Jesús nech'e iche p'ante
1Häp lewhäytso niyat Romano tä lhey Augusto ne'tek õ'wo t'ufwahtesa nilhokej wichi. 2Täja häpe censo tä ichunpe honhat, wet häpe t'at fwalas p'ante hin'o tä lhey Cirenio niyatej honhat tä Siria. 3Wet nilhokej wichi elhpej yäple honhat tä lew'et yämlek õ'lesayen lheyes.
4Tä mälhyejtso, José yikch'oye hupuy tä Nazaret tä ihi Galilea, wet yik tä ihoye Belén, häp hupuy tä rey David nichäthihchä p'ante tä ihi Judea. Tsi José häpe t'at David leles tä lepes lhele elh. 5Wet ichäj lhamche lhutsha María tä pajche kalelhäj tä yenla lech'efwaya. Wet lhutshana hich'otshan t'at, 6tä lhamel ihi Belén, nichäte lewhäy tä iwo lhäsa. 7Mat lew'et ihihit'a tsi tapoyej hup tä n'okasthawet, wet lhamel ihoye n'oläy hi, wet häp tä ihi tä María iwo lhäsa. Häpe t'at lhäs tä lechunkatsek, wet ikäfwlejche sak'al lhip wet imäynhi n'oläy lhäkhi.
Ángeles iwo silätayej tson'ataswos tä N'ofwayhthi nech'e iche
8Häp honatsitso iche tson'ataswos tä i'alhotaje tä t'uyehen leläy, tek atofwehlä Belén. 9Wet ángel tä tälhe Lhawuk lhain'ältej lhamel, wet Lhawuk lesilatyaj ihutunche'pe, wet wuj tä nowayhen. 10Mat ángel ifwenho lhamel wet yok:
–Yej nowayay, tsi ochäj amehen osilätyaj tä is, häpkhilek ikäjyenwethä nilhokej wichi. 11Fwalana nichätchä amel Afwayhthiyay tä häpe Cristo, Lhawuk, ihi David laka hupuy. 12Wet häp n'otetnek tä tach'otla amehen häp täja: Chik lhämay kanhi, lew'enayhla han'äfwaj tä õ'käfwlejche sak'al wet õ'mäynhi n'oläy lhäkhi.
13Wet tson'ataswos iseltej tä n'äl wujpe iyhäj ángeles tä tälh puleye wet iwhäye häp elh, wet lhamel iwunit Dios tä yok:
14“¡Lewujyaj ihi Dios tä ipuleye!
¡Letamsek ihi wichi tä ihonhatena,
lhamel tä Dios itshupyeneje lep'altsenyaj!”
15Tä ángeles yäpil puleye, tson'ataswos yok:
–Mäh n'ekhen, n'ahoye Belén wet n'ayahinch'oye m'ak tä Lhawuk iwo siläta n'amejenna.
16Lhamel nakelchetshi tä yikhen. Tä nichät kanhi, hiw'en María lhäy'e José, lhäy'e han'äfwaj tä õ'mäynhi n'oläy lhäkhi. 17Wet lhamel yäme m'ak tä ángel ifwenhomchen'e tä yäme han'äfwajna, 18wet nilhokej lhamel tä iläte wuj tä iseltejen. 19Mat María t'amajeji lehusek nilhokej tähestso wet yenpej tichunhayaja. 20Wet tson'ataswos yäpil, wet lhäy'e lhip tä iwuntej Dios nilhokej m'ayhay tä hiw'en lhäy'e tä iläte, tsi matche t'at ángel lhämet.
Õ'wo lheya han'äfwaj
21Tä tajyäme p'ante ocho fwalas, õ'tiyej n'otetnek tä n'olhijtsek häp han'äfwaj, wet õyen lheya Jesús, häp n'olhey tä ángel pajche ifwenho María tä eyte hich'otshanhi.
María lhäy'e José ihäne Jesús häp Dios Lew'et häpkhilek itihi tä Lhawuk itayche
22-24Tä w'awulho p'ante fwalas tä lewhäy yämthilek lhamel lhayen t'amajchetesa, mälhyej tä Ley p'ante tälhe Moisés ne'tek atsinhay iwoye chik tafwaytshi cuarenta fwalas tä takapuhtshan, María lhäy'e José ihoye Jerusalén wet ichäj han'äfwaj. Wet lhamel yachaje Lhawuk m'ak tä lhämet ne'tek õyachaje tä yok, “täkwfwas pop, wok täkwfwas hokwinaj lesas.” Wet tachuma han'äfwaj wet itihi tä Lhawuk itayche, tsi lhämet p'ante yok, “Nilhokej m'ak at chik häpe chik n'ochunkatsek häpe hin'o, is tä õyen n'ot'amajchetayej Lhawuk.”
Simeón nitäfwelej han'äfwaj Jesús
25Wet häp fwalas p'antetso iche hin'o tä lhey Simeón tä lew'et t'at Jerusalén. Häpe elh tä is alhoho, inukwe Lhawuk len'äyij, wet iniwhipejlä fwala chik Lhawuk itiyej lep'altsenyaj häp Israel lhayis. Wet Espíritu tä Dios T'amajchet iyej, 26wet pajche ifwenho wet yok:
–Chik atey niw'ena N'ofwayhthi tä Dios ichenla, kamaj let'inhit'ala ayej.
