Jesús lhämet tä itech'aynej tson'ataswo tä nilhoke lelä tä tatäy
1Häp hin'ol tä lechumet impuestos tä niyatey Romano lhayis t'alhpe, wujpe lhamel tä ihoye p'ante Jesús yämlek tach'ahuye, lhäy'e wujpe iyhäj wichi tä õyämejwethä tä ni'isahen. 2Mat häp Fariseo lhayis lhäy'e hin'ol tä lhayen lewosayej Ley p'ante tälhe Moisés, lhamel yok:
–Lhek yahinya hin'otsi, lham tachumlä wichi tä ni'isahen wet tachufwiyej tä t'ekhen.
3Tä Jesús iläte, wet ifwenho lhämet tä itech'aynej täja wet yok:
4–¿Atsi elh amel tä hiw'en cien leläy tson'atas, wet chik tatäy elh tefwajni, hä niwoma ayej kanhi leläy tä noventa y nueve wet t'ukwe elh tä tatäy yäk nilhoke? 5Wet tä nilhoke, wuj tä akäjlhi wet tilhäj. 6Tä nichäte lew'et, wet t'äne iyhäj lhäy'e lew'etfwas wet ifwenho tä yok, “¡Wuj tä okäjlhi tä onlhoke oläfwaj tson'atajnaj tatäy! ¡Mäh n'awo lhakäjyaja!”
7Wet Jesús äp yok:
–Ofwel amhohen, häp tä mälhyej'attso, wuj n'okäjyaj tä ipuleye chik elh tä lesukyaj ihi ileche wet iwo lehusek elha. Inu'pe n'okäjyaj tä iyeji häp noventa y nueve wichi tä fwetaj isen tä niwatahläk iwo lehusey iyhäja.
Jesús lhämet tä itech'aynej atsinha tä hiw'en moneda tä tatäy
8“Wok ¿atsi atsinha tä hiw'en diez laka monedas tä wuj laha, wet chik tatäy elh tefwajni, hä niwuna lechäkw, lhäy'e tä isek lew'et, wet wuj tä t'ukwe yämlek hiw'en? 9Wet chik hiw'en, t'äne iyhäj lhäy'e lew'etfwas wet ifwenho tä yok, ¡Wuj tä okäjlhi tä ow'enne oka monedanaj tatäy! ¡Mäh n'awo lhakäjyaja!”
10Wet Jesús äp yok:
–Ofwel amhohen, häp tä mälhyej'attso, Dios laka ángeles iwo lakäjyajayej elh tä lesukyaj ihi chik ileche wet iwo lehusek elha.
Jesús lhämet tä itech'aynej hin'o tä itäyhat lhäs letes
11Häte Jesús yäme täja wet yok:
–Iche hin'o tä leles täkwfwas, 12wet elh tä nithaläkwa tahuyej lajcha wet yok, “Ijcha, w'en n'oho akäywet lhip tä olewukla.” Tä mälhyejtso, lajcha hiw'enhomche leles häp lakäywet lhip tä hiw'enhatejen elhpej. 13Tä tajyäme ifwalas iyhäj, lhäs tä nithaläkwa iwom lhip tä lajcha yen lewuka, wet ikatej chinaj t'äj wet yik tä ihoye honhat elh tä tofwe. Tä nichät kanhi, wuj tä iwo lemukwehyaja, w'et iwomlhi t'at m'ak tä iyej.
14“Wet tä ihämit nilhokej, nech'e iche nehläs tä wuj tä ihi häp honhattso, wet mamse wuj tä nichuyu. 15Wet ihoye hin'o wet t'alheje lechumet, wet hin'o ichene lelafwek, ne'tek t'uyehen kutsi lhayis. 16Wet mamse wuj tä lechuyaje häp fwa'ay lhus tä kutsi tufw, mat tek ikatsik hiw'enho m'ayek.
17“Tä mälhyejtso, letichunhayaj yok, Matche tä oisuk. Nilhokej ojcha lechumyenhay tä ihi lew'et hiw'en lhäk tä naya wet imälhehi lhip, mat olham tä oikana oy'ilej t'at nehläs. 18Oyikhila, oyäpnhiyela ojcha wet ofwenhihola, oyohlak, Ijcha, osukyaj ihi, ottayhlä Dios wet ottay ahilä. 19Nemhit ot'uhawetej chik lhenn'o äsa, mat tech'ayen n'oyej achumyenhay elh.
20“Tä mälhyejtso, mamse yik tä inukwe len'äyij wet yäple lajcha lew'et. Tä kamaj atojlä, lajcha hiw'enlä wet wuj tä hip'altsen. Wet inu alhoho tä lhaichutyenej häp lhäs, wet tatsufwelej wet hits'uhi lech'alo. 21Wet mamse yok, Ijcha, osukyaj ihi, ottayhlä Dios wet ottay ahilä. Nemhit ot'uhawetej chik lhenn'o äsa. 22Mat lajcha t'äne lakawos wet yok, Mäh kelit, tonphä wesaj tä isilataj wet w'uyyenhi. Häte uyitche lefwuj n'ofwujhi wet äsaynhi nisäj. 23Wet chäj alhoho w'asetaj lhäs tä wuj tä yätaj wet län. ¡N'atufwa, n'awo lhakäjyaja! 24Tsi häp olhäsna y'il naji, mat athana äp yachajo tä iläy. Tatäy naji, wet nech'e y'anlhoke.
“Wet lhamel iwo lakäjyaja.
25“Wet häp lhäs elh tä thaläkw ihi t'at lelafwek. Tä tapil wet tott'aye lew'et, iläte música lhäy'e wichi tä ikoy, 26wet t'äne elh lakawo wet tay'ätshaneje. 27Lakawo ifwenho wet yok, Hach'inij tä tapil, wet ajcha ne'tek õ'länho w'asetaj lhäs tä yätaj, tsi akäjlhi tä lhäs yachajo tä iyej wet tafwayej lewit'äy. 28Mat lechila wuj tä lewäk ihi tä iläte täjtso, wet tek t'uhläk ihoye lhamel tä ihi lew'et. Wet lajcha ihoye wet lhaip'altsene wet yok, Yäs, woye tä owoye, hoye t'at lhakäjyaj.
29“Mat lhäs nichulho wet yok, Am lehanej t'at tä wujpe nekchämes tä otchumlhi amho, ihichet'a ifwala chik häpe tä n'am woye ämet. Mat olham ihichet'a kaylafwaj chik lew'en n'oho yämlek owo okäjyaja, lhäy'e okalay'is. 30Mat tä näm äs tä w'et iwomlhi t'at aka chinaj t'äj tä hiw'enhomche atsinhay tä lakain'oyaj ihiche, wet häp tä lelänho w'asetaj lhäs tä wuj tä yätaj.
31“Mat lajcha nichulho wet yok, Yäs, am lhe n'oyej, wet nilhokej m'ak tä in'oyej alewuk t'at. 32Mat athana t'uhawetej chik y'awo lhakäjyaja n'amejen, tsi hach'inij y'il naji, mat äp yachajo tä iläy. Tatäy naji, wet nech'e y'anlhoke.”
