ätshan lhamehen tä yok:

–¿Atsi m'ak tä tamenej tä pajlä Zacarías che inuphä tä ichufwi Lhawuk Lew'et?

₂₂Tä paj wet inuphä t'at, mat nemhit tahuy, wet wichi nitäfwelej tä lew'enek ihin'e tä ichufwi Lhawuk Lew'et. Wet ichumyenlhi takweyey tä yämhoplhi lhamel, tsi nemhit lepak ihi.

₂₃Wet tä nichäte ifwala tä ileyej ayej lechumet tä ihi Lhawuk Lew'et, yäple lew'et. ₂₄Tä tajyäme ifwalastso, nech'e hich'otshan häp lech'efwa Elisabet, wet cinco meses tä ninuyaphä tä ichufwi lewukwe. Wet letichunhayaj yok, ₂₅“Häp Lhawuk hip'altsenn'o athana, häpkhilek wichi nemhit iläkwlhin'o.”

₂₆Tä tajyäme seis meses p'ante tä hich'otshan Elisabet, Dios ichene laka ángel Gabriel häp hupuy tä lhey Nazaret tä ihi honhat lhip tä Galilea, ₂₇ne'tek ihoye atsinha lhutsha tä lhey María. Lham kamaj lhakn'ajayej hin'o che häpe, mat pajche kalelhäj tä yenla lech'efwaya hin'o tä lhey José, häp rey David p'ante leles tä lepes lhele elh. ₂₈Wet ángeltso tiyäjchufwi hup tä María ichufwi, wet tahuyej tä yok:

–¡Amtena! ¡Lhawuk i'amej! ¡Dios tatshupiyej ame lep'altsenyaj!

₂₉Tä lhutsha iläte lhämtestso, wuj tä t'iseltej wet inuhat lhamho, wet itichunejlhi tä yok, “¿Atsi m'ak tä tamenej tä iwoynejetso lhämet tä n'okwi n'oyej?” ₃₀Mat ángel yok:

–María, yej noway, tsi i'amej Dios lakäpfwayaj tä is tä itshupyenej ame. ₃₁Ofwel amho tä lech'otshanhila wet lewohla äsa, lhenla lheya Jesús. ₃₂Häpkhila hin'o tä len'ohyaj ihi wet õyenla lheya Dios tä N'owujtaj Lhäs. Wet Lhawuk Dios yenla häpeya Niyat tä wuj, mälhhiyejat iwoye letes David p'ante, ₃₃häpkhilek niyatej Israel lhayis yämlek tiyäj'attsiy, najit lepese Leniyatyaj.

₃₄María tay'ätshaneje ángel wet yok:

–Mat ¿chiwoye che mälhhiyejatso, tä n'am newej hin'o?

₃₅Lham nichulho wet yok:

–Häp Espíritu tä Dios T'amajchet nämla atape, wet Dios tä N'owujtaj lakhajyhayaj lepeyak takasthila atape. Häp tä tamenej tä han'äfwaj tä nech'e ihichela, lheyla N'ot'amajchet, Dios Lhäs. ₃₆Häte aelh Elisabet hich'otshan, tej tä häpe atsinha tä hich'ut t'at wet wichi yäme tä sufwnaj, athana nech'e seis meses tä hich'otshan. ₃₇Tsi niwohit m'ak che athaho häp Dios.

₃₈Tä María iläte, wet yok:

–Is, ohäpe t'at Lhawuk kwenek. Is che iwoyej at n'oye m'ak tä lhämetso.

Häpet tä mälhyejtso, ángel yikch'oye.

₃₉Wet häp ifwalastso María nakeltshi tä ihoye hupuy tä ihi chenhas tä ihi honhat tä Judea. ₄₀Tä nichäte, wet ihochufwi Zacarías lewukwe wet n'okwiyej Elisabet. ₄₁Tä Elisabet iläte María tä n'okwiyej, wet lhäsaj tä ihi lakachowej w'ahuye. Wet nech'e Espíritu tä Dios T'amajchet tapoyej Elisabet, ₄₂wet ifwitsenej lechos wet yok:

–¡Am lenu'pe nilhokej atsinhay iyhäj tä Dios takäpfway ame, wet takäpfwaye häp äs! ₄₃¿Atsi tä ohäpe tä Owuk lako t'isiyakay n'oye? ₄₄Tsi tä olät ame tä len'okwi n'oyej, wet olhäsaj tä in'ohi w'ahuye tä lakäjyaj ihi. ₄₅¡Lhawuk lakäpfwayaj tä is i'amej, tä lechaye tä lhayämla matche m'ayhay tä ifweln'aj amho!

₄₆Wet nech'e María yok:

₅₆María iyej ayej Elisabet pajtha tres meses, wet nech'e yäple lew'et.

₅₇Tä nichäte p'ante lepes lewhäy tä Elisabet hich'otshan, wet iwo p'ante lhäsa. ₅₈Wet iyhäj, lhäy'e iyhäj tä lew'etfwas, tä ihanej tä Lhawuk wuj tä itiyej lep'altsenyaj, lhamel ihoye yämlek iwo lakäjyaja lhamejen.

₅₉Tä tajyäme p'ante ocho ifwalas, wet õ'tiyej n'otetnek tä n'olhijtsek häp han'äfwaj. Wet lhamel t'uhläk õyen lheya lajcha lhey Zacarías, ₆₀mat lako Elisabet yok:

–Kha, lhey Juan.

₆₁Lhamel nichulho wet yok:

–Mat ihichet'a elh amel che lhey n'olheytso.

₆₂Wet lhamel ichumyenlhi takweyey tä tay'ätshaneje Zacarías häp lhey tä lham ihuminche yämlek itiyej. ₆₃Wet Zacarías t'alhe hal'ä t'äj lhip, wet ilesayen tä yok, “Lhey Juan.” Wet nilhokej wichi tä iyej t'iseltejen. ₆₄Häpet tä mälhyejtso, Zacarías nech'e yachajo tä tahuy, wet iwujyen Dios. ₆₅Wet nilhokej wichi tä lew'etfwas lhäy'e lhip tä leselthayaj ihi, lhäy'e lenowayhyaj, wet toyehi imälhewek honhat tä chenhas tä ihi Judea m'ak tä mälhyejtso. ₆₆Wet nilhokej lhamel tä ihanch'oye wuj tä yen tichunhayaja wet yok:

–¿Atsihila tä häpe han'äfwajtso?

Tsi n'äl tä Lhawuk matche tä iyej häp lham.

₆₇Wet han'äfwaj lajcha Zacarías nech'e Espíritu tä Dios T'amajchet tapoyej, wet yämyenlhi tä yok:

₈₀Wet tä lhaichihelit han'äfwaj, takhajay lehusek. Wet yen lew'eta honhat tä ts'anis, pajtha nichäte ifwala tä lhaitäfwnhatej Israel lhayis.