27Wet Espíritu ihäne Simeón häp Lhawuk Lew'et, häpe t'at lewhäy tä María lhäy'e José ihäne lhäsaj yämthilek iwoyeje m'ak tä Ley p'ante tälhe Moisés ne'tek õ'woye. 28Wet tä Simeón hiw'en han'äfwaj, tachuma wet imäyenpe takweyey, wet iwunit Dios tä yok:
29“Iwuk, athana tä lhayäm matche ämet
tä pajche lefwel n'oho tä akawon'o,
ch'anlhaye chik owo ot'elakw'eta tä matche.
30Tsi ottey nech'e hiw'en
n'ofwayhyaj tä nech'e iche
31tä letihi tä nilhokej wichi tatache,
32häp isi tä ihutunla'pe wichi tä w'enha lhamej,
wet häpkhila aka wichi Israel lhayis lewujyaj.”
33Wet Jesús lako lhäy'e lajcha José, tä iläte Simeón lhämtestso tä yämeje lhäs Jesús, lhamel wuj tä iseltejen. 34Wet Simeón itiyej lakäpfwayaj tä is lhamel, wet tahuyej María wet yok:
–Lhek yahinya, häp han'äfwajna tamenhiyeja wujpe Israel lhayis chik tatäy wok tafwayhen. Lham häpkhila m'ak tä wujla'pe wichi nitchumahlä, 35wet chik mälhyejtso, n'änhila'pe nilhokej m'ak tä ihiche lehusey. Wet tähesna hätehlat iwoye n'ofwajnhat chik tiyäjo am achowej.
Ana yen lhämeta han'äfwaj Jesús
36Wet häte iche häp atsinha tä lhey Ana, tä häpe Penuel p'ante tä lhäse tä tälhe Aser laka wichi p'ante. Atsinhatso häpe t'at profeta, wet wuj tä hich'ut, lham iwo p'ante lech'efwaya tä kamaj lhutsha wet iyej siete nekchämes, wet hin'o tä lech'efwa ileyej p'ante honhat. 37Wet lham atsinha tesa t'at yäk ochenta y cuatro nekchämes. Wet ilehiyejt'a Dios Lew'et, mat n'okwiyej Lhawuk fwalapej lhäy'e honatsipej tä lhaichuyhat lhäy'e tä iwo let'alhyaja. 38Wet häp horatso lham näm wet hiw'enho laka gracias Dios, wet yen lhämeta han'äfwaj Jesús tä ifwenho nilhokej lhamel tä iniwhipejlä häp Jerusalén lefwayhyaj.
María lhäy'e José yäple Nazaret
39Tä María lhäy'e José iwoye p'ante nilhokej m'ak tä Lhawuk lhämet ne'tek õ'woye, yäple lew'et Nazaret tä ihi Galilea. 40Wet han'äfwaj lhaichihelit, wet takhajay, wuj tä ihanej m'ayhay, wet Dios lakäpfwayaj tä is iyej.
Tä Jesús hiw'en p'ante doce nekchämes, imälhehi ayej Dios Lew'et
41Nekchämpej María lhäy'e José, tä nichäte fwalas tä Judío lhayis lakäjyaj tä Pascua, lhamel ihoye Jerusalén. 42Wet tä Jesús hiw'en p'ante doce nekchämes, nilhokej lhamel ihoye, mälhyej lakeypej. 43Wet lhamel ihi t'at n'okäjyaj, wet tä noj p'ante lhamel yäpil. Mat ihanhiyejt'a tä han'äfwaj Jesús imälhehi Jerusalén, 44lhamel yenek iyej t'at wichi tä yikhen, wet fwala tefwajni tä iwo lew'ekyaja lhamel. Wet tä lhamel hiw'en tä newayej, iwo tesa tä t'ukwe, tay'ätshaneje iyhäj tä lew'etfwas, lhäy'e letäfwnhay. 45Mat hiw'enhit'a, tä mälhyejtso yäple Jerusalén tä t'ukwe.
46Tä fwala elh, nilhoke tä ihi Dios Lew'et, lham tatayphä t'at tä ihi lechowej häp hin'ol tä lhayen lewosayej Ley p'ante tälhe Moisés. Lham tach'ahuye t'at m'ak tä lhamel yäme, wet tay'ätshane lhamel. 47Wet nilhokej lhamel tä iläte, wuj tä iseltejen tä hiw'en tä lehusek ihi lhäy'e tä ihanej tä nichulho lhamel. 48Wet lako lhäy'e lajcha José, tä lhamel hiw'en, nem koyhyaj tä iseltejen. Wet lako tahuyej wet yok:
–Yäs, ¿chipte tä lewoynejetso m'ak tä lewoyej n'oyehen? Lhek yahinya, olham lhäy'e ajcha lhäy'e lhip tä olhakli ihi amej tä ot'u amche.
49Mat Jesús nichulho lhamel wet yok:
–¿Atsi m'ak tä tamenej tä let'uyay n'okwe? ¿Hä tek lehanayej tä iwohiyet'ak n'am nehi Ojcha Lewukwe?
50Mat lhamel ihanhiyejt'a m'ak tä yäme.
51Wet lham yikche p'ante lhamel wet yäple Nazaret. Wet tä ihi lew'et lham tach'ahuye wet iwoyepej m'ak at chik häpe tä lhamel ne'tek iwoye. Wet lako María wuj tä yenpej tichunhayaja nilhokej tähestso. 52Wet Jesús lhaichihelit t'at wet lhäy'epej lhip tä ihanej m'ayhay, wet ikänitlhipej Dios lhäy'e wichi.
