Luc 5

₁Tä Jesús ihi p'ante lhip häp lewomek tä Genesaret, wet wujpe wichi tä lhaihute tä t'uhläk iläte Dios lhämet. ₂Wet lham hiw'ene tä iche täkwfwas chalana tä iwhäye lewomek, lewos pajche yikch'oye yämthilek ilejen lewotey. ₃Wet Jesús tiyäjo häp elh tä lewuk Simón wet ne'tek ihut inäte. Wet lham tatayphä tä ihi wet ichufwenhen wichi. ₄Tä ileyej, wet tahuyej Simón wet yok:

–Häne ahi häp lhip tä pitoj, wet thatayela awot häpkhilek lesakanayej w'ahat.

₅Simón nichulho wet yok:

–Maestro, honatsi imälhewek tä olhamel ochumwethä, mat tek wo m'ak che osakanej. Mat is t'at, owoye ämet, othathiyela inät häp owot.

₆Tä lhamel iwoye, wujpey w'ahat tä isakanej wet eyte hikw'esiche lewot. ₇Wet takwey y'aje iyhäj tä ihi lehi elh yämthilek tach'ote. Tä nichäte, wet ihanche w'ahat häp lehistso wet lhäy'e lhip tä tapokwe, wet eyte y'uyhihchä. ₈Tä Simón Pedro hiw'en, wet takhoschufwi Jesús wet yok:

–¡Woye tä owoye, Iwuk, atonte n'ohlä, tsi tek ot'uhawetej, ohäpe hin'o tä ni'isa!

₉Iwoynejetso lhämet tsi lham lhäy'e iyhäj tä iyej wuj tä leselthayaj iyejen tä hiw'en w'ahat tä wujpey tä lhamel isakanej. ₁₀Häte Simón lech'otfwas, Santiago lhäy'e Juan, häp Zebedeo leles, lhamel lhäy'e lhip tä iseltejen. Mat Jesús tahuyej Simón wet yok:

–Yej noway. Tälhe athana nemhit w'ahat che lesakanhiyeja, mat nech'e lesakanhiyeja wichi.

₁₁Wet lhamel yämte ufw häp lehis, wet iwom nilhokej m'ak tä iyej wet yikche Jesús.

₁₂Tä ifwala elh Jesús ihi hupuy, wet näm hin'o tä amostas wuj tä ilän. Tä hiw'en Jesús, wet takhoschufwi tä lhaip'altsene wet yok:

–Che lewoye, lehanej lewoyneje che letäyhat n'oyej ot'inhayaj.

₁₃Tä Jesús iläte, wet tachumpe wet yok:

–Owoye. Otäyhat amej.

Wet yofwajkwet tatäy amostas wet hin'o iches. ₁₄Wet Jesús ifwenho tä yok:

–Lhek yahinya, yej fwenhola elh che häpe. Mat apäynela häp sacerdote wet chäje m'ak che lhenla lew'ayhata Dios, häp achesyaj tä tamenej, mälhyej tä Moisés p'ante ne'tek õ'woye, häpkhilek nilhokej wichi ihanej tä noj anhayaj.

₁₅Matkat Jesús letoyaj lhäy'e lhip tä y'ajpe honhat, wet wujpe wichi tä lhaihutepej tä t'uhläk iläte lhämtes, häte t'uhläk ichesen tä t'inhayaj ilänhen. ₁₆Mat Jesús yikch'oye wichi wet ihoyepej lhipey tä wichi newahi yämthilek iwo let'alhyaja.

₁₇Tä ifwala elh tä Jesús iwo lechufwenyaja, wet iche iyhäj Fariseo lhayis lhäy'e elhpej häp lhamel tä lhayen lewosayej Ley p'ante tälhe Moisés, lhamel tälhomche nilhokej wichi lew'etesas tä ihi Galilea lhäy'e Judea lhäy'e Jerusalén. Wet lhamel tatachephä t'at tä iyej. Wet Dios lakhajyhayaj n'äl tä iyej t'at Jesús tä lham ichesthen wichi tä t'inhayaj länhay. ₁₈Wet nech'e nämhen hin'ol tä ihäne elh tä k'efwitas länek tä i'pe lehowet. Lhamel t'uhläk ihän lech'oye hup yämthilek itihi tä Jesús tatache, ₁₉mat lhamel tek len'äyij iyeji häp wichi tä wuj. Tä mälhyejtso, iho'pe hup lhip tä tumphä wet ifwoynho, wet itälhetche t'inhayaj länek tä i'pe lehowet, wet iti honhate tä ihi tä Jesús tatache tä ihi wichi lechowej. ₂₀Tä Jesús hiw'en lhamel lechayaj, wet tahuyej häp k'efwitas länek wet yok:

–Hin'o, tatäy amej hach'isukyajay.

