Luc 12

₁Iche p'ante wujtaj'atpey wichi tä lhaihutwek, wet tafwomwethä lhamejen. Wet Jesús iwo tesa tä yämlhi, ichunkat lechufwenkay tä tahuyej wet yok:

–Uyayhlä Fariseo lhayis laka levadura, wok oyok, lhamel t'akanyajay. ₂Tsi m'ak at chik häpe chik õhp'o'pe, õ'fwoyenhila'pe, wet m'ak at chik häpe chik õ'iskat, õhn'älthila. ₃Tä mälhyejtso, nilhokej ämtes at chik häpe chik lhehi honatsi, õ'läthiyela tä ihi fwala. Wet ämtes at chik häpe chik letasamsanej wet äp lep'ohi lepe awukwe tä lhechufwi tä lhämlhi, õ'fwitsenhiyeja chik õyen silätyaja.

₄“Yaiyhäj, ofwel amhohen, yej nowaye lhamel tä ihanej iwoyneje tä ailänhen, tsi tajlhama t'at täjtso tä ihanej iwoyneje. ₅Mat ofwel amhohen Elh tä häpe tä is chik lenowaye, oyok, Tiyej anowayhyaj Elh tä ihanej iwoyneje tä iso amej haw'atshancheyaj wet lakhajyhayaj ihi yämthilek aithatho n'oteläythayaj tä t'un lew'et. Häp tä is chik lenowaye lhamtso.

₆“Lhek yahinya afwencheyhas, tej tä lhimphaj laha tä õ'chäj cincofwas lhamel, mat Dios tek hip'ethatlä elh tefwajni. ₇Wet amel ahayay inu'pe wujpe afwencheyhastso, tsi y'aje haw'oley tä i'pe etek tä Dios ihanej chihätefwas. Wet häp tä oyok, yej nowayay.

₈“Ofwel amhohen tä elh chik häpe chik ifwenho wichi tä yok, Ohän Hin'o Lhäs tä häpe Jesús - wet häte Hin'o Lhäs ifwenhihola Dios laka ángeles, oyohlakwe, Matche, n'aelh t'at lhamtsi. ₉Mat elh chik häpe chik nowaye wichi wet ifwenho tä yok, Ontäfwenhiyejt'a Jesús - häte ofwenhihola Dios laka ángeles, oyohlakwe, Ontäfwenhiyejt'a lhamtsi.

₁₀“Dios itäyhthiyeja letes elh at chik häpe chik itiyej lhämtes tä ni'isachehen häp Hin'o Lhäs. Mat elh chik isitäynej lhämtes tä ni'isachehen häp Espíritu tä Dios T'amajchet, Dios tek itäyhthiyeja letes.

₁₁“Chik wichi aitsokwethä wet ihän amehen laka concilios, wok laka niyatey, wok n'okalelhthayajwos, yej lhak'ale ämet chik lewohiyela, wok lhämlhi atape, ₁₂tsi Espíritu tä Dios T'amajchet häpkhilek ichufwen amej ämet chik lewoye.”

₁₃Iche hin'o tä iyej wichi, tahuyej Jesús wet yok:

–Maestro, fwenho ochila häpkhilek hiw'en n'oho lhip tä olewuk häp lakäywet.

₁₄Jesús nichulho wet yok:

–Yaelh, ohäpkhit'a amel akalelhthayajwo, wok olewo yämthilek oyachajehen wichi häp m'ak tä lewuk.

₁₅Tä iwoyetso, wet tahuyej wichi wet yok:

–Uyayhlä, yej alhen alhaknhatsesa, tsi hin'o lew'atshancheyaj tälhiyet'a lakäywet tä wuj tä iti lhamej.

₁₆Wet y'isej lhämet tä itech'aynej täja wet yok:

–Iche p'ante hin'o tä hiw'en m'ayek, wet wuj yachuyaj lhay tä ilanhi tä ihi laka honhat. ₁₇Wet iti lhamhi letichunhayaj wet yok, “¿Atsi m'ak tä owoye? Tsi newache lew'et yämthilek otihi nilhokej okäs lhay tä ot'amajej.” ₁₈Wet tä nitichunejlhi t'at m'ak chik iwoye, nech'e yok, “Athana ohanej m'ak tä owohiyela. Onachuhila okapuchehis wet oyenhilhila iyhäj tä wus, yämthilek othathomche okäs lhay lhäy'e nilhokej okäywet tä in'oyej. ₁₉Wet oyohlak, Athana wuj m'ak tä in'oyej tä ot'amajej, pajla'tha wujpey nekchämes. Is chik otamsek ihi, is chik ot'ek wet oyä wet owo okäjyaja.”

