Jesús ichen lesilätyajwos tä ihi setenta y dos
1Tä tajyäme tähestso, Lhawuk itshupyene setenta y dos lechufwenkay wet ichen lhamel täkwfwaspej yämthilek ichunch'oye lham wet ihoyehen nilhokej hupuy lhäy'e wichi lew'etes tä lham t'uhläk ihoyehen. 2Wet tahuyej lhamel wet yok:
–Wuj yachuyaj chik õ'lanhi, mat nitäkwit'a chumhas. Häp tä tamenej, alhaye yachuyaj Lewuk yämthilek ichen lewos tä ilanhi. 3¡Mäyay amel! Lhek yahinya, tä oaichenhen ahätet iwoye tson'atas les tä ihi lechowej t'owalhas. 4Tä lhekhen, yej chäj akhäyhi, wok aka chinaj t'äj lehi, wok anisähis. Wet chik lechutej elh chik ihi n'äyij, yej takastej yämthilek len'okwiyej. 5Wet chik letiyäjchufwi hup chik häpe tä lechäte, chunkat tä len'okwiyej, olak, “Is chik letamsek ihi lew'etna.” 6Wet chik iche wichi tä n'otamsek leles, matche, n'otamsek tä lehumin chik iyej ihiyeja lhamel. Mat chik newache, letamsek ihiyejt'ala lhamel mat tapinla amehen.
7“Ehi t'at hup tä lechäte, tufw wet yäyej m'ak tä lhamel hiw'en amhohen, tsi hin'o tä chumaj t'uhawetej t'at chik ikalhi lakaha. Mat ofwel amhohen, yej t'ayhtejen wet yej hoyehen iyhäj lew'etes. 8Chik lechäte hupuy tä wichi ichum ahilähen, tufw t'at m'ak chik lhamel hiw'en amhohen. 9Chesthen iyhäj tä t'inhayaj ilänhen tä ihi, fwenho lhamel tä lhoyaykwe, Dios Niyatyaj tott'a amehen. 10Mat chik lechäte hupuy chik wichi nitchuma ahilähen, nukwehen hup kawayhil wet oyaykwe, 11¡Häp honhat mok tä tälho aka hupuyna, olhamel osichätchä tä ihiche opach'ol tä oyen tetnekayej tä matche tä ates ihi! ¡Mat is tä lehanej tä Dios Niyatyaj tott'a amehen!
12“Ofwel amhohen, chik nichäte Ifwala tä N'okalelhthayaj, häp n'otasnhayaj chik ihiyeja wichi tä ihi hupuytso, inuhla'pe n'otasnhayaj chik ihiyeja lhamel p'ante ihi Sodoma.”
Kachuhantses wichi tä ihi Galilea
13“¡Amel tä haw'etes Corazín lhäy'e Betsaida, awit'äy ihla amejen! Tsi chik häpkhi Tiro lhäy'e Sidón p'ante chik õyenhilhi n'otetnhay mälhyej tä oyenlhi tä i'amejen, wichi tä ihi pajiche iwohi lehusey iyhäja. Lhamel tatayhichephä wet taw'uyhiche lew'uyis tä ni'isa wet ipotej letapehen mok'otaj. Häp tähestso hin'älthi tä matche tä ileche lakeyes wet lhaitilhkate Dios. 14Mat chik nichäte Ifwala tä N'okalelhthayaj, häp n'otasnhayaj chik ihla amejen inuhla'pe n'otasnhayaj chik ihiyeja wichi tä ihi p'ante Tiro lhäy'e Sidón. 15Wet amel tä haw'et Capernaum, ¿hä lhenayek õ'aineyhthiphäla yäk lechät puleye? ¡Kha, õ'aithathichela chowej tä laj lech'oya tä n'oteläythayajw'et!”
16Tä Jesús ileyej tä iwoyetso, wet tahuyej lechufwenkay wet yok:
–Elh chik tach'ahu amehen, olham tä tach'ahu n'oye. Wet elh chik nitchuma ahilähen, olham tä nitchuma n'ohlä. Wet elh chik nitchuma n'ohlä, häte tachumhit'ahlä Elh tä lechenekn'o.
Jesús lechufwenkay tä ihi setenta y dos tapilche alhoho
17Jesús lechufwenkay tä ihi setenta y dos wuj tä lakäjyaj ihi tä tapilche alhoho, wet tahuyej Lewuk wet yok:
–¡Iwuk, y'ajet ahät lhayis tä iwoye olhämet tä owo eya!
18Jesús nichulho wet yok:
–Matche, ow'en Satanás tä nichätchä tä tälh puleye, hätet iwoye lep. 19Lhek yahinya, ow'en amhomche akhajyhayaj yämthilek let'äsaype amlhätas lhäy'e chitsom lhayis, wet äp imälhewek Atayhfwa lakhajyhayaj tä lekalhi, mat ihit'ala amejen awit'äyhyaj chik häpe. 20Mat yej a'käjejlhi tä ahät lhayis iwoye ämet, a'käjejlhi tä pajche õ'lesayen amel eyes tä ipuleye.