₂₁Fariseo lhayis lhäy'e hin'ol tä lhayen lewosayej Ley p'ante tälhe Moisés, tä lhamel iläte Jesús tä iwoyetso, lhamel letichunhayaj yok, “¿Atsi tä fwetaj lhayene hin'otsi? Lhämtestso iläkwlhi Dios, tsi ts'ilak Dios tä ihanej iwoyneje tä itäyhat n'och'isukyajay.”

₂₂Mat Jesús nitäfwelej t'at tä lhamel letichunhayaj ihiche, wet tay'ätshane lhamel wet yok:

–¿Chipte tä mälhyejtso atichunhayaj? ₂₃¿Atsi m'ak tä lhäy'e lhip tä ni'thaya? ¿Häpe p'iya tä oyok, “Tatäy amej hach'isukyajay”, wok häp che oyok, “Nephä, w'eleklhi”? ₂₄Lhek yahinya, opäyen amehen häpkhilek lehanej tä Hin'o Lhäs len'ohyaj ihi tä ihonhatena yämthilek itäyhthen wichi lech'isukyajay.

Wet nech'e tahuyej hin'o tä k'efwitas ilän wet yok:

–Am tä oyäm ame, oyok, Nephä, chuma ahowet, mäh äple haw'et.

₂₅Häpet tä mälhyejtso, wet hin'o nephä tä ihi wichi lechowej, wet tachuma lehowet wet yäple lew'et, wet iwunit Dios. ₂₆Wet nilhokej wichi wuj tä iseltejen wet lhäy'e lhip tä inuhat lhamhohen wet yok:

–Ifwalana y'aw'en t'at m'ayhay tä matche tä n'aiselkathen.

Wet lhamel iwunit t'at häp Dios.

₂₇Tä tajyäme täjtso, Jesús yik wet hiw'en häp hin'o tä lhey Leví, lham itayphä tä ihi lew'et tä ihutpejwek impuestos laha tä niyatey Romano lhayis t'alhpe. Wet Jesús tahuyej tä yok:

–Nek n'okwe.

₂₈Tä Leví iläte, nephä, iwom katsi nilhokej lechumet wet yikche Jesús.

₂₉Wet häp fwalatso Leví yenlhi lakäjyaj tä wuj tä yenhoplhi lhäk häp Jesús, wet wujpe hin'ol tä impuesto lewos lhäy'e wichi iyhäj iyej tä tachufwiyejwek lhäk. ₃₀Mat häp Fariseo lhayis, lhäy'e hin'ol tä lhayen lewosayej Ley p'ante tälhe Moisés tä äp häpe t'at lhamel iyhäj, lhamel tahuyej Jesús lechufwenkay wet yok:

–¿Chipte tä amel letachufwiyej tä let'ekhen lhäy'e tä leyähen häp impuesto lewos lhäy'e iyhäj tä ni'isahen? ¡Isit'a m'ak tä lewoye!

₃₁Jesús nichulho lhamel wet yok:

–Häp wichi tä t'inhayaj länhay, häp tä iwatlä kachawo. Iyhäj tä newache t'inhayaj tek iwatlä. ₃₂Onekhiyet'a lhamel tä isen, mat iyhäj tä ni'isahen häp tä oneke, yämthilek iwo lehusey iyhäja.

₃₃Wichi ifwenho Jesús wet yok:

–Juan Bautista lechufwenkay lhäy'e iyhäj tä ihän Fariseo lhayis, lhamel lhaichuyhathenpej wet iwopej t'alhyaja, mat am achufwenkay t'ekhenpej wet iyä t'at.

₃₄Jesús nichulho lhamel wet yok:

–¿Chiwoye wichi tä ihoye elh tä tawhayey tä iwo lakäjyaja? ¿Hä lene'tek lhaichuyhathen tä hin'o tä whayenaj kamaj iyej lhamel? ¡Kha! ₃₅Mat nichäthiyela fwala tä õ'soyej lhamel häp whayenaj, nech'e häpkhilek lhaichuyhathen.

₃₆Häte Jesús äp ifwenho wichi häp lhämet tä itech'aynej täja wet yok:

–Nehit katsik hich'esaj lhip lew'uy tä nech'ayek yämthilek itsekejo lew'uy wumek. Che iwoynejetso, ikänchi t'at lew'uy tä nech'ayek wet häte lew'uy wumek tek w'awulhlä lhip tä nech'ayek. ₃₇Häte nehit katsik itsäyho hat'es tä nech'ayek häp tsänt'äj tä lewumek. Tsi hat'es tä nech'ayek, che y'ohi, y'ajihola lehi tä lewumek, wet itsäy hat'es lhäy'e lehi tatäy. ₃₈Tä mälhyejtso, is che õ'tsäyho hat'es tä nech'ayek häp lehi tä nech'ayek. ₃₉Wet äp elh tä iyäyej hat'es tä pajche tek t'uhläk iyäyej hat'es tä nech'ayek, tsi yok, “Elh tä pajche, häp tä is.”