Luc 17

₁Jesús tahuyej lechufwenkay wet yok:

–Iwohiyet'ak nehichela m'ayhay chik tamenej elh chik häpe wet iwoye lesukyaj. Mat oyok, lewit'äy ihi elh chik tamenej iyhäj tä iwoye lesukyaj. ₂Lhäy'e lhip tä t'uhawetej chik õyäytej lew'o tunte tä choyhat wet õ'thate lewomek, wet mälhyet nichätyenaho lesukyaj elh at chik häpe iyhäj tä w'et m'ayhayna. ₃¡Uyayhlä tä mälhyejtso!

“Chik apuhfwa iwoyej ame m'ak tä ni'isa, fwoneje. Wet chik ihan lhamej tä letes iche wet ileche, täyhtej letes. ₄Tej chik nichäte siete tä yachajopej ifwala weihalha tä itayhtej ahilä m'ak tä ni'isa, wet nämpej wet yok, Otes ihi ahilä, mat oleche - yäk nichäte siete tä yachajopej, is t'at, täyhtej t'at letes.”

₅Häp apóstoles t'alhe Lhawuk wet yok:

–Ísej lhip olhamel ot'ekhahyaj.

₆Lhawuk nichulho wet yok:

–Tej chik lhämsaj ekhahyaj tehi iwoye mostaza lhofwaj, mat chik letahuye hal'äni chik lhok, “¡Alanhi, mäch'oye tä lhehitsi wet ehi lewomek!”, wet häp hal'äni iwoye t'at ämet.

₇“Chik elh amel lakawo ihi, wet chik lham tapil tä tälhe alafwek tä ileyej tä isaji honhat wok t'uye aläy, ¿hä letahuyej wet lhok, Tayphä, tufw äk? ₈Lewohiyet'a, mat lhok, Kelit enlhi olhäk, wet chik wak'alh chäja n'oye yämlek otufw wet oyä. Chik oleyej, nech'e amlak let'ek. ₉Wet kawohit graciasayej akawo tä iwoye m'ak tä lene'tek iwoye.

₁₀“Wet häte amel amälhyej'attso tä ahäpehen Dios lakawos. Chik lehämit nilhokej m'ak tä Dios ne'tek lewoyaye, is tä lhoyaykwe, Dios lakawos t'at n'amel. Y'awoye m'ak tä ne'tek y'awoye, wet tajlhame.”

₁₁Tä Jesús tujlhache n'äyij tä ihoye Jerusalén, inukwe Samaria tumej lhip wet Galilea tumej lhip elh. ₁₂Tä nichäte wichi lew'et, iche diez hin'ol tä amostas länhay tä yistejlä. Wet lhamel takasthen tä atofwehlä ₁₃wet t'änhen tä yok:

–¡Jesús, Maestro, p'altsen n'oyehen!

₁₄Tä Jesús hiw'ene, wet tahuye lhamel wet yok:

–Mähen, apäyne sacerdotes.

Wet yikhen, tä ihi n'äyij ichesen. ₁₅Wet elh lhamel tä hiw'en tä tatäy m'ak tä ilän, tapil wet ifwitsenej lechos tä iwunit Dios. ₁₆Tä nichäte Jesús, wet takhoswhäye lepach'ol wet iwo graciasayej. Hin'otso Samaria lhele t'at. ₁₇Wet Jesús yok:

–¿Hä newachene diez lhamel tä ichesen? ¿Chip ihi iyhäj tä nueve? ₁₈¿Hä niwohit elh chik tapil wet iwunit Dios, tajlhame hin'ona tä kahäpeya Judío?

₁₉Wet nech'e tahuyej hin'o wet yok:

–Nephä, mäh. Achayaj tä aichesat.

₂₀Fariseo lhayis tay'ätshane Jesús wet yok:

–¿Chihlahätek näm Dios Niyatyaj?

Lham nichulho wet yok:

–Atey hiw'enhit'ala chik näm. ₂₁Häpkhit'ala chik õyok, “Lhek yahinya, ikana”, wok õyok, “Ikanhi”. Tsi Dios Niyatyaj pajche iyej t'at amel.

₂₂Wet tahuyej lechufwenkay wet yok:

–Nämla lewhäy chik amel let'uhläk lew'en tej chik weihalha n'otetnek chik hin'älit tä eyte nichäthiye ifwalas chik Hin'o Lhäs tapil, mat lew'enhit'ala. ₂₃Ihichela wichi tä yohlak, “Lhek yahinya, ikana”, wok iyhäj yohlak, “Lhek yahinya, ikanhi”. Mat yej lhekche lhamel. ₂₄Tsi hätehlat iwoye lep, lehutunek y'ajpe pule tälhe tä ifwala tälhche yäk ifwala itayche, häp tä mälhhiyejattso ifwala chik Hin'o Lhäs tapil. ₂₅Mat chunkat iwohiyet'ak niwoya leteläythayaja, wet wichi tä ihi ifwalasna lhamel itihit'ala lhamhi.

₂₆“Mälhyej ifwalas p'ante Noé ihi, häp tä mälhhiyejattso ifwalas chik Hin'o Lhäs tapil. ₂₇Wichi t'ekhen wet iyä, tewhayeyhen, yäk nichäte ifwala tä Noé tiyäjo barca, wet näm pelhay tä wuj wet itäyhthen nilhokej lhamel. ₂₈Hätet iwoye ifwalas p'ante Lot ihi. Wichi t'ekhen wet iyä, ichäj m'ayhay wet ifwelwethä m'ayhay, lhamel tutcheyhen wet yenwethä lewukwey. ₂₉Matkat tä Lot yikch'oye hupuytso tä Sodoma, tälh puleye itäj tä azufre tä nitsäyhchä wet itäyhthen nilhokej lhamel. ₃₀Häp tä mälhhiyejattso chik n'äl Hin'o Lhäs.

₃₁“Wet häp ifwalatso, elh chik i'pe lewukwe lhip tä tumphä, isit'ak yike lakhäy tä ichufwi lewukwe tä inuhchä, mat is tä yik t'at. Wet elh chik ihi lelafwek, isit'ak tapile lewukwe. ₃₂Tichunache Lot lech'efwa p'ante. ₃₃Wet häp tä ofwel amhohen, elh chik noway letape tatäyhla, mat elh chik ninowaya letape, häpkhilek tafway.

₃₄“Lhek tetshan olhämet, häp lhamel täkwfwas chik i'pe lemäwet tä imähen honatsitso, õ'chäjla elh wet elh imälhehilahchä. ₃₅Wet häp atsinhay täkwfwas chik tachofwanhen, õ'chäjla elh wet elh imälhehilahchä.”

₃₇Tä lechufwenkay iläte tä Jesús iwoyetso, wet tay'ätshane tä yok:

–Iwuk, ¿chihla ihi täjtso?

Lham nichulho wet yok:

–Lhip chik tseyek ihi, häpkhilek tsetwos lhaihuthiwek.