Jesús lakäjyaj ihi
21Häp lewhäytso Jesús wuj tä lakäjyaj iyeji Espíritu tä Dios T'amajchet wet yok:
–Owunit ame, Ijcha tä ahäpe pule lhäy'e honhat Lewuk, tsi leskatho m'ayhayna häp hin'ol tä ihanche m'akejen lhäy'e tä letäfwnhayaj ihi, mat len'ältej häp iyhäj tä kamaj nhana m'akejen. Matche, Ijcha, häp tä let'uhläk mälhyej'attso.
22Tä ileyej tä iwoyetso, wet yok:
–Ojcha hiw'en n'oho nilhokej m'ayhay. Wet nehit katsik nitäfwelej elh tä lham Lhäs, tajlhamat Lajcha tä nitäfwelej. Wet äp nehit katsik nitäfwelej Lajcha, tajlhamat Lhäs tä nitäfwelej, lhäy'e iyhäj tä Lhäs ihumin chik itäfwnhatej.
23Tä iwoyetso, wet nitilhake lechufwenkay tä ts'ilak lhamel wet yok:
–Dios lakäpfwayaj tä is iyej lhamel tä hiw'en m'ak tä amel lew'enay. 24Ofwel amhohen, wujpey profetas lhäy'e niyatey tä t'up'antehläk hiw'en m'ak tä amel lew'enayna, mat hiw'enhit'a. Lhamel t'up'antehläk iläte m'ak tä amel lelätayena, mat iläthiyet'a.
Samaritano tä lechowej ihi
25Häp hin'ol elh tä lhayen lewosayej Ley p'ante tälhe Moisés, nephä wet takasit, t'uhläk yelhte Jesús tä yämhoplhi wet yok:
–Maestro, ¿atsi m'ak chik owoye yämlek onchäte häp n'ow'atshancheyaj tä t'un?
26Jesús yok:
–¿Atsi m'ak tä Ley p'ante tälhe Moisés yäme? ¿Atsi m'ak tä leyahyenpej?
27Hin'otso nichulho wet yok:
–Humin Awuk Dios, mälhewek ahusek, lhäy'e mälhewek akhajyhayaj, lhäy'e mälhewek atichunhayaj. Wet humin aelh, tech'ayen amej tä alehumin.
28Tä Jesús iläte, wet yok:
–Is alhoho tä lechulho. Chik lewoye täjtso, ihla amej haw'atshancheyaj.
29Matkat hin'otso t'uhläk kalelhäj tä lham häpe t'at hin'o tä is, wet häp tä äp y'isej ley'ätnhayaj elh tä yok:
–¿Wet atsi tä häpe oelh?
30Jesús nichulho wet yok:
–Iche hin'o tä inukwe n'äyij tä tälhe Jerusalén wet ihoye Jericó. Tä yäm kanhi, nichutej etantses, wet lhamel itsoklhi wet ipäjlhi wet isoyej lew'uyis, wet yikch'oye tä eyte y'inhi. 31Wet iche p'ante sacerdote tä inukwe n'äyij tä ihi, mat tä hiw'en, tumej n'äyij lhip wet yik t'at. 32Wet äp iche Leví lhayis elh, tä nichäte lhip tä hin'o ihi, häte tumej lhip n'äyij wet yik t'at. 33Mat iche hin'o tä Samaria lhele, lham häte inukwe n'äyijtso. Tä hiw'en hin'o, wet wuj tä hip'altsen 34wet ihoye, wet y'ilenpe aceite lhäy'e vino häp lelätshay wet inayhtejpe sak'al lhipey. Wet nech'e iti'pe lew'ute wet ihäne n'okasthawet wet t'uye t'at. 35Tä ifwala elh itonphä lhip chinaj t'äj wet hiw'enho hin'o tä hup lewuk. Wet ifwenho tä yok, “Uye häp hin'ona, wet chik m'ak chik lech'otyeneje inu'pe täja, olham owohla lahaya chik onäm.”
36Wet nech'e Jesús tay'ätshane n'olhämetwo wet yok:
–Tä mälhyejtso, ¿atsi elh lhamel tä tresna tä lefwetaj lhayen elha häp etantses länek?
37Hin'otso nichulho wet yok:
–Häp elh tä hip'altsen wet hich'ote.
Wet Jesús yok:
–Tä mälhyejtso, häte am woynejetso m'ak tä lewoye.
Jesús ihi Marta lhäy'e María lew'et
38Jesús tujlhache len'äyij wet nichäte wichi lew'et, wet atsinha tä lhey Marta tachumlä tä ihi lew'et. 39Marta lech'inhä ihi tä lhey María, wet tä Jesús nämchufwi lew'et, lham ihoye wet tatayphäwhäye lepach'ol yämlek tach'ahuye m'ak tä yäme. 40Mat Marta wuj tä lechumet ihi wet lhailhaklitej m'ak tä yenlhi. Tä mälhyejtso, ihoye Jesús wet yok:
–Iwuk, ¿hä lew'enhit'an'o tä och'inhä hits'ilkat n'oyej ochumet? Lhek fwenho ayej, häpkhilek tach'ot n'oye.
41Mat Jesús nichulho wet yok:
–Marta, Marta, wuj tä alelhaklitejlhi wujpe m'ayhay, 42mat iche m'ak weihalha tä is chik lhen atichunhayaja. María tatshupiye m'ak tä lhäy'e lhip tä is, wet nehit katsik isohiyeja.