₂₀“Mat Dios tahuyej hin'otso wet yok, ¡Ach'isuk! Honatsina õ'sohla amej ahusek wet let'il t'at, wet m'ayhay tä let'amajejna, ¿atsihilak lewuk?”

₂₁Tä Jesús iwoyetso, wet yok:

–Häp tä mälhyej'attso elh chik häpe tä ihut lhamej lakäywet mat Dios yok, “P'elitsaj t'at.”

₂₂Wet äp Jesús tahuyej lechufwenkay wet yok:

–Häp tä ofwel amhohen, yej lhenay alhakliya wet lhok, “¿Atsihila m'ak chik oisej?” Yej lhak'alejlhi m'ak chik letufwla wok m'ak chik letaw'uyhihla. ₂₃Tsi haw'atshancheyaj inu'pe m'ak tä letufw, wet asan inu'pe haw'uy. ₂₄Lhek tetshan tsetwos, tek tutcheyhen wet tek ilanhi lakäs lhay wet iwohit'a lakapuchehisa, mat Dios t'at tä hiw'enhomche lhäk. Wet lhek yahinya, ¡amel ahayay wuj tä inu'pe afwenchey! ₂₅Wok ¿atsi elh amel chik letichunhayaj tä ilän lhamej ihanej iwoyneje tä y'ayhattshi lhimphaj lew'atshancheyaj? ₂₆Tä mälhyejtso, chik kahanayej lewoyneje m'ak tä lhimphajna, ¿chipte tä w'et alelhaklitejlhi m'ayhay iyhäj?

₂₇“Lhek tetshan hal'ä lhawol, tej tä nitchumawethä wet nityhinahen, mat lhaichihelthen t'at. Niyat Salomón p'ante, tej tä yäm isis lew'uyis tä taw'uyhi, mat ofwel amhohen tä w'awulhihit'a elh chik häpe hal'ä lhawo. ₂₈Tä mälhyejtso, tä Dios iwoynejetso lesilatyaj häp hal'ä lhawol tä ihi tayhi fwalana wet chik fwala õ'thatho n'onhonthi wet õhp'ohen, oyok, amel lhäy'ehila lhip chik t'u amehen wet iwo haw'uya. ¿Chipte tä lhimphaj tä lechayaye?

₂₉“Tä mälhyejtso, yej lhen alhakliyach'oye m'ak chik letufwla, wok m'ak chik leyähiyeja, wok m'ak at chik häpe. ₃₀Tsi honhat leles häp tä yenpej lhakliya m'ayhayna, mat amel Ajchayay pajche ihanej t'at tä lewataypejlä. ₃₁Tä mälhyejtso, mälhetwek tä lhenay atichunhayaja Dios Niyatyaj, wet häte ihla amejen m'ayhaytso.

₃₂“Yej nowayay, tä ahäpe oläy tson'atas tä niwuja'pe, tsi Ajchayay wuj tä akäjlhi amejen wet ayenla niyateya chik lheyayhi Leniyatyaj. ₃₃Wom akäywet, w'enhomche laha häp wichi tä p'elitses, wet hanchehen lehis akäywet tä nhanayej chik hich'ut, häp akäywet tä nittäya tä ipuleye tä newache etantses chik tiyäjo wok lewos chik tufw. ₃₄Tsi lhip tä akäywet ihi, häpkhilek lhen at atichunhayaja.

₃₅“Awaklhathen, unthi haw'uy tä letaw'uyhi, wet yej ch'anlhaye achäkw chik y'om. ₃₆Is chik ahätet iwoye n'okawos tä inihich'oye lewuk chik tapil tä tälhe n'okäjyaj. Häpet tä näme lepe, wet t'änch'oye lakawos wet yofwajkwet lhamel ifwoyenlä. ₃₇Dios lakäpfwayaj tä is iyej n'okawos tä lewuk näm wet hiw'en tä tek imähen. Matche tä ofwel amhohen, oyok, Lewuk ne'tehlak lhamel ihowhäye laka mesa wet lham hiw'enhomche lhäk. ₃₈Wet matche, n'okäpfwayaj tä is iyej t'at lhamel chik lham näm tä honaj chowej wok tä kamaj ifwala tojchä, wet hiw'en tä lhamel tek imähen.

₃₉“Wet lhek tetshan: Chik hup lewuk ihanhiyej lewhäy chik nämla etantsaj, imähit'a tä t'uye t'at lew'et. ₄₀Wet amel häte awaklhathen, tsi ifwala chik tek lhenayek nämla Hin'o Lhäs, häpkhilek näm.”

₄₁Tä Jesús iwoyetso, wet Pedro tay'ätshane wet yok:

–Iwuk, ¿hä ämettso ts'ilak olhamel tä lhämej n'oyehen, wok nilhokej wichi tä lhämeje?

₄₂Lhawuk nichulho wet yok:

–¿Atsi elh tä häpe n'okawo tä afwtintsaj wet lehusek ihi? Häpe t'at elh tä lewuk yen lewoyayej n'okawos iyhäj tä ihi lew'et, wet häp ifwalastso tä lewuk newa katsi lham hiw'enhomchepej lhäk lhamel tä nichäte lewhäy. ₄₃N'okäpfwayaj tä is iyej n'okawo tä lewuk näm wet hiw'en tä iwoye t'at m'ak tä lham ne'tek iwoye. ₄₄Matche tä ofwel amhohen tä n'okawotso lewuk yenla lewoyayej nilhokej m'ak tä ihi lew'et. ₄₅Mat chik nimälhyayejtso, elat lakawotso hiw'en tä pajlä lewuk, wet nech'e iwo m'akayej lewuk kawos iyhäj lhäy'e iyhäj tä atsinhay, wet t'ek t'at lhäy'e tä iyä, wet w'oknaj t'at. ₄₆Lhek tetshan olhämet, oyok, Häp ifwalatso tä nem yen tichunhayaja lewuk chik nämla, wet ihanhiyejt'a hora chik häpkhila, häpe t'at lewhäytso tä lewuk näm, wet wuj tä itasnhila lakawotso wet ithate iyhäj tä kachuhantses.

₄₇“Häpet n'okawo chik ihanej lewuk lenech'ethayaj, mat tek lhaiwaklhat wet niwoyaye mälhyej m'ak tä lewuk ihuminche, lhäy'ehila lhip chik õ'tasinlhi. ₄₈Mat häp n'okawo chik nhanayej lewuk lenech'ethayaj, wet iwoye m'ak tä ni'isa, oyok, wujit'alak õ'tasinlhi. Tsi elh chik häpe tä pajche õhw'enho m'ak tä wuj, häte wujlak õt'alhe'pe. Wet elh chik wuj tä õt'ekhayeje m'ayek, lhäy'ehila lhip chik õ'nityenej.”

₄₉Jesús y'isej lhämet elh tä yok:

–Onek häpkhilek y'uho itäj tä ihonhatena, ¡wet matche tä ohuminche chik y'uho t'at! ₅₀Chik paj onchäthiyela m'ak tä lhäy'e lhip tä äytajche, ¡wet matche tä ilänn'o olhakli pajla'tha wak'alh! ₅₁¿Hä lhenayek onek yämthilek letamsek ihi honhat? Kha, mat häpkhilek wichi tataywek. ₅₂Tsi tälhe fwalasna lhamel tä ihi cinco tä ihi lew'et tatayhlawek. Lhamel tä ihi tres tatayhlahlä iyhäj tä täkwfwas, wet lhamel tä täkwfwas tatayhlahlä iyhäj tä ihi tres. ₅₃Häp hin'o tatayhlahlä lhäs, wet lhäs tatayhlahlä lajcha, wet atsinha tatayhlahlä lhäse, wet lhäse tatayhlahlä lako, wet atsinha tatayhlahlä lhäs lech'efwa, wet lham tatayhlahlä lech'efwa ko.

₅₄Häte Jesús ifwenho wichi wet yok:

–Chik amel lew'enay pule tä ihi tä fwala y'uy, wet lhoyaykwe, “Iwomlahchä”, wet matche t'at. ₅₅Wet chik tapinhi lhoyaykwe, “Chayohikwela”, wet matche t'at. ₅₆¡Ach'isukwis t'at! Tä lew'en m'ayhay tä iche puleye lhäy'e tä ihonhatena, wuj tä lehanej m'ak tä yäme tä ihichela. Wet tä äp lew'en m'ayhay tä oyenlhi fwalasna, ¿chipte tä kahanayej m'ak tä yäme tä ihichela?

₅₇“¿Chipte tä katetshana m'ak tä is alhoho? ₅₈Tä hin'o iti amej ates wet ihän ame n'okalelhthayajw'et, akhajyen tä ale'isyene tä kamaj lhehi n'äyij. Tsi chik nimälhyayejtso, aitonhiyela n'okalelhthayajwo, wet n'okalelhthayajwo ayachajiyela n'op'onthiwo, wet n'op'onthiwo ithatla amho n'op'onthi. ₅₉Ofwel amho, tek lenuhiphäla yäk noj aka kolhki tä letiskanej atape.”